लैव्यव्यवस्था 12

बारतपण इन शुद्धीकरण इन विधी

1 बाक यहोवा मूसा से अंदुन, 2 "इस्राएलीगोळ से अन: जो आर्त व्हाट्या दी ईरूल अदिक आकीन पारगोळ ईरूल, रा आक येळ दिन ताका अशुद्ध ईत्तार; या प्रकार देल आक व्हार्या आगकु ईरतार हांग अच अशुद्ध ईर पायजे." 3 अदिक आठवा दिशी चिग्द उन खतना माळकु आगुल. 4 बाक आक आर्त तान खुन होगोद स्त्राव दा टु शुद्ध आगोर साटी तेत्तीस दिन ईरूल; अदिक यागासताका आकीन शुद्ध आगोद दिन पुरा न आगुल आगासताका आक न रा यातोदारा पवित्र जागा दा प्रवेश माळुल.

5 अदिक अगर आकी पोर आत, रा मासीक पाळी इन होती ह्यांग आक ईरतोगोर हांग अच आक चौदा दिन अशुद्ध ईरूल; आकी तान रकत स्त्राव दा टु शुद्ध आगोर साटी छैसठ दिन हत्याव.

6 "याग आकीन शुद्ध आगोद दिन पुरा आगुल, आग चाहे आकी पार आगुल या बाक पोर, आक होमबली इन साटी ऊंद वर्ष इन म्यांडा अन्द पाड्डा, अदिक पापबली इन साटी कबूतर इन ऊंद पाड्डा या पंडुकी, भेंटमाळोद तम्बू उन दरवाजा मा याजक उन हात्ती तरूल." 7 आग याजक अवरी यहोवा अन्द मुंद भेंट येर्सकु आकीन साटी प्रायश्चित माळुल; अदिक आक तान मासीक पाळी इन अशुद्धता बिटकु शुद्ध ठहरूस्यार. "याता आर्त इक पार या पोर पैदा आगुल आंदुर साटी ईदा व्यवस्था आद."

8 अदिक अगर आव म्यांडा कोळदुर दा असमर्थ ईरूल, रा येढ्ढ पंडुकी या कबूतर इन येढ्ढ पाड्डा, ऊंद रा होमबली अदिक दुसरा पापबली इन साटी कोळुल; अदिक याजक आकीन साटी प्रायश्चित माळुल, आग आक शुद्ध ठहरूस्यार.