लैव्यव्यवस्था 11

शुद्ध अदिक अशुद्ध पशु

1 बाक यहोवा मूसा से अदिक हारून से अंदुन, 2 "इस्राएलीगोळ से अन: यास पशु धरती मा आव आ सप्पा दा टु नीव ई जीवधारीगोळ्द मास तिन सकतीर. 3 पशु गोळ दा टु यास चिरूसकु या हर्दकु खुर इन ईरताव अदिक कवरी माळताव अवरी तिन सकतीर." 4 लेकीन कवरी माळावाळा या हर्दकु खुरवाळा दा टु ई पशुगोळी तिनबाळेतीर, मतलब ऊँट, जो कवरी रा माळतद लेकीन चिरा खुर इन ईराल, ईदुरसाटी अद नीम्द साटी अशुद्ध ठहरूस्कु आग्याद. 5 अदिक चट्टानी बिज्जू, जो कवरी रा माळतद लेकीन चिरा खुर इन ईराल, अद भी नीम्द साटी अशुद्ध आद. 6 अदिक खरगोश, जो कवरी रा माळतद लेकीन चिरा खुर इन ईराल, ईदुरसाटी अद भी नीम्द साटी अशुद्ध आद. 7 अदिक हंदी, जो चिरा मतलब हर्दकु खुर इन रा ईरतद लेकीन कवरी माळाल, इदुरसाटी अद नीम्द साटी अशुद्ध आद. 8 ईऊर मास दा टु येनारा भी तिनबाळेतीर, अदिक ईऊरव मुर्दा अक मूठ भी बाळेतीर; ईव रा नीम्द साटी अशुद्ध आव.

9 "बाक यास नीर ईनव जन्तु आव ईऊर दा टु नीव इंदरी तिन सकतीर, मतलब समुद्र या गांगागोळ नीर इन जन्तुगोळ दा टु यासरव पिक्का अदिक छिलका ईरताव आंदरी तिन सकतीर." 10 अदिक नीर दा ईरावाळेर प्राणीगोळ दा टु यास जीवधारी बिना पिक्का अदिक खवला अन्द समुद्र या गांगागोळ दा ईरताव अव सप्पा नीम्द साटी घृणित आव. 11 अव नीम्द साटी घृणित ठहरूस्याव; नीव अऊर दा टु येनारा भी तिन बाळेतीर, अदिक अऊर मुर्दागोळी इक अशुद्ध जान्सेतीर. 12 नीर दा या जन्तु उन पिक्का अदिक छिलकागोळ ईरालव अव नीम्द साटी अशुद्ध आव.

13 "बाक पक्षिगोळ दा टु ईवरी अशुद्ध जान्सेतीर, ईव अशुद्ध आगोद कारण देल तिनकु आगबाळुल, मतलब गरूळ, दाळीवाळा गिधाळ, करीद गिधाळ, 14 चील, अदिक अलग-अलग जाती नव घार, 15 अदिक अलग-अलग जाती नव काग्गगोळ, 16 शुतुरमुर्ग, ईळ्लक इन सिकरा, पानकोंबळी, अदिक अलग-अलग जाती नव पानकोंबळी, 17 स्यांळ्द पिंजोळ्ला, बगला, धोळ्द पिंजोळ्ला, 18 बगला, धोळ उल्लू, राजहँस, पानकोंबळी, गिधाळ, 19 सारस, अलग-अलग जाती नव बगलागोळ, टिटवी अदिक चमगादळ."

20 यास पिक्कावाळेर कीळागोळ नाक कालगोळ बल मा नळुताव अव सप्पा नीम्द साटी अशुद्ध आव. 21 लेकीन रेंगसावाळेर अदिक पिक्कावाळेर जो नाक नाक कालगोळ बल मा नळुताव, अऊरव भूमी मा हारली वोळली टांगगोळ ईरताव आंदरी रा तिन सकतीर. 22 अव ईव हुव, मतलब अलग-अलग जाती नव हत्तीफाफागोळ, फनगे अदिक झींगुर. 23 लेकीन अदिक सप्पा रेंगसावाळेर पिक्कावाळेर जो नाक काल वाळेर ईरताव अव नीम्द साटी अशुद्ध आव.

24 "ईऊर कारण नीव अशुद्ध ठहरूसीर; यावारा ईऊर लोथ मुठबुळुल आव द्यावगा ताका अशुद्ध ठहरूस्यान. 25 अदिक जो ईऊर लोथ दा टु येनारा भी नेगुल आव तान कपळा वोगुल अदिक द्यावगा ताका अशुद्ध ईरूल. 26 बाक यास पशु चिरा खुर इन ईरताव लेकीन न रा बिलकुल हर्दकु खुर इन अदिक न कवरी माळावाळा आव अव नीम साटी अशुद्ध आव; जो यावारा अवरी मुट्‍यान आव अशुद्ध ठहरूस्यान. 27 अदिक नाक काल इन बल आळावाळेर दा टु यास पंजागोळ बल मा नळुताव अव सप्पा नीम साटी अशुद्ध आव; जो यावारा आंदुर लोथ मुट्‍यान आव द्यावगा ताका अशुद्ध ईत्तान. 28 अदिक जो यावारा अऊर लोथ नेगदान आव तान कपळा तोळुल अदिक द्यावगा ताका अशुद्ध ईरूल; यतिकी अव नीम्द साटी अशुद्ध आव.

29 "अदिक जो धरती मा रांगस्ताव अऊर दा टु ईव रेंगसावाळेर नीम्द साटी अशुद्ध आव, मतलब घोरपळ, ईळ्ल, अदिक अलग-अलग जाती नव डोकेला, 30 अदिक ईजगुर, मगर, सापसिरोली, सांडा, डोकेला. 31 सप्पा रेंगसावाळेर दा टु ईव अच नीम्द साटी अशुद्ध आव; जो यावारा ईऊर लोथ मुट्‍यान आव द्यावगा ताका अशुद्ध ईरूल. 32 अदिक ईऊर दा टु अऊर लोथ यातोदारा वस्तु मा बिदोगुल अद भी अशुद्ध ठहरूसीत, चाहे अद हुळ्ली इन यातोदारा बरतन ईरूल, चाहे कपळा, चाहे तोगुल, चाहे बॉरा, चाहे यातोदारा क्याल्सा अन्द यातोदारा भी बरतन यती आगबाळुल; अव नीर दा हाक्कु आदीत, अदिक द्यावगा ताका अशुद्ध ईरूल, आग शुद्ध सम्सकु आदीत. 33 अदिक अगर मुण्ण इन यातोदारा बरतन ईरूल ईदुर दा ईव जन्तुगोळ दा टु यावारा बिळुल, रा अद बरतन दा जो येनारा ईरूल अद अशुद्ध ठहरूसुल, अदिक बरतन इक नीव ओळ्द बुळेतीर. 34 अदुर दा तिना लायक भोजन ईरूल, अदुर दा नीर इन छुआव ईरूल अद सप्पा अशुद्ध ठहरूसुल; बाक अगर यातोदारा हिंग बरतन दा कुडोर साटी येनारा ईरूल रा अद भी अशुद्ध ठहरूसुल. 35 अदिक अगर लोथ दा टु येनारा तंदुर या चुली मा बिळुल रा अद भी अशुद्ध ठहरूसुल, अदिक मुरकु आगुल; यतिकी अद अशुद्ध आगेदीत, अद निम्द साटी भी अशुद्ध ठहरूसीत. 36 लेकीन झरना या क्यार्रा यदुर दा नीर जमा ईरूल अद रा शुद्ध अच ईरूल; लेकीन जो ईऊर लोथ इक मुठ्ठुल आव अशुद्ध ठहरूसुल. 37 अदिक अगर ईऊर लोथ दा टु येनारा भी यातोदारा प्रकार इन बींजा मा जो बोऊसा साटी ईरूल, रा अद बींजा शुद्ध ईरूल. 38 पर अगर बींजा मा नीर हाक्कु आगीदाद अदिक हिंद लोथ दा टु येनारा अदुर मा बिदोगुल, रा अद नीम्द साटी अशुद्ध ठहरूसुल.

39 "बाक या पशुगोळ इक तिनोद आग्या नीम इक कोटकु आग्याद अगर अदुर दा टु यातोदारा पशु सोतोगुल, रा जो यावारा अदुर लोथ इक मुठ्ठुल आव द्यावगा ताका अशुद्ध ईरूल. 40 अदिक अऊर लोथ दा टु जो यावारा येनारा तिनुल आव तान कपळा तोळुल अदिक द्यावगा ताका अशुद्ध ईरूल; अदिक जो यावारा अऊर लोथ नेगुल आव भी तान कपळा तोळुल अदिक द्यावगा ताका अशुद्ध ईरूल.

41 "सप्पा प्रकार इन धरती मा रेंगसावाळेर जन्तु घिनौना आव; अव तिनकु आग बाळुल. 42 धरती मा रेंगसावाळेर दा टु यास व्हाट्टा या नाक कालगोळ मा ईरताव, अवरी नीव तिनबाळेतीर; यतिकी अव घिनौना आव. 43 नीव यातोदारा प्रकार इन रेंगसावाळेर जन्तु उन द्वारा तान तान इक घिनौना माळबाळेतीर; अदिक न अऊर द्वारा तान इक अशुद्ध माळकु अपवित्र ठहरूसेतीर. 44 यतिकी ना नीम्द परमेश्वर यहोवा हुईन; ई कारण खुद इक शुद्ध माळकु पवित्र बन्सकु ईरी, यतिकी ना पवित्र आईन. इदुरसाटी नीव यातोदारा भी प्रकार इन रेंगसावाळेर जन्तु उन द्वारा जो धरती मा नळुताव तान तान इक अशुद्ध माळबाळेतीर. 45 यतिकी ना आ यहोवा हुईन जो नीमी मिस्त्र द्याश टु इदुरसाटी तेगुकु तंदीन कि नीम्द परमेश्वर ठहरूसाईन; इदुरसाटी नीव पवित्र बन्सी, यतिकी ना पवित्र आईन."

46 पशु गोळ, पक्षिगोळ, अदिक सप्पा नीर दा ईरावाळेर प्राणीगोळ, अदिक धरती मा सप्पा रेंगसावाळेर प्राणीगोळ्द बारा दा ईदा व्यवस्था आद, 47 कि शुद्ध अशुद्ध अदिक तिनालायक या बिन तिनालायक जीवधारीगोळ दा भेद माळकु आगुल.