1 इदुरसाटी इसहाक याकूब उक आशीष कोट्‍टुन अदिक अंदुन: "कि कनानी पोरगोळ से मदा माळबाळेत. 2 लेकीन पद्‍दनराम*28:2 मिसापोटामिया दा तान आजा बतूएल उन मान्‍या होगकु अल तान मामा लाबान उन ऊंद पोर इक हिंग्स माळ कोमेत. 3 सर्वशक्तिमान परमेश्वर नीनी आशीष कोळुल, अदिक फलवंत माळकु नीनी वाळुसुल, अदिक नी राज्‍य राज्‍य अन मंडली इन मूल आगुल. 4 परमेश्वर नीनी अद आशीष कोळुल जो अब्राहम उक कोटीदुन, नीनी अदिक नीन वंश इक, आ द्‍याश इक अधिकारी माळुल."✝28:4 उत्पत्ति 17:4-8 5 ई सप्‍पा आशीषित वचन इन सांगुळ इसहाक याकूब उक सार माळदुन. याकूब तान अदिक एसाव इन मोय रिबका अन वार्ट अरामीवासी लाबान इन मान्‍या होटोदुन, जो पद्‍दनराम इन बतूएल अन चिकोर ईरोर.

6 एसाव उक मालूम आगेगीत कि इसहाक याकूब उक आशीष कोटकु पद्‍दनराम क्षेत्र दा कळुदुन ताकी आव तान साटी हिंग्‍स नीवळुसुल, अदिक आदेश भी कोट्‍टुन कि आव कनानी आर्त इन से मदा माळबाळुल, 7 अदिक याकूब तान आप्‍प अदिक मोय इन मात इक मान्सतेला पद्‍दनराम दा होटोदुन. 8 आग एसाव उक ईद समझ दा होट्‍ट बत्‍त, कि आऊन आप्‍प इसहाक कनान द्‍याश इन पोरगोळ पसंद हैलेच. 9 इदुरसाटी एसाव तान हिंग्‍स उन अलावा अब्राहम उन पार इश्‍माएल इन पोर माहालाथ से, जो नबायोत इन आकतींग ईरोर, मदा माळ कोंडुन.

10 याकूब बेर्शेबा से होटकु हारान इन दी होदुन. 11 अदिक आव ऊंद जागा दा पोहचुस्कु ईळ्‍ल्‍क अल्‍या कढोद विचार माळदुन, यतिकी सुर्य मुळकेगीत; इदुरसाटी आव आ जागा अन कल्‍लगोळ दा टु ऊंद कल्‍ल हुडुकु तान ऊसा माळकु ईटदुन, अदिक अदा जागा दा मींगेदुन. 12 आग आव कांन्‍सा दा येन नोळदुन, कि ऊंद सीळी पृथ्‍वी मा नीदुरकु आद, अदिक अदुर स्‍यांडा स्‍वर्ग ताका पोहचुस्कु आद; अदिक परमेश्वर उन दूतगोळ अदुर मा येरतार अदिक ईळुतार.✝28:12 यूहन्ना 1:51 13 अदिक यहोवा अदुर म्‍याकुच निदुरकु अनतान, "ना यहोवा, नीन आजा अब्राहम उन परमेश्वर, अदिक इसहाक उन भी परमेश्वर हुईन; या जागा मा नी मिंगकु आय, अदरी ना नीनी अदिक नीन वंश इक कोळाईन.✝28:13 उत्पत्ति 13; 14; 15 14 अदिक नीन वंश जमीन इन धूळा अन खाळा अन घाई हापाळ आदीत, अदिक पश्‍चिम, पूर्व, उत्‍तर, दक्षिण, नाकु दी फैलुसतेला होदीत: अदिक नीन अदिक नीन वंश इन द्वारा पृथ्‍वी इन सप्‍पा कुल आशीष ताकोंडार.✝28:14 उत्पत्ति 12:3; 22:18 15 अदिक केळ, ना नीन सांगुळ ईराईन, अदिक नी येल्‍यारा भी होगत्‍या अल नीन रक्षा माळाईन, अदिक नीनी ई द्‍याश दा वापस ताराईन: ना तान अंदुर इक पुरा माळ कोमालीन आगासताका नीनी बिळतीदील."

16 आग याकूब येद्‍दुन, अदिक अनली कुरतुन, "सही दा ई जागा दा यहोवा आन; अदिक ना ई मात इक ईला जानसीन." 17 अदिक अंजकु आव अंदुन, "ईद जागा येन ईद भयानक आद! ईद रा परमेश्वर उन भवन उक बीळ अदिक येनु आगसकाल; बल्‍की ईद स्‍वर्ग इन फाटक अच आगीदाद."

18 व्‍हातर्याका याकूब येद्‍दुन, अदिक तान ऊसा अन कल्‍ल हुडुकु अदुर्द खंबा नीदरूसदुन, अदिक आव अदुर ताल्‍ला मा याण्‍णा हाक्‍क कोंडुन. 19 अदिक आव आ जागा अन हेसुर बेतेल*28:19 परमेश्वर उन भवन ईटदुन; लेकीन आ नगर इन हेसुर पयले लूज ईरोद. 20 याकूब ईद मन्नत ताकोंडुन, "अगर परमेश्वर नान सांगुळ ईतकु ई यात्रा दा नान रक्षा माळुल, अदिक नानी तीनोर साटी रोट्‍टी, अदिक हाक्‍कोर साटी कपळा कोळुल, 21 अदिक नानी नान आप्‍प उन मान्‍ना ताका सुरक्षित पोहचुस्‍यान, यहोवा अच नान परमेश्वर आदान. 22 ईद कल्‍ल, यदरी ना खंबा माळकु निदरूसीन, परमेश्वर उन मान्‍ना आदीत अदिक नी जो येनारा नानी कोट्या, सही दा : ना अदुर्द दशमांश नीन इच कोळाईन."