Dan 1

danyal d eSSuHHebes letlaθe g elqSer n babel

1 g usukkes eθθaleθ seg elHukm n yuwyaqiym elmlek n yehuwδa, yuli nebuwxeδneSSer elmlek n babel y uwrceliym yHeSert. 2 yuwc erreb y ifesnes yuwyaqiym elmlek n yehuwδa d lebHaD seg elmeεεuwn n elHuwc n rebbi, yaγeδ elmlek n babel elmeεεuwn y elqeεεeθes ysuwδef elmeεεuwn y θexzent n elHuwc n errebbes. 3 yen elmlek y emeqqar n ixeddemnes, w esmiθes ecfenezu, esedyaγ leεbaδ seg bni israYiyl elεileθ n elmlek d imeqqaren, 4 elεzerre w eddiysen Hette elεiyb, elmenDrensen yebhe, essenen elHekmaθ elkul, w fehmen kul cey, elli e tgedden exeδmen g elqSer n elmlek, usinc entiseHfeD ecfenezu elqrayeθ n ibebiliyyen d elluγθensen. 5 yegeyasen elmlek elHeSSeθ n kul yuwm, seg eče n elmlek d ecrebes, bac e mrebben tlaθe sniyn, w beεεeδ exeδmen elmlek. 6 w ykan essisen seg bni yehuwδa, danyal d Henenya d miycaYiyl d εezerya.