1 Aŋ wääna nääŋkä yaakki baakkene ye, Abrayiim puuci Jooŋ, aŋ kiinne ogo, "Ay Abrayiim!"

Aŋ Abrayiim luukcin ogo, "Haa, ika inni."

2 Aŋ Jooŋ jaajjin ogo, "Minneni yüünü yaana a dune bilgä battä me ogo Icaak yaanna koowu, aŋ atä baan battä me ogo Müürïya. Aŋ aajjii kä pääm yaana bi nüütenii kä ye wic, aŋ eräpok dalä ïïl a yen wäämmä yok."

3 Aŋ Abrayiim juwin kä tïṇṇäŋänä, aŋ tüürüŋ yeene kooññe. Aŋ bäägin jengä yek ïïllä wäämmä yok. Aŋ kuññu kiinkä yeeke ti kä yewwe, ke minneni yeene Icaak. Aŋ attä kä päy nänṭ’a nüütene daa Jooŋ ye. 4 Aŋ nïïnnä ḍäk ti Abrayiim wiñe äärene ñaalok, aŋ nänṭä yooṭṭe kä utar. 5 Aŋ Abrayiim kiinkä yeeke kiinne ogo, "Cääye winni ke tüürüŋ, dale ikoon aton mäṭon Jooŋ ke minneni, aŋ ikoon ḍuukon ikee ti."

6 Aŋ Abrayiim kuññu jengä ïïllä wäämmä yok, aŋ äcce minneni yeene Icaak ŋäñe ti, i ädit maañ kä päṭäkay ke cïcam ïṇte ti, aŋ attä muuṭuk. 7 Aŋ Icaak wäyen Abrayiim bärkene ogo, "Abba!"

Aŋ luugi wäyen ogo, "Haa, minneni yeeni."

Aŋ taaji Icaak ogo, "Jengä ke maañ ikki, aŋ wali kabal yaana erï puuggin ïïlï a yen wäämmä yok ye?"

8 Aŋ luugi Abrayiim ogo, "Minneni yeeni, Jooŋ kä ḍoŋe bi ükcï kabal yaana erï puuggin ïïlï a yen wäämmä yok ye." Aŋ iken attä muuṭuk nänṭä keellä.

9 Aŋ wääna ḍakkene ti nänṭ’a nüütene daa Jooŋ ye, Abrayiim bättä tambal wïca, aŋ jengä tooṇṇe, aŋ minneni yeene Icaak ḍiiŋŋe, aŋ maaṭṭe ñaalok jengä witin tambal wic. 10 Aŋ Abrayiim ïṇte lajjene, aŋ cïcam koowne irtee kä pok minneni yeene.

11 Aŋ malak yen Pïṭo ike yääwi kä polloŋ jïnä ogo, "Abrayiim, Abrayiim!"

Aŋ luukke ogo, "Haa, ika inni."

12 Aŋ malak jaajjin ogo, "Ïṇtü ŋana ïccïdï woo minneni ti, aŋ ŋana naŋdä nääŋkalaŋ. Ïkï ŋïññeni tiññaŋ ïkï booju kä Jooŋ, ika batta agja kä ṭïïkon kä minneni yüünü yaana kä keelok yaanna."

13 Aŋ Abrayiim wiñe äärene ñaalok däämjin, aŋ yurcin kabal yaane mooye ŋäñe ti a mükon kä jengä kä ṭuŋke waadgen gïtï. Aŋ attä kabal müŋŋe erre pok a yen ïïllä wäämmä yok rättee kä yok minneni yeene. 14 Aŋ Abrayiim nänṭä yaanja äkkene ogo Pïṭo bi ïccï. Aŋ ke tiññaŋ battä me ogo, "Pïṭo bi ïccï pääm yeene wic."

15 Aŋ Abrayiim ŋoci yääwi malak yen Pïṭo kä polloŋ jïnä. 16 Aŋ jaajjin ogo, "Pïṭo jääyïdï ogo, ‘Ika lïïttä kä ḍoŋi kä yaana näŋŋii kä nääŋkä yaakka, aŋ ika batta agja kä ṭïïkon kä minneni yüünü yaana a dune yaanna, 17 ïkï bi ŋüülkeni, aŋ kaaynä yüükü bi ḍirä kä yaac, bata kirkä polloŋ jïñe ke ṭiŋal yek wii jïñe. Aŋ kaaynä yüükü bi bänkä ädäŋŋi mükü. 18 Aŋ kä päy kaaynä yüükü ṭoŋ muureen bi a ŋüülkïnï ŋommañ wic nääŋka tiiŋganaa kä jiik ye.’"

19 Aŋ wäättan Abrayiimmä ḍukcin kiinkä yeeken ti, aŋ juwin attä ke iken jïïn yaana battä me ogo Bïïrcïba*22.19 Bïïrcïba aŋ aŋan ogo Jïïn Lïïttäŋ kä lemmä mä Iburu. ye ti, aŋ Abrayiimmä cääygin wïca.

20 Aŋ wääna yaakka ti muure ye, Abrayiim nüütkï me ogo, "Määdic Nahüür gitki Maalka merkä. 21 Kaygon battä me ogo Üüc, aŋ määden a Büüc, ke Gamuweel Aaraam wäyen, 22 ke Kaacit, ke Hajju, ke Pïldaac, ke Yaldaap, ke Batüwïïl." 23 Aŋ Batüwïïl gittä Rïpga. Aŋ Maalka merkä yaaka kä cunuuk yaakka gitkene Nahüür Abrayiim määden. 24 Aŋ kiingon iiŋe yeene yaana battä me ogo Ruhuma ye, cäänna ike gitki merkä oogen, aŋ yäṇtäŋgenen ogo, Taabaa ke Jaam ke Taac ke Maakkaa.