Gênesis 37

Lääggï Yuucip

1 Aŋ wïca Yaagüüp ŋuccin cääynä ŋommañ mä Kanaan ti nänṭ’a cääynene kä wäyen bata boorgon ye.

2 A perrä yen kaaynä Yaagüüp ikki. Yuucip a minneni oone cääygene yuungu kä caay witken kä ŋaṭükel, i kääjï ḍiik ke merkä yek määngä wäyen Bila ke Jïlpa. Aŋ Yuucip wäyen äckene jiik yaackä kä nääŋk’a naŋtä mädgen yejgaŋ ye.

3 Aŋ Yaagüüp Yuucip ken bilge kä yaac kä mädgen, nääŋka ike agee minneni yen ḍüŋkïtïn yeene ye, aŋ näŋgene burŋu ŋerrä. 4 Aŋ wääna mädgen muure yuṭṭene ike bilgene daa wäyen kä yaac kä iken ye, putki jï kä yaac, aŋ batta jääckätä kä jon ñammä.

5 Aŋ Yuucip cääyge lääggï aŋ wääna päkkeneeda mädgen ye, i ike putki jï kä yaac. 6 Aŋ kiinne ogo, "Tiiŋe lääggï yaaka läkkä kä yaakki. 7 Ïkïïn müürïnaan cääyïn yiil jï ḍïïkïn päk witken aŋ wääna ḍeggon yeeni yuutte ñaalok ye, yeekic muure witken ḍüülï ti yeeni ti, aŋ ḍüŋjïn ïñï yeeni ti."

8 Aŋ taaji mädgen ogo, "Ïkï ḍuucu ogo ïkï bi wäätcey ogo yätkä yoono aŋ ikoon mügdonda?" Aŋ putki jï mädgen kä yaac kä lääggï ke jiik yeeke.

9 Aŋ Yuucip läkkä lääggï yakkalaŋ aŋ nüütkene mädgen aŋ jaajjin ogo, "Tiiŋe ika läkkä lääggï yakkalaŋ. Äŋ ke paan ke kirkä kä caay wiñen kä keelok ḍüŋjïn ïñï ika ti."

10 Aŋ wääna nüütkeneeda wäyen ke mädgen ye, ike geri wäyen aŋ kiinne ogo, "A lääggï yaaka wali ye ika läkkii kä yaakka? Ïkï paydä ogo ika ke miic ke mädgic äätoon aŋ ḍüŋjoon ïñï ïkï ti?" 11 Aŋ mämgï jï mädgen aŋ wäyen jiik yaakka tïïññe jone ti.

Yääjjin woo Yuucip

12 Aŋ mädgen attä kääjï ḍiik wäyen Cakïïm kä cokal. 13 Aŋ Yaagüüp Yuucip kiinne ogo, "Ika ṭäkä ïkï atä Cakïïm nänṭä yaana kääjene mädgic ḍiik ye."

Aŋ luugi Yuucip ogo, "Ŋeraŋ wäyo."

14 Aŋ kiini wäyen ogo, "Atä tiññaaŋŋi naana iken ke ḍiik cäyok ṭeṭaŋ ye, i ḍuuku aŋ nüütkaa jiik." Aŋ tucce woo ḍääñgon yen mä Hiburoon jï nänṭ’a cääyene kä ye, aŋ ike attä Cakïïm.

15 Aŋ kañi oon yaŋkalaŋ wiñe a ḍïïktïnï woo käpet, aŋ taaji oon ogo, "Ïkï määjä ŋaaka?"

16 Aŋ luuŋŋe ogo, "Ika määjä mädgo. Kura nüütkaa nänṭä yaana kääjene kä ḍiik ye."

17 Aŋ oon jaajjin ogo, "Iken baŋŋä, iken tiiŋŋä jayok ogo, ‘Juwe atïn Duutaan.’" Aŋ Yuucip bäätcin mädgen ti, aŋ kaññe Duutaan.

18 Aŋ yooṭi kä utar, aŋ i batta mor ḍägä ti iken ti kä cokal, iken lääljin pugin ogo nägjï ḍok.

19 Aŋ iken luugjin pääken ogo, "Yooṭe män lääggï ïya äätä. 20 Juwe näkïn ḍok aŋ yeepïn ïñï jïïn kalaŋ jï, aŋ ïkïïn jaaccïn ogo ammïï gin kurkuŋgu yaŋkalaŋ. Aŋ ïkïïn bi yüṭïn a ŋaaka ken bi äbänä lääggï yeeke."

21 Aŋ wääna Robïïn tiiŋŋee kä aŋan ye, ike puccin ogo Yuucip määgee woo aŋ jaajjin ogo, "Ŋana näkïn ḍok." 22 Aŋ Robïïn jaajjin ogo, "Ŋana yïmge püükïtïn woo, ääte yeepïn jïïdük woo teettälaŋ winni, ŋana ïnko äccïtïn ike ti." Aŋ Robïïn jaajjin kä waŋ kä yaana ṭäkee määgedeeda woo iken ti, aŋ tuceeda ŋäjäk wäyen ti ye.

23 Aŋ wääna Yuucip ḍäägenee kä ti mädgen ti ye, i gütï yokïn woo kä burŋu yaana ŋeraŋ eŋde yaanna. 24 Aŋ koowi aŋ yeepi jïïdük. Aŋ jïïn jïñe a ïwon kä piik. 25 Aŋ wääna cääjjene ïñï ämene kä ye, iken däämjin woo aŋ yurcin yääjoni a yek mä Icämayiil ätä ŋommañ mä Jïlaat ti, ke kälämgä yeeken ḍürït ḍuk yaaka a päkkiṇṇi ye ke yek pïlkä icä Macïr.

26 Aŋ Yahüüja mädgen taaññe ogo, "A ŋaaka ken bi kañïn naana määdo näŋŋïn ḍok ye, aŋ yïmge paannïn yokïn ye? 27 Juwe yääckïn mä Icämayiil, aŋ ïnko ŋana äccïtïn ike ti, ike a määdo aŋ a yïmgä yooko." Aŋ Yahüüja tiiŋgi mädgen.

28 Aŋ wääna yääjoni yek mä Icämayiil*37.28 mä Icämayiil ke mä Mïdïyaan a mä keelkä ken battä me aŋan. kaajdene kä ye, i Yuucip äbi woo mädgen jïïdük, aŋ yääjgi mä Icämayiil tiilgä gälkä waŋgen caykä kä yew. Aŋ Yuucip iji Macïr.

29 Aŋ wääna Robïïn ḍukcenee kä jïïdük, aŋ Yuucip batta agee kä kañgon kä ye, ike buruŋgu yeeke jiiññe gïtï kä nüüjdüŋ. 30 Aŋ ḍukcin mädgen ti, aŋ kiinne ogo, "Yuucip baati jïïdük, aŋ ika bi näŋjä ogoo?"

31 Aŋ iken burŋu Yuucip koowi aŋ iṭṭä ñooŋ, aŋ burŋu büücï ti yïmgä gïtï. 32 Aŋ iken burŋu ŋerrä äcki wäyen aŋ kiini ogo, "Yooru gin’a kaññon ye. Yaanni batta a burŋu yen minneni yüünü?"

33 Aŋ ŋïjï Yaagüüp, aŋ jaajjin ogo, "A burŋu minneni yeeni. A amgon kä gin kurkuŋgu yaajgonḍe yaŋkalaŋ. Minneni yeeni jiijtin gïtï aŋŋa pïlkä." 34 Aŋ Yaagüüp buruŋgu yeeke jiiññe gïtï aŋ iiŋcin cuukul teye ti nüütï nüüjdüŋ yeene, aŋ nüüññü kä minneni yeene nïïnkä kä ḍiräk. 35 Aŋ merkä yeeke oogen ke ṭulgu yeeke äätin ike lüüytü jok, aŋ ike yaakkä kä lüüynü jok, aŋ jaajjin ogo, "U’u ika bi ceeñä kä nüüjdüŋ ke ḍakä ti minneni yeeni ti käälok." Aŋ wäyen weeŋŋä kä ike kä yaac.

36 Aŋ wina mä Icämayiil Yuucip yääjgi Poṭïpaar Macïr. Ike a ḍuuŋgon kääygä yen yätkä Parahuun yaana a ḍuuŋgon tïïconi ye.