1 ପାଉଲ୍ ନୁ ଶୀଲା ଆମ୍ପିପଲି ନୁ ଆପଲ୍ଲୋନିଆ ଇସ୍‌ ଥେସଲନିକୀତାଗ୍ ୱାତ୍‍ତଡ଼୍ । ଆଗେ ଅଣ୍ଡୟ୍‌ ଇହୁଦୀ ଉପାସନା ମାତ୍‍ତେ । 2 ପାଉଲ୍ ତାନ୍ ଦର୍ମଶାସ୍ତ୍ର ଲେକାମ୍ ଗୁଡ଼୍‍ୟିତାଗ୍ ଆତ୍‍ତଣ୍ଡ୍ । ଆଗେ ମୁଣ୍ଡ୍ ବିଶ୍ରାମ୍‍ବାର୍‍ତେ ନାରୁଡ଼୍ ତଡ଼୍ ଅଣ୍ଡ୍‌ ଆଲୋଚନା ମାଡ଼୍‍ତଣ୍ଡ୍, 3 ଦର୍ମଶାସ୍ତ୍ର ଉଲ୍ଲେଖ ନୁ ବାକ୍ୟା ମାଡ଼ି ପ୍ରମାଣ୍ ମାଡ଼୍‍ତଣ୍ଡ୍ ଯେ, ମସୀହ ଦୁକାମ୍‍ ବୋଗ୍ ଆଦାନାଦ୍ ନୁ ଡଲ୍‍ତାଗାଙ୍କ୍ ତେଏଦାନାଦ୍ ଦର୍‍କାର୍ ମାତ୍‍ତେ । ପାଉଲ୍ କେତ୍‍ତଣ୍ଡ୍, "ବେନ୍ ଜିସୁନ୍ ବିଷୟ୍ ନାନ୍‍ନେ ଗଷନା ମାଡ଼୍‍ତାନ୍, ଅଣ୍ଡ୍‌ ଆ ମସିହ ।" 4 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇଦ୍ ବିଶ୍ୱାସ୍‍ ପାଉଲ୍ ନୁ ଶୀଲା ତଡ଼୍ କାଇଲ୍‍ତଡ଼୍; ଆଦେପୁଟୁଙ୍କ୍ ନାର୍‍ଗେ ବାଡ଼୍‍ୟେ ନାଟାଙ୍କ୍ ନୁ ଇଶ୍ୱର୍‌ତିଙ୍କ୍ ଉପାସନା ମାଡ଼ାନ୍‍ ଗ୍ରୀକ୍‍ନାରୁଡ଼ାଦ୍‍ ଅଣ୍ଡୟ୍‌ ବେଡ଼୍‍ୟାଦ୍‍ ମାନ୍ଦେ ମିକା ଅଡ଼୍‌ ତଡ଼୍ କାଇଲ୍‍ତେ ।

5 ଇତ୍‍କେ ଇହୁଦୀଡ଼୍ ଇର୍ଷା ମାଡ଼୍‍ତଡ଼୍ ନୁ ବେସ୍‍କ୍‍ତୁଡ଼୍‍ କାରାପ୍ ନାରୁଡ଼୍‍କିଂଙ୍କ୍ ଅଣ୍ଡୟାଗେ ମାଡ଼ି ସାରେ ଟାୱୁନ୍‍ତାଗ୍ ଗୋଲ୍‍କ୍ ମାଡ଼୍‍ତଡ଼୍ । ଅଡ଼୍‌ ପାଉଲ୍ ନୁ ଶୀଲାଙ୍କ୍ ମେହେକି ନାରୁଡ଼୍ ମୁନ୍‍ନେ ତାତାନ୍ ମାଇଦିଙ୍କ୍ ଯେସନ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁନ୍ ଲନ୍‍ ତିଙ୍କ୍ ଆଞ୍ଜ୍ ଚିଟିରମନ୍‍ ମାଡ଼୍‍ତଡ଼୍ । 6 ଇତ୍‍କେ ଆଗେ ପାଉଲ୍ ନୁ ଶୀଲା ଦର୍‍କ୍‍ୱାଙ୍କ୍, ଅଡ଼୍‌ ଯେସନ୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ବିଶ୍ୱାସୀଡ଼୍‍କ୍ ନଗର୍‍ତେ ଶାସନ୍‍ କର୍ତ୍ତାନ୍ ବକେତ୍ ପିଡ଼୍‍ଙ୍ଗି ଆସ୍ ଗାଟି ଲେଙ୍ଗ୍‍ଦେ କେତ୍‍ତଡ଼୍, "ଇଡ଼୍ ନାରୁଡ଼୍ ଜଗତ୍‍ ସାରେଏକାମ୍ ଗୋଲ୍‍କ୍ ମାଡ଼ୁତଡ଼୍ ! ଇଞ୍ଜେ ଅଡ଼୍‌ ମାନ୍‍ ଟାୱୁନ୍‍ତାଗ୍ ୱାତ୍‍ତଡ଼୍, 7 ମେଣ୍ଡେ ଯେସନ୍ ଅଡ଼୍‌‍କିଂଙ୍କ୍ ତାମ୍ ଲୋନ୍‌ ନେଃଏତଣ୍ଡ୍ । ଜିସୁ ପେଦେର୍‍ତେ ମେଣ୍ଡେ ୱେରଣ୍ଡ୍ ରାଜାଲ୍ ମିନ୍ଦେଣ୍ଡ୍ ଇଞ୍ଜ କେସ୍ ଅଡ଼୍‌ କାଇସର୍‍ ମହାରାଜା ତେ ସାରେ ନିୟମ୍‍ତିଙ୍କ୍ ବିରୁଦ୍‍ ମାଡ଼ୁତଡ଼୍ ।" 8 ଇଦ୍ ଗଟ୍ କେସ୍ ଅଡ଼୍‌ ନାରୁଡ଼୍ ନୁ ଶାସନ୍‍ କର୍ତ୍ତାଲ୍ଡ଼୍‍ ଲୋପେ ଗାଟି କପାମ୍ ନୁ ଗଲ୍‍କ୍ ମାଡ଼୍‍ତଡ଼୍ । 9 ଶାସନ୍‍ କର୍ତ୍ତାଲଡ଼୍ ଯେସନ୍ ନୁ ବିଶ୍ୱସୀଡ଼ାଗାଙ୍କ୍ ଡାବ୍‍କ୍ ଆସ୍ ଅଡ଼୍‌‍କିଂଙ୍କ୍ ଜାମିନ୍*୧୭:୯ ମେଣ୍ଡେଅନ୍‌‍ଦାମ୍‍ ବୁଲ୍‍ ପାଡ଼୍‍ୟି ମାଡ଼୍‍଼ମାଟ୍‍ ଇଞ୍ଜ ଲେକିମିକା ଇଦାନାଦ୍‍ ମାଡ଼ି ୱିଡ଼୍‍ସିତ୍‍ତଡ଼୍ ।

10 ନାର୍କା ଆତ୍‍ତାଙ୍କ୍ ବିଶ୍ୱାସୀଡ଼୍ ପାଉଲ୍ ନୁ ଶୀଲାଙ୍କ୍ ବେରିଆତାଗ୍ ରହସିତ୍‍ତଡ଼୍ । ଅଡ଼୍‌ ଆଗେ ହେୱୁସ୍ ଇହୁଦୀଡ଼୍‍ ପ୍ରାର୍ତନାତାଗ୍ ଆତ୍‍ତଡ଼୍ । 11 ଥେସଲନିକୀତେ ନାରୁଡ଼ାଗାଙ୍କ୍ ଆଗେତ୍ ନାରୁଡ଼୍ ଅଦିକ୍‌ ଦୟାବାନ୍ ମାତ୍‍ତଡ଼୍ । ଅଡ଼୍‌ ଗାଟି ଆଗ୍ରହତଡ଼୍ ଶିଷ୍ୟଡ଼ାଦ୍ ଶିକ୍ଷା କେଞ୍ଜ୍‍ତଡ଼୍ ନୁ ପାଉଲ୍‍ତାଦ୍ ପାଚ୍ରାମାଡ଼ି ଗଟ୍‍ତେ ସତ୍ ପୁନ୍ଦାନ୍ ମାଇଦିଙ୍କ୍ ଅଡ଼୍‌ ନିତାଲ୍ ଦର୍ମଶାସ୍ତ୍ର କାର୍‍ତଡ଼୍ । 12 ଅଡ଼୍‌ ଲୋପେଙ୍କ୍ ନାର୍‍ଗେ ନାରୁଡ଼୍ ବିଶ୍ୱାସ୍ ମାଡ଼୍‍ତଡ଼୍ । ନାର୍‍ଗେ ଗ୍ରୀକ୍ ନାଟାଙ୍କ୍ ନୁ ଗ୍ରୀକ୍ ନାରୁଡ଼୍ ବିଶ୍ୱାସ୍‍ତଡ଼୍ କାଇଲ୍‍ତଡ଼୍ । 13 ଇତ୍‍କେ ବେସୁଟ୍‌ ଥେସଲନିକୀ ଇହୁଦୀଡ଼୍ କେଞ୍ଜ୍‍ତଡ଼୍ ଯେ ବେରିଆତାଗ୍ ମିକା ପାଉଲ୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ୁତଣ୍ଡ୍, ଅଡ଼୍‌ ଆଗେ ୱାସ୍ ଗଲ୍‍କ୍ ମାଡ଼ାନଙ୍କ୍ ନାରୁଡ଼୍‍କିଂଙ୍କ୍ କେତ୍‍ତଡ଼୍ । 14 ସାଙ୍ଗେ ସାଙ୍ଗେ ବିଶ୍ୱାସୀଡ଼୍ ପାଉଲ୍‍ତିଙ୍କ୍ ଗଦାଡ଼୍‍ତେ ହାଞ୍ଚିନାଗ୍ ରହସିତ୍‍ତଡ଼୍; ଇତ୍‍କେ ଶୀଲା ନୁ ତୀମତି ଇର୍‍ୱୁଡ଼୍ ବେରିଆତାଗ୍ ମାତ୍‍ତଡ଼୍ । 15 ପାଉଲ୍‍ତିଙ୍କ୍ ଅସିସ ମାନ୍ଦାନ୍ ନାରୁଡ଼୍ ଅନ୍‌ ତଡ଼୍ ଆଥେନ୍‍ସ୍ ହେୱୁନା ଆତ୍‍ତଡ଼୍ । ଆଗାଙ୍କ୍ ଅଡ଼୍‌ ବରିଆତାଗ୍ ମାଲ୍‍ସ୍ ଶୀଲା ନୁ ତୀମତିଙ୍କ୍ କେତ୍‍ତଡ଼୍, ଅଡ଼୍‌ ସିଟ୍‍ପାଟ୍ ପାଉଲ୍‍ତଡ଼୍ କାଇଲିଡ଼୍ ଇଞ୍ଜ ପାଉଲ୍ ନିର୍ଦ୍ଦେଶ୍ ହିତ୍‍ତଣ୍ଡ୍ ।

16 ଆଥେନ୍‍ସ୍‍ତାଗ୍ ଶୀଲା ନୁ ତୀମତିଙ୍କ୍ କେପିମାନ୍ଦାନ୍ ୱେଲେ ନଗରୀ ପୁତ୍‍ଲାମ୍‍ ଦେୟାକ୍ ଆତ୍ମାତେ ବର୍ତ୍ତି ଆସ୍ ମାନ୍ଦାନାଦ୍ ଉଡ଼ି ପାଉଲ୍ ଗାଟି କପାମ୍ ଆତ୍‍ତଣ୍ଡ୍ । 17 ଆଦିଙ୍କ୍ ଅଣ୍ଡ୍‌ ସମାଜ୍ ଲୋତ୍‍ତାଗ୍ ଇହୁଦୀଡ଼୍ ତଡ଼୍ ଇଶ୍ୱର୍‌ତିଙ୍କ୍ ଉପାସନା ମାଡ଼ାନ୍ ଅଣଇହୁଦିଡ଼୍ ତଡ଼୍ ଇଦ୍ ବିଷୟ୍‍ତେ ନିତାଲ୍ ଆଲୋଚନା ମାଡ଼ାନଙ୍କ୍ ପସ୍ପ୍‍ତଣ୍ଡ୍ । ସହର୍‍ତେ ଚକକିନାଗ୍ ଆଦାୱାଦା ମାଡ଼ମାନ୍ଦାନ୍ ନାରୁଡ଼୍ ତଡ଼୍ ଆଦେ ବିଷୟ୍ ଆଲୋଚନା ମାଡ଼୍‍ତଣ୍ଡ୍ । 18 ବେସ୍‍କ୍‍ତୁଡ଼୍‍ "ଏପିକ୍ୟୁରିଅନ୍‌ ନୁ ଷ୍ଟୋଇକ୍," ଶିକ୍ଷା ଗୁରୁଡ଼୍‍ତଡ଼୍ ଅନାଦ୍‌ ଯୁକ୍ତିତର୍କ ଆତ୍‍ତେ । ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍, "ଇଣ୍ଡ୍ ମୁର୍କ ବାତ୍ କେତାନଙ୍କ୍ ଆଲ୍‍ସୁତଣ୍ଡ୍ ?" ବାଗାତ୍ ନାରୁଡ଼୍ କେତ୍‍ତଡ଼୍, "ବିଦେଶୀ ଦେୟାକିଙ୍କ୍ ପ୍ରଚାର୍ ମାଡ଼ାନ୍ ଲେକାମ୍ ହେର୍କା ଆଦୁତ୍‍ତେ ।" ଜିସୁ ନୁ ମେଣ୍ଡନ୍‍ଦାମ୍ ପୁନରୁତାନ୍ ଆଦାନ୍‍ ବିଷୟ୍ ସୁସମାଚାର୍‍ ପ୍ରଚାର୍ ମାଡ଼ମାନ୍ଦାନାଦ୍ କେଞ୍ଜି ଅଡ଼୍‌ ଇଦ୍ କେତ୍‍ତଡ଼୍ । 19 ଆଦିଙ୍କ୍ ଅଡ଼୍‌ ପାଉଲ୍‍ତିଙ୍କ୍ ପଇସ୍ ଆତ୍‍ତଡ଼୍ ନୁ ଅଂକିଙ୍କ୍‌ ଏରୀୟପାଗସ୍‍ ମିଟିଙ୍କ୍‍ତାଗ୍ ତାସ୍ କେତ୍‍ତଡ଼୍, "ନିମ୍‍ ବେନ୍ ପୁନାଦ୍ ଶିକ୍ଷା ବିଷୟ୍‍ତେ କେତୁତିନ୍, ଆଦ୍ ବିଷୟ୍ ମାମ୍‍ମେ ପୁନ୍ଦାନଙ୍କ୍ ଇଚ୍ଛା ମାଡ଼ୁତମ୍ । 20 ନିମ୍‍ କେସମାନ୍ଦାନ୍ ବେସ୍‍କେ ଗଟି ମାକିଂଙ୍କ୍ ଆଦ୍‍ବୁତ୍‌ ମାଡ଼ୁତ୍ । ମାମ୍‍ମେ ଆଦିନ୍ ଇତ୍‍କେ ପୁନ୍ଦାନଙ୍କ୍ ଚାଏମ୍‍ ଅଦୁତମ୍ ।" 21 ଆଥେନୀୟତେ ନାରୁଡ଼୍ ନୁ ଆଗେ ବାସେ ମାଡ଼ମାନ୍ଦାନ୍ ବିଦେଶୀଡ଼୍ ପୁନାଦ୍ ବିଷୟ୍ କେଞ୍ଜାନଙ୍କ୍ ନୁ କେତାନଙ୍କ୍ ଗାଟି ପସନ୍ଦ୍ ମାଡ଼୍‍ତଡ଼୍ । ଇଗେ ଅଡ଼୍‌ ନାର୍‍ଗେ ଜେଲ୍‍ ମାତ୍‍ତଡ଼୍ ।

22 ପାଉଲ୍ ମିଟିଙ୍ଗ୍‍ତେ ମୁନ୍‍ନେ ନିସ୍ କେତ୍‍ତଣ୍ଡ୍, "ଆଥେନୀୟ ନାରୁଡ଼୍, ମିଡ଼୍ ସାରେତଡ଼୍ ଗାଟି ଦାର୍ମିକ୍ ଇଞ୍ଜ ହାଲ୍‍ସୁତାନ୍ । 23 ନାନ୍ ମିୟାଦ୍ ନଗର୍‍ତାଗ୍ ଉଡାନ୍‍ୱେଲେ ମିୱାଦ୍ ପୂଜା ମାଡ଼ାନ୍ ଜାଗେତିଙ୍କ୍ ଉଡ଼୍‍ତାନ୍ । ଅଣ୍ଡୟ୍‌ ଜଜ୍ଞବେଦିତ୍ ପର୍‍ର ‘ଅଣ୍ଡୟ୍‌ ପୁନ୍‍ୱାଦ୍ ଇଶ୍ୱର୍‌ତେ ଉଦ୍ଦେଶ୍ୟତେ,’ ଲେକିମାନ୍ଦାନାଦ୍ ଗାଲା ଉଡ଼୍‍ତାନ୍ । ମିଡ଼୍ ପୁନ୍‍ୱେକନ୍‍ସ୍ ବେନଙ୍କ୍ ପୂଜା ମାଡ଼ୁତିଡ଼୍, ଇଞ୍ଜେ ଅନାଦ୍‌ ଗଟ୍ ମିକିଂଙ୍କ୍‍ କେତୁତାନ୍ । 24 ✝୧୭:୨୪ ପ୍ରେରିତ ୭:୪୮.ଇଶ୍ୱର୍ ଜଗତ୍ ନୁ ଆଗେ ମାନ୍ଦାନ୍ ସାରେ ଜିନିଷ୍ ତିଆର୍ ମାଡ଼୍‍ତଣ୍ଡ୍ । ଅଣ୍ଡ୍‌ ସ୍ୱର୍ଗ ନୁ ପୃତିବିତେ ପ୍ରବୁ । ନାରୁଡ଼୍ କାୟ୍‍ଦେ ତିଆର୍ ମାଡ଼୍‍ତେ ମନ୍ଦିର୍‍ତାଗ୍ ଅଣ୍ଡ୍‌ ବାସେ ମାଡ଼ଣ୍ଡ୍ । 25 ମାନାଡ଼୍ ପାଡ଼୍‍ୟି ମାଡ଼ି ଅଂକିଙ୍କ୍‌ ହିଦାନ୍ ଲେକାମ୍ ବାତ୍ ସୁସ୍ଥ ଆଦାଙ୍କ୍ ଅଣ୍ଡ୍‌ ଇଚ୍ଛା ମାଡ଼ଣ୍ଡ୍; ବାତେଙ୍କ୍ଇତ୍‍କେ ଅଣ୍ଡ୍‌ ସାରେତଡ଼୍‌କିଂଙ୍କ୍ ଜିୱୁଣ୍ଡ୍, ନେସ୍କାନାଲ୍‌ଦ୍ ନୁ ସାରେ ଦର୍‍କାର୍ ଜିନିଷ୍ ହିତ୍‍ତଣ୍ଡ୍ । 26 ୱେରଣ୍ଡ୍ ନାରୁଣ୍ଡ୍‍ତାଗାଙ୍କ୍ ଅଣ୍ଡ୍‌ ସାରେ ନାରୁଡ଼୍ ଜାତ୍‍ତିଙ୍କ୍ ତିଆର୍ ମାଡ଼୍‍ତଣ୍ଡ୍ ନୁ ଅନାଦ୍‌ ନିର୍ଦ୍ଦେଶ୍‍ତେ ଅଡ଼୍‌ ପୃତିବିତାଗ୍ ୱେକ୍ ୱେକ୍ ନାର୍‍କିନାଗ୍ ବାସେ ମାଡ଼ୁତଡ଼୍ । ବେନ୍ ସମୟ୍‍ତେ, ବେନ ବେଗେ ବାସେ ମାଡ଼ିତନ୍, ମୁନେତ୍‍କେ ଇଶ୍ୱର୍ ଆଦ୍ ତିଆର୍ ମାଡ଼୍‍ତଣ୍ଡ୍ । 27 ଅନ୍‌‍ୱାଦ୍ ଉଦେଶ୍ୟ ମାତ୍‍ତେ, ସାରେତଡ଼୍ ବେଲା ଅଂକିଙ୍କ୍‌ ମେହେକି ଅଂକିଙ୍କ୍‌ ଦର୍‍ସ୍କିତଡ଼୍‍ । ଇତ୍‍କେବା ଇଶ୍ୱର୍ ବେନନାଗାଙ୍କ୍ ଜେକେ ଇଲାଣ୍ଡ୍ ।" 28 ଇଦ୍ ବିଷୟ୍‍ତେ ବେନ ୱେରଣ୍ଡ୍ କେତୁତଣ୍ଡ୍, "ଅନାଗେ ମାୱାଦ୍ ଜିୱୁନ୍‍ତାଦ୍ ବାଦ୍‍କାନାଦ୍‍, ଉଡାନାଦ୍‍ ନୁ ମାନ୍ଦାନାଦ୍‍ ମିନ୍ଦେ ।" ମିଇ କବିଡ଼ାଗାଙ୍କ୍ ବେସ୍‍କ୍‍ତୁଡ଼୍‍ କେତୁତଡ଼୍, "ମାମ୍‍ମେ ଗାଲା ଅନ୍‌ ମାର୍‍କ୍ ।" 29 ମାମ୍‍ମେ ଇଶ୍ୱର୍‌ତେ ମାର୍‍କ୍ ଆସ୍ ମାନ୍ଦାନ୍ ମାଇଦିଙ୍କ୍ ନାରୁଡ଼୍ ତିଆର୍ ମାଡ଼୍‍ତେ ସୁନା, ରୁପା ବା କାଲ୍‍ତଡ଼୍ ତିଆର୍ ଆତ୍‍ତେ ପୁତ୍‍ଲାମ୍‍ ଲେକେମ୍ ଇଶ୍ୱର୍‌ତେ ପୁଟୁଙ୍କ୍ ହାଲ୍‍ସାଙ୍କ୍‍ ପାର୍‍ୱାଡ଼୍‍ । 30 ନାରୁଡ଼୍ ଇଶ୍ୱର୍‌ତିଙ୍କ୍ ପୁନ୍‍ୱେ ୱେଲେ ଅଣ୍ଡ୍‌ ଦଷ୍ ପୟ୍‍ୱେ ମାତ୍‍ତଣ୍ଡ୍, ଇତ୍‍କେ ଇଞ୍ଜେ ସାରେତଡ଼୍‍ ଅନୁତାପ ମାଡ଼ି ଅଡ଼ାଦ୍‌ ପାପାମ୍‍ ହାର୍‍ତାଗାଙ୍କ୍ ମାଲ୍‍ଦାନ୍ ମାଇଦିଙ୍କ୍ ଗଟ୍ ଇଦୁତଣ୍ଡ୍ । 31 ଅଣ୍ଡ୍‌ ଅଣ୍ଡୟ୍‌ ଦିନ୍ ହେଞ୍ଚ୍‍ତଣ୍ଡ୍ । ଆଦ୍ ଦିନ୍ ଅଣ୍ଡ୍‌ ତାନ୍ ହେଞ୍ଚ୍‍ତେ ନାରୁନ୍ ତଡ଼୍ ସାରେ ଜଗତ୍‍ ତାଦ୍ ନ୍ୟାୟ ବିଚାର୍ ମାଡ଼ିତନ୍ । ଆ ନାରୁଙ୍କ୍ ପୁନର୍ଜିବୀତ୍ ମାଡ଼ାନ୍ ତଡ଼୍ ଅଣ୍ଡ୍‌ ଇଦ୍ ଗଟ୍‍ତାଦ୍ ସତ୍‍ ସାରେତଡ଼୍‌କିଂଙ୍କ୍ କେସ୍‍ମିନ୍ଦେଣ୍ଡ୍ ।

32 ପାଉଲ୍‍ତାଗାଙ୍କ୍ ପୁନରୁତାନ୍ ବିଷୟ୍ କେଞ୍ଜି ଅଡ଼୍‌ ଲୋପେ ବେସ୍‍କ୍‍ତୁଡ଼୍‍ ଅଂକିଙ୍କ୍‌ ପାସ୍କ୍‍ତଡ଼୍, ବାତେଙ୍କ୍ଇତ୍‍କେ ବାଗାତ୍ ନାରୁଡ଼୍ କେତ୍‍ତଡ଼୍, "ନିୟାଗାଙ୍କ୍ ମାମ୍‍ମେ ଇଦ୍ ବିଷୟ୍ ମେଣ୍ଡନ୍‍ନ୍ଦାମ୍ କେଞ୍ଜାନଙ୍କ୍ ଇଚ୍ଛା ମାଡ଼ୁତମ୍ ।" 33 ଆଦ୍‍ନାଣ୍ଡ୍ ମିଟିଙ୍ଗ୍ ତେର୍‍ସ୍‍ପି ପାଉଲ୍ ଦବ୍‍ଆତ୍‍ତଣ୍ଡ୍ । 34 ଡାୟୋନିସିଆସ୍ ପେଦେର୍‍ତେ ମିଟିଙ୍ଗ୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍, ଦାମାରୀ ପେଦେର୍‍ତେ ଅଣ୍ଡୟ୍‌ ନାଟାଡ଼୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ ବିଶ୍ୱାସ୍ ମାଡ଼୍‍ତଡ଼୍ ନୁ ଅନ୍‌ ତଡ଼୍ କାଇଲ୍‍ତଡ଼୍ ।