1 Ana God Israel yoba oglo sugwa ege kade ede magigl u kodugo, Jisas ye yene prukwa i, ye makan kide kodidre, ede ikne Nem moglmara enabuka egemo yomedi pukwa. Prisre, ye yobama makadigle mogl pai meglkwa i, dem muduo podo togwa. Komono kana tomere mere erme ede ikne enagledi erumara te pai moglkwa.

2 Ana igne i yagl kide ye Judas, Saimon Iskariot wam ikra, Jisas i pi kudamo ikne ogono mina yenabedi nomane te kodugo, Jisas ye duglo beglkwa yagl bogl kaya mokna nenamnedi ame di meglkwa.

3 Ana Jisas pre kan erukwa i, Na Nina yobuglo bogl narsre, taragl pra pra na ogona mina yei kodugo, na ama moglka i, na God mina wiga te, erme ede ikne God moglkwa enagliwe di, pre kan erukwa. 4 Ye pre kodumara i mina ye ame di meglmara i, adigl, ye gaglmo olto gugl edidre, taul ta yogwa i pre padigl, 5 ye nigl tau toide dis mina ede, ye duglo beglkwa yagl kaglno nigl kogl togwa. Nigl kogl tedre, ye taul pre paduglkwa i mina nigl koko ede te ugwa.

6 Ana Jisas kaglno nigl kogl te, u Saimon Pita moglmara ugwa igne, Pita mane di pre, Yagl Kade yo, ene na kaglna nigl koratno? dugwa. 7 Dugo, Jisas di ikne ede te, yegl dugwa, Ene na siragl erme erika i, ene pre pogl sikre diniba okuo pre kan eratniwe dugwa. 8 Yegl dugo, Pita di ikne ede, Ene erme mo okuo mo kaglna nigl koratnga i, pra we dikragliwe dugwa. Yegl dugo, Jisas di ikne ede, Ene kagln ta nigl koglkribo, nono akie ta si dakagl moglkrabuluwe dugwa. 9 Yegl dugo, Saimon Pita prisre, Yagl Kade yo, yegl panan, ene na kaglna keme nigl edekre, ogona ya bitna ama nigl pai naro! dugwa. 10 Yegl dugo, Jisas ye yegl di togwa, Yoba nigl mudu pai kodigwa i, ye ta ogono nagino mudu panaiglkwa i ta paikrukwa. Kaglno keme keglbi, deglbi yekraiglmiwe dugwa. Ene pra pra meglkwa i, ene mudu deglbi yeikrikwa ba ene pra pra pre dikriwe di, Jisas yegl dugwa. 11 Jisas ere mogl, Ene pra pra pre ta dikriwe dugwa i, yoba ira ta ye i pi kudamo ikne ogono mina yenabuka i, ye pre kan ere kodidre, dugwa.

12 Ana Jisas mudu kaglno nigl kogl kodidre, ye gaglmo olto aglke ede ikne edidre, u agaimo yomara ame di moglsre, ye kira pogl di prukwa, Na siragl mere erme ere teiga i, ene pre kan pogl simo? 13 Ene na Tisa moglmiwe didre, Yaglno Kade moglmiwe digwa i, na kaima yegl moglka pre aglau ere ta dikrimiwa. 14 Yegl paugwa pre na Yaglno Kade moglsre, Tisano moglsre, erika ba na mogl atne ede, kaglno nigl ediga panan, ene ama mogl atne edidre, kaglno ikne ikne nigl koraiglkwa tenaiglkwa paugwa. 15 Ere teimere yegl mere duglo boglsre, erio dugwa.

16 Jisas yegl didre, ama yegl dugwa, Na ene ka kaima di teiga, Nigl kogon yoba ta mogl mitna ede, ye yaglmo kade egre atne edekrabuka. Te, dedugwa yoba ta morabuka i, ye yoba ta ye kogon dedugwa i, ama egre atne edekrabuka. Atne morabuka. 17 Ene mabuno i, pre kan ere, duglo beglbi, God ene ere wakai ere tenan, gun yenaiglmiwe dugwa.

18 Na ene ka yegl mere di teiga i, ene mudu pre ta dikrika ba na yoba ira ta kere iga i, na pre kan erika. Ba taragl ta plau dinabuka i, God kamo okna beglkwa i, pai inabedi plau dinabuka. God kamo mina beglkwa i, yegl beglkwa, Yoba ta na bogl akie bret nobuglka i, ye na egragledi ye kagle ake mitna edumiwe* dugwa. 19 Taragl i, plau dikrukwa igne, eglke kana pai moglko, di teiga i, plau dinan, ene pre ikne edidre, na God Kere Yugwa Yagl moglmedi pre medraiglmedi prika.

20 Na ene ka kaima di teiga, Na yoba ta kogon dedibo, yoba ta ye di inabuka i, ye na ama di yugwa. Na di idre, Yoba ta na dedugwa i, ama di yumiwe di, Jisas yegl dugwa.

21 Ana Jisas ka yegl di kodugwa igne, ye dem muduo yubun dogo, ye ka yegl di nogugl edugwa, Na ene ka kaima di teiga, ene meglmara suna i, yagl swara ta na i pi kudana ikne ogono mina yenabiwe dugwa. 22 Yegl dugo, ye duglo beglkwa yagl ye ira pre dugwa i pre pogl sikre, toro kan ikne ikne edigwa. 23 Ana Jisas duglo boglkwa yagl meglmara suna i, swarano ta Jisas ye wakai kaima kanugwa i, Jisas moglmara magigl kaima moglkwa. 24 Yegl moglko, Saimon Pita ye arie ere tedre, yegl dugwa, Ye ira pre dugwa i, di pro dugwa. 25 Pita yegl dugo, Jisas duglo boglkwa yagl ta magigl moglkwa ikra, ye bre i pi Jisas pirie mina edidre, yegl dugwa, Yagl Kade yo, ene ira pre dine? dugwa. 26 Yegl dugo, Jisas di ikne ede, yegl dugwa, Na bret bage ta i pi sup mina si bai, yagl ta tenaglka i, na yoba i pre diwe di, Jisas yegl dugwa. Yegl didre, bret bage ta i pi sup mina si bai, Judas, ye Saimon Iskariot wam moglkwa i, togwa.

27 Ana Judas ye bret bage i, i kodugo, Satan ye moglmara ede suna ogwa. Yegl erukwa pre Jisas ye di te, yegl dugwa, Ene taragl ta eratnga i, tabre ero! dugwa. 28 Ana Jisas ye siragl pre ka yegl mere Judas di togwa i, ye yobamo ame di meglkwa i, swara ta pre pogl sikrikwa. 29 Ye tau prikwa i, Judas mige boks sugl moglkwa pre ege kade i, kaya mokna topo ere yunabedi pre dumo mo, mige tau i pi goduglme yoba tenabuka pre dumo mo, yegl pre ta dumedi prikwa. 30 Ana Judas ye bret bage ikra idre, tabre yene adigl ede meda ogwa. Igne i, eduer yogwa.

31 Ana Judas ede meda ogwa igne, Jisas yegl dugwa, Erme na Yoba Wam moglka i, kagna kade inaglka ege yogwa. Te, na ibo, na Nina ama kagie kade inabuka. 32 Ana God na mina kagie kade inabuka pre ye yene ere mogl, na kagna kade narabuka. Te, ye yegl ere narabuka i, sugl ta moglkre, tabre narabiwe dugwa.

33 Na gagrama wagle, na ege sugunagle keme ene bogl akie moramga. Moramga ba na okna Juda yoba kade wagle di teimere yegl, erme ene ama yegl di tenaglka, na enaglmara i, ene na dokinaiglkwa ba na ta kankraiglkwa. Te, na enaglmara i, ene ta ebi, kuno erekrabuka.

34 Ana erme na ene lo kor ta duglo boraiglmedi teiga. Lo kor i, yegl paugwa, Ene deno muduno ikne ikne teo. Na dena muduna ene teimere kuno yegl mere, ene deno muduno ikne ikne teo. 35 Ene yegl eribi, yoba mudu ene kandre, ene na duglo beglkwa yoba meglmedi kanaiglmiwe di, Jisas yegl dugwa.

36 Ana Jisas yegl di kodugo, Saimon Pita ye di te, yegl dugwa, Yagl Kade yo, ene ede aglo enatne? dugwa. Yegl dugo, Jisas di ikne ede, yegl dugwa, Na enaglmara i, nono erme akie ta pikrabuglka ba ene okuo unatniwe dugwa. 37 Yegl dugo, Pita yegl di prukwa, Yagl Kade yo, siragl pre ene erme enaglnara na ukragle? Na ene pre goraglka panan, pra, na goraluwe dugwa. 38 Pita yegl dugo, Jisas di ikne ede, yegl dugwa, Ene na pre goratno? Na ene ka kaima yene di teiga, erme eduer koduagle kumugl ta wi sikran, ene ege suota na pre kan erekriwe dinatniwe di, Jisas yegl dugwa.