1 Ana okuo Jisas nigl nubun Taiberias bina moglsre, ye duglo beglkwa yagl na kanaiglmedi ye yene obuno dugwa. Ka i yegl mere paugwa, 2 Saimon Pita ya Tomas, kagie ta Didimus we digwa i yebriko, Nataniel, distrik Galili dumo Kana suna nem moglkwa i yogo, Sebedi wam suo yebriko, Jisas duglo biurka yagl suo ama ye bogl akie meglkwa. 3 Akie meglko, Saimon Pita ye yegl di togwa, Na pi buglo bagle ere sinaluwe dugwa. Dugo, yagl wagle i di ikne ede, Nono akie ede enamniwe digwa. Didre, ye akie pi baglkugl mina ede nigle suna pidre, ere si wan meglkwa ba ye eduer kogon ere mogl kamun tagigwa i, buglo bagle kaima ta sikrikwa.

4 Ana kamun tage ugo, Jisas nigle bina adigl moglko, ye duglo beglkwa yagl i, ye kanigwa ba ye Jisas moglmedi kan pogl sikrikwa. 5 Ana Jisas ye di pre, yegl dugwa, Gagrama wagle, ene buglo bagle tau si yuimo? dugwa. Dugo, ye mane digwa. 6 Mane digo, Jisas ye di te, yegl dugwa, ene degigl gagl ogono wo kra nigl atne edio. Edibi, ene buglo bagle tau sinaiglmiwe dugwa. Yegl dugo, ye dumere eriko, buglo bagle mere kide u kau sigwa pre ye degigl gagl ake i mitna edenaiglkwa i, kuno ta erekrukwa.

7 Ana taragl yegl mere plau dugo, Jisas duglo boglkwa yagl ta Jisas wakai kanugwa ikra ye Jisas moglmedi kandre, Pita yegl di togwa, I Yaglno Kade moglmiwe dugwa. Yegl dugo, Saimon Pita prisre, ye ir gaglmo okna gugl edugwa i edidre, puglo di, nigl kuba si ede ogwa. 8 Ogwa ba Jisas duglo beglkwa yagl tau i, ye degigl gagl ake gu didre, baglkugl aware si, ede wigwa. Ye ede nigle meda unaiglkwa i, eglke moglkrikwa ba 100 mita mere yegl meglkwa.

9 Ana ye ede meda udre, kanigwa i, buglo bagle ya bret tau ye nenaiglkwa pre doga sigr mina de yogo, kanigwa. 10 Kanigo, Jisas ye yegl di togwa, Ene buglo bagle erme sigwa i, tau yuio dugwa. 11 Yegl dugwa pre Saimon Pita degigl gagl ake gu di yu meda edugwa. Buglo bagle atne meglkwa i, podo podo 153 meglkwa ba degigl gagl i, biglki dikrukwa.

12 Ana Jisas ye di te, Ene u kaya mokna neo dugwa. Yegl dugo, ye duglo beglkwa yagl i, ye Yagl Kade moglsa moglmedi prisre, kudugl gogl, Ene ira motne? di prikrikwa. 13 Ana Jisas bret ya buglo bagle ake yubu si, duglo beglkwa yagl nenaiglmedi togwa. 14 Jisas goglsre, adigl u kor pidre, ye duglo beglkwa yagl meglmara plau dugwa i, erme ege suota mere erukwa.

15 Ana Jisas ye duglo beglkwa yagl bogl kaya mokna ne kodigo, Jisas ye Saimon Pita yegl di prukwa, Saimon, ene Jon wam motnga i, ene den mudun natnga i, ene yagl kane magigl meglkwa i, narimere egre teidi pitno? dugwa. Dugo, Pita, Owo, Yagl Kade, ene wakai kaniga i, enene pitniwe dugwa. Yegl dugo, Jisas, Na sipsipna nagigle meglkwa i, ene kugl wakai nenaiglmedi to dugwa. 16 Didre, aglke kor ege namba 2 yegl dugwa, Saimon, Jon wam motnga i, ene den mudun natno? dugwa. Dugo, Pita di ikne ede, Owo, Yagl Kade, na ene wakai kaniga i, enene pitniwe dugwa. Dugo, Jisas, Na sipsipna meglkwa i, suglno moglo dugwa. 17 Didre, aglke kor ege namba 3 yegl dugwa, Saimon, Jon wam motnga i, na wakai kano? dugwa. Ana Jisas ye ege suota, Na wakai kano? dumara i pre Pita dem muduo yubun dogo, ye di ikne ede, yegl dugwa, Yagl Kade yo, ene taragl mudu pre kan etnga. Ene wakai kaniga i, enene pitniwe dugwa. Yegl dugo, Jisas, Na sipsipna meglkwa i, ene ye kugl wakai nenaiglmedi to dugwa.

18 Na ene kaima di teiga. Ene gakamugl motnga igne, enene kumagl dedre, ede aglo mere enagledi pitnga i, pitnere wan motnga. Ba ene kidagl yenatnga igne, ene ogon ake prak edin, yoba pere ta ene kumagl de tedre, ene pikragledi pratnara i, ene auro i ede enaiglmiwe dugwa. 19 Jisas ka yegl dugwa i, Pita siragl mere okuo goglsre, God kagie kade tenabere obuno di togwa. Ye ka yegl di kodidre, Pita di te, Na duglo boglo dugwa.

20 Ana Pita kan ake tedre, Jisas duglo boglkwa yagl ta Jisas wakai kanugwa ikra, mokonomugl ugo, kanugwa. Jisas duglo boglkwa yagl i, ye okna kaya mokna neigwa igne, ye bre i pi Jisas pirie mina edidre, ye di pre, Yagl Kade yo, ira ene i pi kudanen ikne ogono mina yenabe? dugwa ikra moglkwa. 21 Ana Pita yagl i kandre, Jisas di pre, yegl dugwa, Yagl Kade yo, yagl i we, ye moglmara siragl taragl plau dinabe? dugwa. 22 Yegl dugo, Jisas ye di te, Na ye kor mogl pai moran, ede ikne unagledi praglka i, i ene kogonen ta pamedi pitno? Ene yoko na duglo boglo dugwa. 23 Ana Jisas ka yegl dugwa i pre pre mediglkwa yoba meglmara ka i wai di ogo, ye prikwa i, Jisas duglo boglkwa yagl i, ta goglkrabuka pre dumedi prikwa. Ba Jisas ye kaima ta goglkrabiwe dikrukwa. Ye dugwa i, Na ye kor mogl pai moran, ede ikne unagledi pribo, ene kogonen pamedi pitno? dugwa.

24 Ana Jisas yaglmo ta pre dugwa i, taragl kane kane plau dumere mere buk mina paugwa i, ye boglkwa paugwa. Te, ye ka bogl atne edidre, di nogugl ede togwa i, kaima kuno ere pamedi prumga.

25 Ana Jisas kogon mere kide ama tau erukwa. Na prika i, yoba ere mogl, ye kogon kane kane erukwa i, mudu bogl, bogl, epigl sinamnedi eribi, ye buk mere kide kaima boraiglkwa pre buk i, dumo makan mudu si kau sinan, agai kaima ta yeikrabedi prika.