1 Ana yoba ede pere pere eigwa igne, Jisas ede muglo Oliv we dimara pi padre, 2 Tagna kana aglke kor ede tawa teigwa yugu yomara togl suna ugo, yoba mere kide ye moglmara wigwa. Wigo, Jisas ame di moglsre, ye ka beke te moglkwa. 3 Beke te moglko, God lomo beke teigwa yoba ya Farisi yoba tau ere mogl, abu ta mabuno kide erukwa i, auro yuigwa. Abu i, yagl ta bogl kunogl nebriko, yoba tau kanigo, ye auro yu yoba gumuglnomugl edidre, 4 Jisas yegl di teigwa, Tisa yo, Abu i, yagl ta bogl kunogl nebriko, yoba tau kandre, di peglkwa. 5 Nono lono mina Moses nono di noro, Yoba mabuno yegl ta erabuka i, kobuglo si, si golo dugwa. Ba ene siragl we di pitne? digwa. 6 Ye yegl digwa i, Jisas ka tau aglau ere dinan, kot ere tenamnedi prisre, kira yegl peglkwa. Ye yegl erikwa ba Jisas bodugl moglsre, ogo mogo mina makan kugane yomara ka tau boglsre, ka ta dikrukwa.

7 Ana Jisas ka ta dikruko, God lomo beke teigwa yoba ya Farisi yoba i, kira pogl meglkwa. Kira pogl meglko, Jisas adiglsre, ye yegl di togwa, Yoba ta tadaglme swara ta erekrukwa ta morabuka i, ye komono kana kobuglo ta idre, abu i kobuglo sinabiwe dugwa. 8 Ye yegl didre, aglke kor bodugl mogl, makan kugane mina ka tau bogl moglkwa. 9 Yegl eruko, yoba ta abu auro yuigwa i, ye ka dugwa i prisre, swara swarade dumo i kide kodidre, ede eigwa. Yoba tau bugla yugu mere ne, ede okna eigwa i, komono kana ede eigo, tau gakamugl meglkwa i, okuo ede eigo, Jisas ya abu i keme yoba gumuglnomugl yoko miurka.

10 Yoko miurko, Jisas adiglsre, abu i yegl di prukwa, Ye ede aglo eime? Yoba ta ene kot ere tenaiglkwa i, ta moglkrimo? dugwa. 11 Dugo, abu i di ikne ede, Yagl Kade yo, ta moglkrimiwe dugwa. Yegl dugo, Jisas yegl di togwa, Na ama ene kot ere tekraglka. Ene pidre, tadaglme okuo ere moglkro dugwa.

12 Ana Jisas aglke kor yoba magigl meglkwa i, yegl di togwa, Na makandigle yoba abuglageno moluwa. Yoba ta na duglo borabuka i, ye mim erumara wan moglkrabuka ba ye abuglage ta ye kor morabedi tenabuka sumara wan morabiwe dugwa. 13 Dugo, Farisi yoba ere mogl, Jisas yegl di teigwa, Ene ira motnga i, yoba ta di nogugl edekrikwa. Ene swara dinga pre ene kanen kuno ta erekrumiwe digwa.

14 Digo, Jisas di ikne ede, yegl dugwa, Na nana kana dibo, i ka kaima panabuka. I siragl pre na aglo mere mogl wiga ya te, ede aglo mere enaglka i, na pre kan erika. Ba ene meglkwa i, na aglo mere mogl wiga ya ede aglo mere enaglka i, ene pre kan erekrikwa. 15 Ene makadigle yoba kan yubu simere mere yoba kan yubu sigwa ba na yoba kan yubu sikrika.

16 Te, na yoba ta kan yubu sibo, na mabuno kaima pamere mere kan yubu sinaglka. I siragl pre na nana primere kogon erekrika ba na Nina na dedugwa i, bogl akie muglko, kogon erika. 17 Te, ene lono mina dugwa i, yoba suo ere mogl, ka swara ta dibr, yoba ye kaima dibredi praiglme dugwa. 18 Na nana kana diga i, yoba swara ta dugwa mere yegl paugwa. Te, na Nina, na dedugwa i, ye ama na kana dugwa pre yoba suo na kana dibrika mere yegl pamiwe di, Jisas yegl dugwa.

19 Ana Jisas yegl dugo, Farisi yoba ye di pre, Ene nen aglo mere moglkwa pre dine? digwa. Digo, Jisas di ikne ede, yegl dugwa, Na siragl mere moglka i, ene pre kan erekrisre, na Nina ama pre kan erekrikwa. Ene na pre kan erima, na Nina ama pre kan eriko, we di, Jisas yegl dugwa. 20 Jisas ka yegl dugwa i, ye tawa teigwa yugu yomara togl suna moglsre, yoba ka beke togwa igne dugwa. Te, togl suna i, yoba mige ofa yu teimara dumo i moglsre, ka yegl dugwa ba yoba swara ta ye si kane sikrikwa. I siragl pre ye gorabuka egemo i ta ukrukwa.

21 Ana Jisas aglke kor yoba ka yegl di togwa, Na ede bage ta ebo, ene na dokidre, na ta kankraiglkwa. Te, ene tadaglmeno mina atne pai mogl, goraiglkwa. Na enaglmara i, ene ta wibi, kuno erekrabiwe dugwa. 22 Jisas yegl dugo, Juda yoba kade magigl meglkwa i di ikne ikne ede, yegl digwa, Ye yene wi si gorabuka pre dumo mo? Siragl pre ye dugwa, Na enaglmara i, ene ta wibi, kuno erekrabiwe di, yegl dume digwa. 23 Ka yegl di ikne ikne edigo, Jisas ye di te, yegl dugwa, Ene kamun atne nem meglkwa ba na kamun mitna nem moglka. Ene makandigle yoba meglkwa ba na makandigle yoba ta moglkrika. 24 Yegl pre na ene di tedre, Ene tadaglmeno mina atne pai mogl, goraiglme diga. I siragl pre na Yoba siragl mere mole diga i, ene na kaima yegl moglmedi prikribi, ene tadaglmeno mina atne pai mogl, goraiglmiwe di, Jisas yegl dugwa.

25 Yegl dugo, ye di pre, yegl digwa, Ene ira motne? digwa. Digo, Jisas didre, Na ira moglka i, na kamun kuade ene di te kodiga. 26 Na ene mabunono kan yubu sidre, di poraglka paugwa ba na erme ta dikraglka. Siragl pre Yoba ta na dedugwa i, ka kaima keme dugo, ye ka di narumere keme makandigle yoba di teiwe dugwa.

27 Ana Jisas Yoba ta na dedume dugwa i, ye Neno Kade pre dugwa ba ye nomane yegl ta ikrikwa. 28 Yegl pre Jisas ye yegl di togwa, Na Yoba Wam moglka i, ene na ake i mitna edenaiglkwa igne, na Moglmere Pai Moglmedi kan pogl sinaiglkwa. Te, na nana primere kogon ta erekrika ba na Nina ka beke narumere keme ka beke teiga. 29 Yoba ta na dedugwa i, ye na kide kodokrukwa ba ye na bogl akie muglka. I siragl pre ye mabuno tau wakai kanugwa i, na ege ege yegl keme eriwe di, Jisas yegl dugwa. 30 Ana Jisas ka yegl dugwa igne, yoba pre meglkwa i, tau mere ye pre mediglkwa.

31 Ana Jisas ere mogl, Juda yoba tau ye pre mediglkwa i, yegl di togwa, Ene na kana duglo bogl meglbi, ene na duglo beglkwa yoba kaima moraiglkwa. 32 Te, ka kaima paugwa i, ene pre pogl sinaiglkwa. Pre pogl sibi, ka kaima i, ene ake ple di tenan, ene kane ta paikraiglmiwe dugwa. 33 Jisas yegl dugo, yoba tau prisre, di ikne ede, yegl digwa, No Abraham gawama moglsre, ege swara ta kane paikrumga. Yegl pre siragl eruko, ene no kane paikraiglmiwe dine? digwa. 34 Yegl digo, Jisas aglke kor ye yegl di togwa, Na ene kaima di teiga, yoba tadaglme erikwa i, mudu tadaglme mina atne kane paigwa. 35 Te, kane yoba meglkwa i, ye bitno yoba kipaimara aimadi kipai moglkraiglkwa ba yugu nem Wam moglkwa i, ye yugu i mina aimadi morabuka. 36 Yegl pre God Wam ene kane pai dinaiglmedi eran, ene kane paikre, yoko kaima moraiglkwa.

37 Ene Abraham gawamo meglkwa i, na prika. Ba na kana ene deno muduno mina paikrukwa pre ene na si goramnedi erikwa. 38 Na Nina bogl akie muglko, ye ka siragl mere dugwa i, na prisre, ene di teiga. Ba ene neno ka siragl mere dugo, prikwa i, ene sika simiwe di, Jisas yegl dugwa.

39 Dugo, yoba i di ikne ede, Abraham no neno moglmiwe digwa. Yegl digo, Jisas aglke kor yegl dugwa, Ene kaima Abraham gawama meglbi, ene Abraham mabuno erumere yegl eraiglkwa. 40 Ba God ka kaima ta di narumere ene di teiga pre na si goramnedi erikwa. Abraham mabuno yegl ta erekrukwa. 41 Ene neno mabuno erumere ka kaima ere meglmiwe dugwa. Yegl dugo, ye di ikne ede, No konbauna gak ta moglkrumga. God swara no Neno moglmiwe digwa. 42 Digo, Jisas yegl di togwa, God ene Neno moglma, ene ama na wakai kanigo. I siragl pre na God bogl akie muglko, wiga. Te, na nana primere ukrika ba God na dedugo, wiga.

43 Na ka digo, ene prikrikwa i, siragl eruko, ene prikrime? Mem yegl paugwa, ene na kana praiglkwa i, kuno ta erekrabuka. 44 I siragl pre ene yagl kide gagiglma moglsre, ene neno mabuno tau eragledi prukwa i, ene ama eramnedi prikwa. Yagl kide i, ye okna ibo yoba si goglkwa yagl moglsre, erme ama yegl moglkwa. Te, ka kaima mabuno i, ye moglmara paikrukwa pre mabuno kaima i duglo boglkrukwa. Ye ka kibi dugwa igne, ye yene kamo dugwa. Siargl pre ye ka kibi dugwa yagle moglsre, yoba ka kibi kane kane digwa i, ama mabuno moglkwa. 45 Ba na ka kaima keme di wan moglka pre ene na pre mediglkrikwa.

46 Na tadaglme ege swara ta eriko, ene ta kanimo? Ta kankrikwa. Ba na ka kaima dibo, siragl eruko, ene na pre mediglkrime? 47 Yoba ta God yobamo moran, ye God kamo prabuka. Ba ene God yobama ta moglkrikwa pre ene na kana ta prikrimiwe di, Jisas yegl dugwa.

48 Ana Jisas yegl dugwa pre Juda yoba di ikne ede, yegl digwa, No ene Samaria yoba motne didre, murubuglo kide ta motnara suna moglme dumga i, kuno dumga pamiwe digwa. 49 Yegl digo, Jisas di ikne ede, Murubuglo kide ta na moglmara suna moglkrukwa. Na Nina kagie kade te moglka ba ene na kagna ake atne keme edigwa. 50 Na moglka i, na nana kagna kade inagledi ere wan moglkrika ba yoba swara ta na kagna kade narabuka i, ye jas kaima moglkwa.

51 Na ene kaima di teiga, Yoba ta na kana ake gi dinan, ye aimadi kamun moglsre, kaima ta goglkrabiwe dugwa.

52 Ana Jisas yegl dugo, Juda yoba ye yegl di teigwa, No erme pre pogl sumga i, murubuglo kide ta ene motnara suna moglkwa paugwa. Abraham okna ibo mogl, goglko, ka kep yoba okna meglkwa i ama geglkwa. Ba ene dinga i, Yoba ta na kana ake gi dinan, ye aimadi kamun moglsre, kaima ta goglkrabiwe dinga. 53 Ba Abraham goglko, ka kep yoba okna meglkwa i ama geglkwa erukwa pre ene yagl kade mogl, kowano awano Abraham egre atne ediedi pitno? Ene yoba ira moledi pitne? di, yegl digwa.

54 Digo, Jisas di ikne ede, yegl dugwa, Na nana kagna ake i mitna edibo, kuno erekrabuka. Ba yagl ta no Godno moglme digwa ikra, ye na Nina moglsre, yene kagna kade nare moglkwa. 55 Na ye pre kan erika ba ene ye ka kaima ta pre kan erekrikwa. Te, na ere mogl, God pre kan erekriwe dibo, ka i kibi panabuka. Ba ene ka kibi dimere yegl, na ta dikraglka. Ka kaima keme dinaglka. Na ka kaima God pre kan ersre, ye kamo ake gi di moglka.

56 Ene kowano awano Abraham i, ye na unabuka ege i we di prisre, gun yogwa. Te, ye eglke mogl, ege i kanugwa mere yegl paugwa pre gun yomiwe dugwa. 57 Jisas yegl dugo, Juda yoba yegl digwa, Ene yagl kulu moglsre, bugla yugu 50-pela mere yegl ta nekitnga ba ene Abraham kanga pre dino? digwa. 58 Yegl digo, Jisas aglke kor yegl dugwa, Na ene ka kaima di teiga, Abraham moglkrukwa igne, Na Moluwe dugwa. 59 Jisas yegl dugo, Juda yoba magigl meglkwa i, ye kobuglo sinamnedi kobuglo akigwa ba Jisas teke pai, tawa teigwa yugu yomara i, kide kodo, ede ogwa.