1 Ana Jisas ka yegl di kodidre, kan heven ibo ede, yegl dugwa, Nina yo, ege ta unabuka i, u kodumiwa. Ene kagna kade natn, na ama ene kagn kade tenaglka. 2 Ene yoba mudu bitno moratnedi yobuglo natnga i, na ta eraglmara i mina yoba ira ta natnga i, ye aimadi kamun kor moraiglkwa pre natnga. 3 Te, yoba aimadi kamun kor moraiglkwa i, mem yegl paugwa, ene swara God kaima motnga i, pre kan ersre, na Jisas Krais, ene dedinga i, ama pre kan eraiglkwa mem yegl pamiwe dugwa.

4 Kogon makandigle natnere i, mudu ere kodidre, kagn kade teiga. 5 Aglke erme we, dumo makan yeikrukwa igne, nono kagno kade pamere mere yegl, aglke kor panabedi ero dugwa.

6 Ene makadigle yoba meglmara yoba tau natnga i, ene motnere di nogugl ede te kodiga. Yoba i, ene yobanma meglko, ene na natngo, ye ene kanen duglo beglkwa. 7 Duglo boglsre, erme pre kan erikwa i, ene ka mudu natnga i, ene mina swara yedre, umedi pre kan erikwa. 8 Te, ene ka di natnga i, na yoba i di teigo, ye pre igwa. Ye pre igwa i, Na ene bogl akie muglko, ene na dedugo, umedi pre mediglmiwe dugwa.

9 Na kamage erika i, yoba i ake ple di tenatnedi kamage erika. Makandigle yoba mudu pre ta kamage erekrika ba yoba ta kere i natnga i keme pre kamage erika. I siragl pre ye ene yobanma meglkwa. 10 Na yobanama ta meglkwa i, ye mudu ene yobanma meglko, te ene yobanma mudu na yobanama meglkwa. Te, yoba i mina na kagna kade iwe dugwa.

11 Na erme makandigle moglkre, ene motnara unaglka ba na duglo beglkwa yoba i, makandigle mogl pai moraiglkwa. Nina, ene i tade motniwa. Yoba i ene kagn mina suglno moratnedi prika. Ene kagn kade paugwa natnga i mina nono swara kaima muglere yegl, ye swara kaima moraiglmedi suglno moratnedi prika. 12 Yoba i bogl akie wan munga igne, na ene kagn pai kawa togwa natnga i mina na ye sugl kan moglka. Ye sugl kan moglko, ye swara ta wau boglkriko, wau borabuka yobamo i keme wau boglkwa. Ye wau boglkwa i, ene kanen pai inabedi pre wau boglkwa.

13 Erme na ene motnara unaglka ba na ye bogl makadigle wan munara ka mere beke teiga i, na gun yeimere mere ye meglmara ama kau si tenabedi priwe dugwa.

14 Na ene kanen yoba i di teigo, makandigle yoba ye kide kanigwa. Na makandigle yoba moglkrimere mere yegl, na yobanama i, ama makandigle yoba moglkrikwa pre ye kide kanigwa. 15 Na ye pre ene agle di prika i, ene ye makandigle mogl dinaiglmedi i pi dumo bage ta edinatnga pre ta dikrika ba ene ye suglno motn, yagl kide ere kide ere te dinabuka pre diga. 16 Na makandigle yoba moglkrimere yegl, ye ama makandigle yoba moglkrikwa. 17 Enene kanen kaima paugwa. Kanen kaima i mina ye ene pre moraiglmedi i pere edo dugwa.

18 Ene na dedingo, ede makandigle wimere yegl, na yobanama i, ede dumo uglo koglo koglo enaiglmedi dediga. 19 Te, na mogl pere ede kogonen erika i, ye ama ene kogonen kaima paugwa i, mogl pere ede eraiglkwa pre erika.

20 Ana Jisas kamage yegl ere kodidre, ama yegl dugwa, Na duglo beglkwa yoba magigl meglkwa i keme pre kamage erekrika ba na kana dibi, yoba ira ta pre medraiglkwa i pre ama kamage erika. 21 Nina yo, na ye pre kamage erika i, nono swara kaima muglere yegl mere ye ama swara yegl moraiglmedi prika. Na ene motnara suna moglko, ene na moglmara suna motnga. Ye nono muglara suna meglbi, makandigle yoba kandre, ene na dedumedi pre medraiglmedi priwe dugwa.

22 Nono swara muglere yegl, ye swara kaima moraiglmedi prika. Prisre, na kagna kade natnga i, ye ama teiga. 23 Te, ene na moglmara suna motngo, na ye meglmara suna moglka i, ye swara kaima moraiglkwa pre erubuglka. Ye swara kaima meglbi, makandigle yoba kandre, ene na dedinedi pre medraiglkwa. Te, ene den mudun nare, na dedingo wimere i, makadigle yoba ama ene den mudun na duglo beglkwa yoba teniwe di praiglmedi priwe dugwa.

24 Nina yo, ene yoba ta natnga i, na moglmara bogl akie mun, na abuglagna ya kagna kade natnga ikra kanaiglmedi prika. Kagna kade natnga i, dumo makan yeikrukwa igne, ene den mudun podo natnga pre natnga.

25 Nina yagl du kaima, na ene pre kan erika ba makandigle yoba ene ta pre kan erekrikwa. Pre kan erekrikwa ba na yobanama magigl meglkwa i, ye ene na dedinedi pre kan erikwa. 26 Te, ene motnere di nogugl ede teiga i, aimadi di nogugl ede te pai moraglka. Na yegl eribo, na ene den mudun natnere mere yegl ye ama meglmara suna yenabuka. Yenan, na ye meglmara ama suna mogl tenagledi priwe di, Jisas kamage ere, yegl dugwa.