1 Okuo Jisas ye duglo beglkwa yagl bogl nigl nubun Galili we dimara ede koglo ibo eigwa. Nigl nubun i, kagie ta Taiberias we digwa. 2 Ye ede koglo ibo eigo, yoba mere kide Jisas ye okna kimagl ere, yoba kide sigwa ake kun eruko, kanigwa pre ye ama Jisas omara mokomugl sika si ede eigwa. 3 Sika si ede eigo, Jisas ye duglo beglkwa yagl bogl ede muglo ibo pi, ame di meglkwa. 4 Igne i, Juda yoba ere mogl, God okna Israel yoba oglo si pidre, Isip yoba wano komono si goglkwa ikra pre moraiglkwa egemo magigl ugwa. 5 Ana Jisas ye duglo beglkwa yagl bogl ame di meglko, Jisas kan atne ede, yoba mere kide ye moglmara wigo, kanugwa. Jisas kandre, ye duglo boglkwa yagl Filip di pre, Nono aglo mere bret topo sumun, yoba mudu nenaiglme? dugwa. 6 Jisas siragl mere erabuka i, ye pre kan ere kodugwa ba ye Filip siragl mere di ikne edenan, pragledi yegl di prukwa.

7 Ana Jisas ka yegl di pruko, Filip di ikne ede, yegl dugwa, Yoba mere kide meglkwa pre nono mige silva 200 mere ta i pi bret topo sumun, yoba bret i kunabe kunabedi tomun nenaiglkwa ba yoba ikne mudu yoko moraiglmiwe dugwa. 8 Filip yegl dugo, Andru, ye Jisas duglo boglkwa yagl ta Saimon Pita agigle moglkwa i, ere mogl, Jisas yegl di togwa, 9 Yagl gak ta magigl moglkwa i, ye bret kugl mogo bali mina gaiglkwa i, 5-pela idre, buglo bagle suo ama yugwa ba yoba mere kide meglkwa pre taragl kebra yegl nenaiglkwa ta kuno erekrabiwe di, yegl dugwa. 10 Andru yegl dugo, Jisas ye duglo beglkwa yagl wagle i di te, Ene yoba mudu di tebi, ame dinaiglmiwe dugwa. Dumo i kugl podo bogl moglmara yogwa. Ana Jisas yegl dugo, ye duglo beglkwa yagl i yoba di teigo, ye mudu ame digwa. Yoba ame digwa i mere kide meglkwa. Gak abu kerekrikwa ba yagl kerikwa i, 5,000 mere yegl meglkwa.

11 Ana yoba ame di kodigo, Jisas bret akidre, God di wakai yei te, bret yubu si, yoba ame digwa i, mudu togo, ye ta nenamnedi primere i neigwa. Te, Jisas buglo bagle ama idre, kuno yegl erukwa. 12 Yegl eruko, yoba mudu neigwa dano eruko, Jisas ye duglo beglkwa yagl yegl di togwa, Bret ikne tau yoko yogwa i, kide ere dinabiwe dugwa. Ene gade idre, degigl gagl mina grio dugwa. 13 Jisas yegl dugo, yoba bret 5-pela ikra wagle pra neigo, ikne tau yoko yogwa i, ye gade idre, degigl gagl 12-pela gre kau sigwa.

14 Ana Jisas bret ya buglo bagle idre, kimagl erukwa i, yoba kandre, yegl digwa, Yoba okna Ka Kep Yagl ta unabe digwa i we, ye ka kaima umiwe di, yegl digwa. 15 Yegl digo, Jisas prukwa i, Ye na king moratnedi na gudu i ede enaiglkrawa we di prisre, ye aglke kor yoba kide kodo, ye swara ede muglo ibo ogwa.

16 Ana okuo min panagledi eruko, Jisas duglo beglkwa yagl wagle i, ede nigle bina eigwa. 17 Pi sugl meglko, mim eruko, Jisas ye ikne ukrukwa pre yene ede baglkugl kuglo pi mogl, nigl koglo ibo, dumo Kaperneam enamnedi ede eigwa. 18 Ye nigle ede eigo, ir podo ugo, nigl si pepigl dugwa. 19 Nigl si pepigl dugo, ye buglo aware si, 5 mo 6 kilomita mere yegl eigo, Jisas nigl yaudomugl konbauna u, ye baglkugl wagle meglmara magigl ugo, kanigwa. Kandre, kudugl geglkwa. 20 Kudugl geglkwa ba Jisas ere mogl, ye di te, yegl dugwa, Na wiga. Ene kudugl goglkrio! dugwa. 21 Yegl dugo, ye Ede baglkugl kuglo wo! digo, ye ede kuglo ogwa. Ye ede kuglo baglkugl mina ogo, baglkugl oglade ye dumo ta enamnedi eimara pi nigle bina pai moglkwa.

22 Ana tagugo i, yoba koglo ibo mogl pai mogl, Jisas ikne unan, kanamnedi sugl meglkwa. Ye eduedi kanigwa i, baglkugl swara keme yogo, Jisas baglkugl wagle pikruko, ye duglo beglkwa yagl keme ede baglkugl kuglo pi mogl, ede eigo, kanigwa pre ye koglo ya moglmedi pre, sugl meglkwa. 23 Ye sugl mogl, Jisas kankriko, yoba tau baglkugl mina dumo Taiberias kide kodo, ede u Yagl Kade Jisas eduedi God di wakai yei tedre, bret yubu si togo, yoba bret neimara ikra magigl i wigwa. 24 Wigo, yoba mere kide meglkwa i Jisas ya ye duglo beglkwa yagl mudu moglkriko, kandre, ye baglkugl tau wigwa i wagle kuglo pi mogl, Jisas kanamnedi ede koglo ibo pi dumo Kaperneam eigwa.

25 Ana yoba mere kide ede dumo Kaperneam eigo, Jisas moglko, kanigwa. Kandre, ye yegl di prikwa, Tisa yo, ene aunake une? digwa. 26 Digo, Jisas di ikne ede, Na ene ka kaima di teiga, ene na dokigwa i, na kimagl eriko, ene kandre, nomane igwa pre na dokokrikwa. Ene bret neigwa, dano erukwa swara i pre na dokigwa. 27 Ene kaya mokna yoko makandigle dokigwa i, bugl kide erabuka. Ene kaya mokna i dokokre, kaya mokna ta ene nedre, aimadi kamin kor moraiglkwa i dokio! dugwa. Na Yoba Wam moglka i, kaya mokna yegl, ene tenaglka. Nina Kade God na yegl eratnedi kere yugo, na wiwe dugwa.

28 Jisas ka yegl di kodugo, yoba ere mogl, ye yegl di prikwa, God kogonmo no ta eraiglmedi prukwa i, siragl kogon eramne? digwa. 29 Yegl digo, Jisas di ikne ede te, yegl dugwa, Ene God kogonmo eraiglkwa i, yegl paugwa, God na dedugo, wiga i, ene na pre medraiglmiwe di, yegl dugwa.

30 Ana Jisas yegl dugo, yoba aglke kor digwa, Ene kimagl siragl mere etn, no kandre, ene pre medramne? digwa. Ene siragl eratne? digwa. 31 Nono kowano awano dumo wau yomara meglkwa igne, ye bret ta mana we digwa i neigwa. I pre God kamo wagle yegl beglkwa, Bret ta heven ibo yei, ede atne ugwa i, ye yoba nenaiglmedi tome* digwa. 32 Yegl digo, Jisas di ikne ede, yegl dugwa, Na ene ka kaima di teiga, bret heven ibo yei, ede atne ugwa i, ene prikwa, Moses ye kowano awano tomedi prikwa ba i ta manugwa. God yene togwa. Te, erme we, Na Nina bret ta ka kaima heven ibo yei, ede atne ugwa i, ene togwa. 33 God bret ene togwa i, heven ibo yei, ede atne udre, yoba mudu kor moraiglkwa tomiwe di, Jisas yegl dugwa.

34 Jisas ka yegl di kodugo, yoba ye di te, yegl digwa, Yagl Kade yo, ene bret i ege ege noro! digwa. 35 Yegl digo, Jisas aglke kor dugwa, Bret ta kor moraiglkwa togwa i, na moglka. Yoba ta na moglmara udre, na pre mediglbi, ye ege swara ta kidan goglkre, nigl goglkre, yegl eraiglmiwe dugwa.

36 Jisas ka yegl didre, ama yegl dugwa, Na ene di te kodiga. Ene na kanigwa ba ene na ta pre mediglkrikwa. 37 Na Nina yoba ira ta ogona mina edugwa i, ye mudu na moglmara unaiglkwa. Te, yoba ira ta na moglmara unaiglkwa i, na ka kaima ye swara ta si meda edekraglka. 38 I siragl pre na heven ibo mogl, ede atne wiga i, na nana primere eragledi ukrika ba na Nina, na dedugwa i, prumere keme eragledi wiga. 39 Na Nina prukwa i, yegl prukwa, ye yoba mudu ta ogona mina edugwa i, na swara kaima ta kide kodokratnedi prisre, ege okuo ta unabuka i, ye mudu kaima ogono nagino ere i kor ede tenatnedi prukwa.

40 Jisas yegl didre, ama yegl dugwa, Na Nina prukwa i, ama yegl prukwa, Na ye Wam moglka i, yoba ira ta na kandre, na pre medrabuka i, aimadi kamin kor morabedi prukwa. Te, ege okuo ta unabuka i, na yoba i ogono nagino ere i kor edinatnedi prumiwe di, Jisas yegl dugwa.

41 Ana Jisas ye bret ta heven ibo yei, ede atne ugwa i, na mole dugwa i pre Juda yoba kade pre meglkwa i kide prisre, ka kane kane digwa. 42 Ye ka kane kane didre, ama di ikne ikne ede, yegl digwa, Yagl i, kagie Jisas, nem Josep kra. Ye nem mam kamgrawa, ye siragl mere heven ibo mogl, ede atne ugwa pre dume? digwa.

43 Juda yoba kade ka yegl di ikne ikne ede meglko, Jisas ere mogl, Ene ka kane kane di ikne ikne edigwa i, kide kodio! dugwa. 44 Yoba ta yene primere na moglmara unaiglkwa i, kuno ta erekrukwa. Na Nina na dedugwa i, ye swara yoba ta auro yunan, unaiglkwa. Te, yoba ta na moglmara unaiglkwa i, na ege okuo ye ogono nagino ere i kor ede tenaglka. 45 God kamo kep yagl ta okna moglkwa i, yegl boglkwa, God ye yoba mudu nomane tenabiwe* di, yegl boglkwa. Ye boglmere yegl, na Nina kaima yoba nomane te moglko, yoba ira ta prisre, nomane igwa i, ye mudu na moglmara wimiwe di, yegl dugwa.

46 Jisas ka yegl di kodidre, ama yegl dugwa, Yoba ta na Nina kankrikwa ba na ye dedugo, wiga i, na swara God kanie dugwa.

47 Jisas yegl didre, ama yegl dugwa, Na ene ka kaima di teiga, Yoba ira ta na pre meduglkwa i, ye aimadi kamin kor morabuka i, i kodugwa. 48 I siragl pre bret ta yoba nedre, kor moraiglkwa i, na moglka. 49 Ene kowano awano dumo wau yomara wan meglkwa igne, ye bret ta mana we digwa i neigwa ba ye okuo geglkwa. 50 Yegl erikwa ba bret ta heven ibo yei, ede atne ume diga i, yoba bret i ta nenan, ye ta goglkrabuka. 51 Bret ta kor moglsre, heven ibo yei, ede atne ugwa i, na moglka. Yoba bret i nenan, ye aimadi kamin kor morabuka. Na bret we diga i, nana ogona nagna pre diga. Yoba uglo koglo koglo meglkwa i kor moraiglmedi, ogona nagna tenaluwe di, Jisas yegl dugwa.

52 Ana Jisas ka yegl di kodugo, Juda yoba pre meglkwa i ere mogl, ka kane kane di ikne ikne edidre, ama yegl digwa, Yagl i siragl mere ogo nagie noran, nenamga pre dume? digwa.

53 Juda yoba yegl digo, Jisas ye di te, yegl dugwa, Na ene ka kaima di teiga, Na Yoba Wam moglka i, ene na ogona nagna nedre, bormaina nedre keme kor moraiglkwa. Ta manan, ene kor moglkraiglkwa i ta ikraiglkwa. 54 Yoba ta na ogona nagna ya bormaina nogwa i, ye aimadi kamin kor morabuka i, i kodugwa. Te, ege okuo yenabuka igne, na ye ogo nagie ere i kor edenaglka. 55 I siragl pre na ogona nagna i, kaya mokna kaima mere yegl yogwa. Te, na bormaina i, nigl kaima nenaiglkwa mere yegl moglmiwe dugwa.

56 Jisas yegl didre, ama yegl dugwa, Yoba ta na ogona nagna ya bormaina neigwa i, ye ede u na moglmara atne kra pai meglko, na ye deno muduno suna ama pai moglka. 57 Na Nina kor aimadi moglsre, na dedugwa i, ye na kor moratnedi narukwa. Kuno yegl mere yoba ta na ogona nagna ya bormaina nenabuka i, na ye kor morabedi tebo, kor aimadi morabuka. 58 Bret ta heven ibo yei, ede atne ugwa i, na mole diga. Ene kowano awano okna ibo dumo wau yomara mogl, bret ta mana we digwa i nedre, okuo geglkwa. Ba na bret ta heven ibo yei, ede atne ume diga i, yoba bret i ta nenabuka yobamo i, kor aimadi morabiwe di, Jisas yegl dugwa. 59 Jisas ka yegl dugwa i, ye dumo Kaperneam, ka mabuno yugu kei yeimara yugugl mogl, yoba ka beke te moglsre, ka yegl dugwa.

60 Ana Jisas ka yegl dugwa pre ye duglo beglkwa yoba tau mere ka i prisre, yegl digwa, Jisas ka yegl dugwa i, waragne paugwa. Nono pre inamga i, kuno ta erekrumiwe digwa. 61 Yegl digwa ba Jisas ye digwa i pre kan ersre, ye yegl di togwa, Na ka diga i, ene kide pre, mane dinaiglmo? 62 Na ka diga i, ene waragne pamedi pribi, ene okuo kan meglbi, na Yoba Wam moglka i ede kuglo pi okna heven ibo moglmara ebo, ene siragl mere praiglme? dugwa.

63 Jisas yegl didre, ama yegl dugwa, Yoba ta yene yobuglno mina aimadi kamin kor moglkraiglkwa ba God Murubuglomo swara ye kor moraiglmedi eran, moraiglkwa. Te, na kana ene di teiga i swara mina God Murubuglo ene kor moraiglmedi tenabuka. 64 Yegl paugwa ba ene tau na ta pre mediglkrime dugwa. Jisas yegl dugwa i, i siragl pre ye duglo beglkwa yoba ira ta ye pre mediglkrikwa ya yagl swara ta okuo ye i pi kuda ikne ogono mina yenabuka i, ye komono kana pre kan ere kodugwa. 65 Jisas ka yegl di kodidre, ama yegl dugwa, Ene tau na pre mediglkrikwa i pre na ene di te kodiga, God yoba ta unabedi eran keme yoba i na moglmara unabiwe di, Jisas yegl dugwa.

66 Ana Jisas ye ogo nagie ya bormaimo i, yoba nenaiglme dugwa igne i ye duglo beglkwa yoba tau mere ye omara sika sikre, ye kide kodigwa. 67 Yegl erikwa pre Jisas ye duglo beglkwa yagl 12-pela ama di pre, yegl dugwa, Ene ama na kide kodinamnedi primo? dugwa.

68 Jisas yegl di pruko, Saimon Pita di ikne ede, yegl dugwa, Yagl Kade yo, no ene kide kodidre, yoba ira moglmara enamne? Yoba aimadi kamin kor moraiglkwa ka i, ene swara no di notnga. 69 Te, God ye ene swara i pere edugo, uniwedi no yegl pre mediglsre, pre pogl sumniwe di, Pita yegl dugwa.

70 Ana Pita yegl di kodugo, Jisas ka ta ama yegl dugwa, Na swara ene yagl 12-pela kere iga ba ene meglmara suna i, yagl swara ta Satan gagigle ta moglmiwe dugwa. 71 Jisas yegl dugwa i, yagl ta kagie Judas, Saimon Iskariot wam moglkwa i pre dugwa. Ye yegl dugwa i siragl pre Judas i, okuo Jisas i pi kudamo ikne ogono mina yenabuka pre dugwa.