11 Ihawa Muhe wa Mulungu yamzilibule Yesu kokala mgati yenu, baho iyo yamzilibule Kilisito kozing’ha ugima ng’huli zenu zija zifa, kosang’hana ivo kwanzila ya Muhe wake yokala mgati yenu.
12 Kwaivo walukolo wangu, chinayo sang’hano, mbali sio yakukala kwa kuwinza ng’huli zetu vizilonda. 13 Baho mhakala kuwinza vizilonda ng’huli zenu, kweli mofa. Mbali muhakala kwa kulongozigwa na Muhe wa Mulungu mhalema kusang’hana sang’hano za ubananzi, baho mokala na ugima. 14 Wose wolongozigwa na Muhe wa Mulungu wao iyo wana wa Mulungu. 15 Kwavija, hambokele Muhe wa utumwa ugala woga, mbali mumbokela Muhe ija yomtendani mweye kua wana wa Mulungu, na kwa Muhe iyo, cheye chomkema Mulungu,"Aba," iyo kulonga "Tata!" 16 Nayo Muhe mwenyego kochilongela mmuhe mmwetu kua kweli cheye cha wana wa Mulungu. 17 Ivo, kwavija cheye cha wana wa Mulungu, baho chobokela ganogile gose golawa kwa Mulungu gaja gayawekile wanhu wake, na chobokela gago hamwe na Kilisito, enaa, chihadununzigwa hamwe na Kilisito, chokwinuligwa hamwe nayo.