Wende wa Mulungu kubitila Kilisito Yesu
31 Kwaivo, chilonge choni mzimbuli zino? Ihawa Mulungu kaubanzi wetu, yelihi kodaha kua chimbidu na cheye? 32 Mulungu hamkimile Mwanage yaiyeka, mbali kamlava kwambuli yetu cheye wose. Ihawa katenda ivo, ivo, haching’ha ivija ganogile gose? 33 Yelihi yonda yawalongeleze wasaguligwe na Mulungu? Mulungu mwenyego iyo yawatogole kua wanhu wake! 34 Yelihi yonda yawalamule? Habule! Kwavija Kilisito Yesu iyo yadanganike, kaidi kazilibuka na kakala ubanzi wa kutogoligwa kwa Mulungu. Iyo kochipulila! 35 Yelihi kodaha kuchibagula na wende wa Kilisito? Ivo, kugaya hebu udala hebu madununzo hebu nzala ng’hulu hebu chikumbi muyega, hebu bung’hukila hebu kuitoa? 36 Kama Mayandiko ga Mulungu vigandikigwe,
"Kwambuli yako, chozambwigwa na ifa misi na chilo,
chotendigwa kama bung’hukilalo wa kuchinjigwa."
37 Mbali mzimbuli zino zose, chihuma uhumi mkulu kwautazi wake Kilisito yaching’ile wende. 38 Baho, nivimanya kua habule chinhu chochose chidaha kuchigola na wende wake, si ifa hebu ugima, hata watumigwa wa kwa Mulungu hebu weli na udaho, hata golawila sambi hebu gonda kulawila hamwande, hebu weli na udaho, 39 hebu isi ya uchanha, hebu wa hasi. Habule chilumbe chochose chidaha kuchigola na wende wa Mulungu uli na Kilisito Yesu Mndewa wetu.