ନବକୁଦ୍ନିସ୍ଚର ନ଼କିତା ଦାଂଗ୍ଣାୟାଁ
1 ଜୀହୁଦାତି ରାଜା ଜିହୟାକିମ୍ ସା଼ଲୱି କିହିମାଚାଟି ତୀନି ବାର୍ସା ଆ଼ହାଲିଏ ବାବିଲତି ରାଜା ନବକୁଦ୍ନିସ୍ଚର ଜିରୁସାଲମତା ୱା଼ହାଁ ଏ଼ଦାଆଁ ସା଼ରିସୁଟୁ ଗୂର୍ତେସି। 2 ପ୍ରବୁ ଜୀହୁଦାତି ରାଜା ଜିହୟାକିମ୍ଇଁ ଅ଼ଡ଼େ ମାହାପୂରୁ ଇଲୁତି କଚେକା ଆ଼ସ୍ତି ତାନି କେୟୁତା ହେର୍ପିତେସି; ଏଚେଟିଏ ଏ଼ୱାସି ସିନିୟର ଦେ଼ସାତା ମାନି ତାନି ପେ଼ନୁ ଦେ଼ୱୁଡ଼ିତା ଏ଼ ବାରେ ଅ଼ତେସି ଅ଼ଡ଼େ ଆ଼ସ୍ତି ବାରେ ଏ଼ୱାସି ତାନି ପେ଼ନୁତି କୂଡ଼ିକିନି ଇଲୁତା ଇଟିତେସି।
3 ଏଚେଟିଏ ରାଜା ଇସ୍ରାୟେଲ ମୀର୍କା ବିତ୍ରାଟି, ରାଜା ଇଜ ତାରାଇଁ ଅ଼ଡ଼େ ମା଼ନିଗାଟି ଇଲ୍କାତି ଦାଂଗ୍ଣାୟାଁ ବିତ୍ରାଟି ଏଚର ଜା଼ଣା, 4 ଦ଼ହ ହିଲାଆଗାଟି ଅ଼ଜିତାରି, ବୁଦି ଗାଟାରି, ଜା଼ପିତାରି, ତବେ ଜା଼ପିନାରି ଅ଼ଡ଼େ ଆଙ୍ଗାତା ଏ଼ନି ର଼ଗ ହିଲାଆଗାଟାରି ଆ଼ନାୟି ମାନେ ଆତିହିଁ ଏ଼ୱାରି ରାଜା ଗା଼ଡ଼ାତା କାମା କିହାଲି ପା଼ଡ଼ା ଆ଼ନାରାଇଁ ତାଚାଲି ଅ଼ଡ଼େ କଲ୍ଦିୟ ପା଼ଟା ରା଼ଚାଲି ଅ଼ଡ଼େ ପ଼ଡ଼ୱି ଆ଼ହାଲି ଇଞ୍ଜାଁ ହା଼ଡା ଜା଼ପ୍ହାଲି କାଜା ପା଼ଣାଗାଟି ଅସ୍ପନସଇଁ ହୁକୁମି ହୀତେସି। 5 ଏ଼ୱାରି ତୀନି ବାର୍ସା ଡା଼ୟୁ ରାଜା ନ଼କିତା ନିନେରି, ଏ଼ଦାଆଁତାକି ରାଜା ଏ଼ୱାରାକି ରାଜାତି କା଼ଦି ଅ଼ଡ଼େ ଗହ୍ନି ଅଙ୍ଗୁରି ରାସା ହୀହାଲି ତାକି ଅ଼ଡ଼େ ତୀନି ବାର୍ସା ପାତେକା ଏ଼ୱାରାଇଁ ଜାତ୍ନୁ କିହାଲି ଆ଼ଚିତେସି। 6 ଈୱାରି ବିତ୍ରାଟି ଜୀହୁଦା କୂଡ଼ାତି ଦାନିୟେଲ, ହନାନିୟ, ମିସାୟେଲ ଅ଼ଡ଼େ ଅସରିୟ ମାଚେରି।