Daniel 12

ରା଼ନି ବେ଼ଲା

1 "ଏଚିବେ଼ଲାତା ମୀ ଲ଼କୁତି ମୀର୍‌କାଣି ସା଼ୟେମି କିନି କାଜା ଦୂତୁ ମିକାୟେଲ ନିନେ, ଅ଼ଡ଼େ ମାଣ୍‌ସି କୂଡ଼ାତି ତୀରିତି କା଼ଲାଟିଏ ଏ଼ କା଼ଲା ପାତେକା ଏ଼ନିଲେହେଁତି କସ୍ତତି ଦିନା ଏଚେଲା ଆ଼ହାହିଲେଏ, ଇଲେତି କସ୍ତତି କା଼ଲା ୱା଼ନେ, ଅ଼ଡ଼େ ମୀ କୂଡ଼ାତି ଏମିନି ବାରେତି ଦ଼ର୍‌କା ପତିତା ରା଼ସ୍‌କି ଆ଼ହାମାନେ, ଏ଼ୱାରି ବାରେ ଏ଼ ବେ଼ଲାତା ଗେଲ୍‌ପି ଆ଼ନେରି। 2 ଇଞ୍ଜାଁ ଦାର୍‌ତିତି ଦୂଡ଼ିତା ଆମିନିଗାଟାରି ଡୂରିନେରି, ଏ଼ୱାରି ବିତ୍ରାଟି ହା଼ରେକା ତେଃଏଲିନେରି; ଏଚର ଜା଼ଣା କା଼ଲେଏତି ଜୀୱୁ ଅ଼ଡ଼େ କଚେକା ଲାଜା ଇଞ୍ଜାଁ କା଼ଲେଏତି ଡଣ୍ତ ବେଟାଆ଼ହାଲି ତାକି ନିଙ୍ଗିନେରି। 3 ଆମ୍ବାଆରି ବୁଦିଗାଟାରି, ଏ଼ୱାରି ହା଼ଗୁତି ଉଜେଡ଼ି ସମାନା ଅ଼ଡ଼େ ଆମ୍ବାଆରି ହା଼ରେକା ଲ଼କୁଣି ଦାର୍ମୁତି ଜିରୁତା ୱେଟ୍‌ହା ତାନେରି, ଏ଼ୱାରି ହୁକାୟାଁ ସମାନା କା଼ଲେଏ ତାକି ଉଜେଡ଼ି ଆ଼ନେରି।"

4 "ସାମା ହେ଼ ଦାନିୟେଲ, ନୀନୁ ରା଼ନି କା଼ଲା ପାତେକା ଈ ବାରେ ବ଼ଲୁ ରୂପିତି ପତିତା ମୁଦା କିହାଁ ଇଟାମୁ; ହା଼ରେକା ଇତାଲା ଆତାଲା ପାରିନେରି ଅ଼ଡ଼େ ବୁଦି ପାଡା ଆ଼ନେ।"

5 ଏଚିବେ଼ଲା ନା଼ନୁ ଦାନିୟେଲ ସିନିକିତେଏଁ, ଅ଼ଡ଼େ ମେହ୍‌ଦୁ, ଏଟ୍‌କାତି ରିଆରି ନିଚାମାନେରି, ରଅସି କାଡା ଇତାଲା ଅ଼ଡ଼େ ରଅସି କାଡା ଆତାଲା। 6 ଇଞ୍ଜାଁ ଦବ୍‌ଲା ହିମ୍ବରି ହୁଚାମାନେସି ଅ଼ଡ଼େ କାଡା ଲାକ ମାନି ଏମିନି ମାଣ୍‌ସି, ଏ଼ୱାଣାଇଁ ରଅସି ଏଲେଇଚେସି, "ଈ ବାରେ କାବାଆ଼ନି କାତା ରା଼ନି ପାତେକା ଏଚର ବାର୍ସା ଆ଼ନେ ?"

7 ଏଚେଟିଏ ନା଼ନୁ ୱେଚେଏଁ, ଦବ୍‌ଲା ହିମ୍ବରି ଅ଼ଡ଼େ କାଡାତି ଏ଼ୟୁ ଲାକ ମାନି ମାଣ୍‌ସି ତାନି ଟିଃନି ଅ଼ଡ଼େ ଟେ଼ବ୍ରି କେୟୁ ଲାକପୂରୁ ୱାକି ପେର୍‌ହାଁ କା଼ଲେଏ ତାକି ନୀଡାମାନାଣି ଦ଼ରୁ ତଲେ ପାର୍‌ମାଣା କିହାଁ ଏଲେଇଚେସି, "ଈଦି ତୀନି ବାର୍ସା ଆଦା ପାତେକା ଆ଼ନେ; ଇଞ୍ଜାଁ ଏ଼ୱାରି ସୁଦୁଗାଟି ଲ଼କୁତି ବା଼ଡ଼୍‌ୟୁ ଡିକ୍‌ହାଲି ଆ଼ଡିସାରେ, ଈ ବାରେ ପୂରା ଆ଼ନେ।"

8 ନା଼ନୁ ୱେଚେଏଁ, ସାମା ତେଲ୍‌ହାଆତେଏଁ; ଏଚେଟିଏ ନା଼ନୁ ଏଲେଇଚେଏଁ, "ହେ଼ ନା଼ ପ୍ରବୁ, ଈ ବାରେ କାତା ରା଼ନି ବେ଼ଲାତା ଏ଼ନାୟି ଆ଼ନେ ?"

9 ଏଚେଟିଏ ଏ଼ୱାସି ଏଲେଇଞ୍ଜାତେସି, "ହେ଼ ଦାନିୟେଲ ନୀନୁ ନୀ ଜିରୁତା ତା଼କାମୁ; ଇଚିହିଁ ରା଼ନି କା଼ଲା ପାତେକା ଈ ବାରେ କାତା ମୁଦା ଅ଼ଡ଼େ ବୁଟୁ ମୁଦ୍ରା ୱେ଼ପି ଆ଼ହାମାନେ। 10 ହା଼ରେକା ଜା଼ଣା ଜାହାରାଇଁ ନର୍‌ହାଁ ଅ଼ଡ଼େ ଦବ୍‌ଲା କିହାଁ ସୁଦୁ ଆ଼ନେରି; ସାମା ଲାଗେଏତାରି ଲାଗେଏତି କାମା କିନେରି ଅ଼ଡ଼େ ଲାଗେଏତାରି ବିତ୍ରାଟି ଆମ୍ବାଆରି ତେଲ୍‌ହଅରି; ସାମା ବୁଦି ଗାଟାରି ତେଲ୍‌ହିନେରି।"

11 "ଇଞ୍ଜାଁ ଏମିନି ବେ଼ଲାତା କା଼ଲେଏତି ପୂଜା ସାପି ଆ଼ନେ ଅ଼ଡ଼େ ନା଼ସା କିନି ଅ଼ପାଆଗାଟି ଆ଼ସ୍ତି ତୀରି ଆ଼ନେ, ଏ଼ ବେ଼ଲାଟିଏ ର଼ ମା଼ଣା ରୀ ୱାଞ୍ଜା ସା଼ରି କ଼ଡ଼ି ଦସ ଦିନା ଆ଼ନେ। 12 ଆମିନି ମାଣ୍‌ସି କା଼ଚାହାଁ ଡ଼ୟିନେସି ଅ଼ଡ଼େ ଏ଼ୱାସି ର଼ ମା଼ଣା ତୀନି ୱାଞ୍ଜା କଡ଼େ ପନ୍ଦର ଦିନା ପାତେକା ଡ଼ୟିନେସି, ଏ଼ୱାସି ନେହେଁ।"

13 "ସାମା ରା଼ନି କା଼ଲା ପାତେକା ନୀନୁ ନୀ ଜିରୁତା ତା଼କାମୁ; ଇଚିହିଁ ନୀନୁ ଜ଼ମିଦି ଅ଼ଡ଼େ କା଼ଲା ରା଼ତି ଡା଼ୟୁ ଜାହାରା ଅଦିକାରାତା ନିଚାହାଁ ଡ଼ୟିଦି।"