ନବକୁଦ୍ନିସ୍ଚରତି ରୀ ଲମ୍ବର ହାପାନା
1 "ବାରେ ଦାର୍ତିତା ବାସା କିହାମାନି କୂଲୁ ଅ଼ଡ଼େ ଦେ଼ସାତି ବାରେ ବା଼ସାଗାଟି ଲ଼କୁଣି ନବକୁଦ୍ନିସ୍ଚର ରାଜାତି କାବ୍ରୁ; ମୀ ବାରେ ତାକି ହା଼ରେକା ହିତ୍ଡ଼ି ଆ଼ପେ। 2 ବାରେକିହାଁ ଲାକ ମାନି ମାହାପୂରୁ ନା଼ ତାକି ଏ଼ନି ଏ଼ନି ସିନା ଅ଼ଡ଼େ କାବାଆ଼ନି କାମା କିହାମାନେସି, ଏ଼ ବାରେ ୱେ଼କ୍ହାଲି ନେହେଁ ଅଣ୍ପିତେଏଁ।
3 ତାନି ବାରେ ସିନା ଏ଼ନିକିଁ କାଜାୟି ଅ଼ଡ଼େ ତାନି କାବାଆ଼ନି କାମା ବାରେ ଏ଼ନିକିଁ ବା଼ଡ଼୍ୟୁ ଗାଟାୟି!
ତାନି ରା଼ଜି କା଼ଲାକା଼ଲାତି ରା଼ଜି ଅ଼ଡ଼େ ତାନି ସା଼ଲୱି କିନାୟି ପା଼ଟୁ ପା଼ଟୁ ତାକି ଡ଼ୟିନେ।"
ନବକୁଦ୍ନିସ୍ଚର ମାହାପୂରୁଇଁ ଜହରା
4 "ନା଼ନୁ ନବକୁଦ୍ନିସ୍ଚର ନା଼ ଇଲୁତା ହିତ୍ଡ଼ି ତଲେ ମାଚେଏଁ ଅ଼ଡ଼େ ଜାହାରା ମେ଼ଡ଼ାତା ରା଼ହାଁ ମାଚେଏଁ। 5 ନା଼ନୁ ର଼ ହାପାନା ହେ଼ଟେଏଁ, ଏ଼ଦି ନାଙ୍ଗେ ଆଜି କିୟାତେ ଅ଼ଡ଼େ ପା଼ସ୍ପନି ଲାକ ନା଼ ଅଣ୍ପୁ ଅ଼ଡ଼େ ମ଼ନତି ସେୟାଁଣା ହାପାନା ନାଙ୍ଗେ କିଲିବିଲି କିୟାତେ। 6 ଏ଼ଦାଆଁତାକି ହାପାନାତି ଅର୍ତ ନାଙ୍ଗେ ପୁଣ୍ମ୍ବି କିହାଲି ତାକି ନା଼ନୁ ବାବିଲତି ବାରେ ବୁଦିଗାଟି ଲ଼କୁଣି ନା଼ ତା଼ଣା ତାଚାଲି ତାକି ହୁକୁମି କିତେଏଁ; 7 ଏଚେଟିଏ ଗୂର୍କା, ପା଼ଞ୍ଜି ସିନିକିନାରି, କଲ୍ଦିୟ ଅ଼ଡ଼େ ମନ୍ତ୍ରଗାଟାରି ନା଼ ତା଼ଣା ୱା଼ତେରି, ଇଞ୍ଜାଁ, ନା଼ନୁ ଏ଼ୱାରାଇଁ ହାପାନା ୱେସ୍ତେଏଁ; ସାମା ଏ଼ୱାରି ଏମ୍ବାତି ଅର୍ତ ନାଙ୍ଗେ ୱେସାଲି ଆ଼ଡାଆତେରି। 8 ସାମା ଡା଼ୟୁ ନା଼ ପେ଼ନୁତି ଦ଼ରୁ ଲେହେଁ ବେଲଟ୍ସସ୍ର ଇନାସି ଦାନିୟେଲ ନା଼ ତା଼ଣା ୱା଼ତେସି, ତାନି ହିୟାଁତା ସୁଦୁ ପେ଼ଣ୍କାତି ଜୀୱୁ ମାନେ; ଇଞ୍ଜାଁ, ନା଼ନୁ ଏ଼ୱାଣାଇଁ ହାପାନା ୱେସ୍ତେଏଁ, 9 ହେ଼ ଗୂର୍କାତି କାଜାତି ବେଲଟ୍ସସ୍ର, ନା଼ନୁ ପୁଞ୍ଜାମାଇଁ, ସୁଦୁ ପେ଼ଣ୍କାତି ଜୀୱୁ ନୀ ହିୟାଁତା ମାନେ ଅ଼ଡ଼େ ଏ଼ନି ଡ଼ୁଗାମାନି ବ଼ଲୁ ନୀ ତାକି କସ୍ତ ଆୟେଏ, ଏ଼ଦାଆଁତାକି ନା଼ନୁ ହାପାନାତା ଏମିନି ଏମିନି ସେୟାଁଣା ହାପାନା ବେଟାଆ଼ହାମାଇଁ, ଏ଼ଦାଆଁ ଅ଼ଡ଼େ ଏମ୍ବାତି ଅର୍ତ ନାଙ୍ଗେ ୱେସ୍ତାମୁ।"
10 "ପା଼ସ୍ପନି ଲାକ ନା଼ ମ଼ନତି ସେୟାଁଣା ହାପାନା ଇଲେତାୟି ମାଚେ; ନା଼ନୁ ମେସ୍ତେଏଁ, ଅ଼ଡ଼େ ମେହ୍ମୁ, ଦାର୍ତି ମାଦି ଟା଼ୟୁତା ର଼ ମା଼ର୍ନୁ ଅ଼ଡ଼େ ଏ଼ଦି ହା଼ରେକା ପାଡା ଆ଼ତାୟି।" 11 ଏ଼ ମା଼ର୍ନୁ ପାଡା ଆ଼ତେ ଅ଼ଡ଼େ ଆ଼ଟ୍ୱା ଆ଼ତେ ଏ଼ଦାନି ପାଡ୍ଣି ହା଼ଗୁତା ଊରିତେ, ଇଞ୍ଜାଁ ବାରେ ଦାର୍ତି ମୁଟ୍ପେ ଏ଼ଦି ତ଼ଞ୍ଜାଆ଼ତେ। 12 ଏ଼ଦାନି ଆ଼କା ଅ଼ଜିତାଇ ଅ଼ଡ଼େ ଏମ୍ବାତି ପା଼ଡ଼େୟି ହା଼ରେକା ମାଚେ, ଅ଼ଡ଼େ ଏମ୍ବାଆଁ ବାରେତାକି କା଼ଦି ମାଚେ। ବୂମିତି ଜ଼ନ୍ତୟାଁ ଏ଼ଦାନି ଡ଼଼ଇ ସା଼ୟିଁ ବେଟାଆ଼ତୁ ଅ଼ଡ଼େ ହା଼ଗୁତି ପଟାୟାଁ ଏମ୍ବାତି ଗମାୟାଁଣା ବାସା କିତୁ ଅ଼ଡ଼େ ବାରେ ଜୀୱୁ ଗାଟାଇ ଏମ୍ବାଟି କା଼ଦି ବେଟାଆ଼ତୁ।
13 ନା଼ନୁ ପା଼ସ୍ପନି ଲାକ ନା଼ ମ଼ନତି ସେୟାଁଣା ହାପାନା ମେସ୍ତେଏଁ, ଅ଼ଡ଼େ ମେହ୍ମୁ, ର଼ କା଼ପୁ କା଼ଃନାସି ଅ଼ଡ଼େ ଦୂତୁ ଲାକପୂରୁଟି ରେ଼ଚା ୱା଼ତେସି। 14 ଏ଼ୱାସି କାଜା ଗିୟାଁ ତଲେ ଈ କାତା ଏଲେଇଚେସି, "ଈ ମା଼ର୍ନୁତି ଟୂଣ୍ମୁ ଅ଼ଡ଼େ ଏମ୍ବାତି କମାୟାଁ ବାରେ ନାଙ୍ଗାମୁ, ଏମ୍ବାଟିଏ ଆ଼କା ବାରେ ହାଣ୍ହା ତୁହ୍ମୁ ଅ଼ଡ଼େ ପା଼ଡ଼େୟି ବାରେ ଡ଼ାଞ୍ଜାତୁହ୍ମୁ; ଏଚେଟିଏ ଡ଼଼ଇତି ଜ଼ନ୍ତୟାଁ, ଅ଼ଡ଼େ ଏ଼ କମାତି ପଟାୟାଁ ଊମ୍ବାହାଲାପୁ। 15 ଆ଼ତିଜିକେଏ ବୂମିତା ତାନି ମୂଲୁ-ଡାକିତି ଲ଼ହ ଅ଼ଡ଼େ ପିତାଡ଼ା ହିକ୍ଣିୟାଁ ତଲେ ଦସାହାଁ ବୂମିତି କ଼ଡ଼୍ଗି ଗାର୍କିତା ଇଟାମୁ ଅ଼ଡ଼େ ଏ଼ଦି ହା଼ଗୁତି ମାଚୁତା ଊଦାପେ, ଅ଼ଡ଼େ ଜ଼ନ୍ତୟାଁ ତଲେ ଦାର୍ତିତି ଜା଼ଡ଼ାତା ଏ଼ଦାନି ଟା଼ୟୁ ଆ଼ପେ। 16 ତାନି ମ଼ନ ମାଣ୍ସି ମ଼ନ ତିରିମ୍ଣିପେ ଅ଼ଡ଼େ ଏ଼ୱାଣାକି ଜ଼ନ୍ତତି ମ଼ନ ହୀପ୍କି ଆ଼ପେ ଅ଼ଡ଼େ, ତାନି ଲାକ ସା଼ତା କା଼ଲମି ହାଲ୍ବେ। 17 ଆମ୍ବାଆସି ବାରେକିହାଁ ଲାକ ମାନେସି, ଏ଼ୱାସି ମାଣ୍ସିୟାଁ ରା଼ଜିତା ସା଼ଲୱି କିନେସି ଅ଼ଡ଼େ ଆମ୍ବାଆରାକି ତାନି ମ଼ନ, ଏ଼ୱାଣାକି ଏ଼ୱାସି ହୀନେସି, ଇଞ୍ଜାଁ ମାଣ୍ସିୟାଁ ତା଼ଣା ହୀଣି ଲ଼କୁକି ଏ଼ଦାଆଁ ହେର୍ପିନେସି, ଜୀୱୁତି ଲ଼କୁ ଏ଼ନିକିଁ ଈଦାଆଁ ପୁନେରି, ଏ଼ଦାଆଁତାକି ଈ ବ଼ଲୁ କା଼ପୁ କା଼ଃନାରି ହୁକୁମି ତଲେ ଅ଼ଡ଼େ ଈ ଦାୱା ସୁଦୁ ଲ଼କୁ ବ଼ଲୁ ତଲେ ଆ଼ହାମାନେ।"
18 "ନା଼ନୁ ରାଜା ନବକୁଦ୍ନିସ୍ଚର ଈ ହାପାନା ହେ଼ଣ୍ତାମାଇଁ; ନୀଏଁ ହେ଼ ବେଲଟ୍ସସ୍ର, ନୀନୁ ଅର୍ତ ପୁଣ୍ମ୍ବି କିୟାମୁ, ଇଚିହିଁ ନା଼ ରା଼ଜିତି ବାରେ ବୁଦି ଲ଼କୁ ଏମ୍ବାତି ଅର୍ତ ନାଙ୍ଗେ ୱେସାଲି ଆ଼ଡାଆତେରି; ସାମା ନୀନୁ ଆ଼ଡିଦି, ଇଚିହିଁ ନୀ ହିୟାଁତା ସୁଦୁ ପେ଼ଣ୍କାତି ଜୀୱୁ ମାନେ।"
ଦାନିୟେଲତି ରୀ ହାପାନାତି ଅର୍ତ ୱେହ୍ନାୟି
19 ଏଚେଟିଏ ବେଲଟ୍ସସ୍ର ଇନି ଦାନିୟେଲ ଗା଼ଡ଼େକା ତାକି କାବା ଆ଼ହାଁ ଡ଼ୟିତେସି ଅ଼ଡ଼େ ତାନି ଅଣ୍ପୁ ଏ଼ୱାଣାଇଁ କିଲିବିଲି କିତେ। ରାଜା ଏଲେଇଚେସି, "ହେ଼ ବେଲଟ୍ସସ୍ର, ଏ଼ ହାପାନା କି ଏମ୍ବାତି ଅର୍ତ ନିଙ୍ଗେ କିଲିବିଲି କିୟାଆପେ।" ବେଲଟ୍ସସ୍ର ଏଲେଇଚେସି, "ହେ଼ ନା଼ ରାଜା, ଆମ୍ବାଆରି ନିଙ୍ଗେ ଅ଼ପଅରି, ଏ଼ୱାରାକି ଈ ହାପାନା ଆ଼ପେ ଅ଼ଡ଼େ ନୀ ସାତ୍ରୁୟାଁକି ଏମ୍ବାତି ଅର୍ତ ଆ଼ପେ।" 20 "ନୀନୁ ଏମିନି ମା଼ର୍ନୁ ମେସ୍ତି, ଏ଼ଦି ପାଡା ଆ଼ହାଁ ବା଼ଡ଼୍ୟୁ ଆ଼ତେ, ଏ଼ଦାନି ପାଡ୍ଣି ହା଼ଗୁତା ଏଜାମାଚେ ଅ଼ଡ଼େ ବାରେ ଦାର୍ତିତା ତ଼ଞ୍ଜାଆ଼ତେ; 21 ଆମିନି ଗାଟାଣି ଆ଼କା ବାରେ ଅ଼ଜିତାଇ ଅ଼ଡ଼େ ପା଼ଡ଼େୟି ହା଼ରେକା ମାଚେ ଅ଼ଡ଼େ ଏମ୍ବିୟା ବାରେତି କା଼ଦି ମାଚେ; ଏମିନି ଡ଼଼ଇ ବୂମିତି ଜ଼ନ୍ତୟାଁ ବାସା କିତୁ, ଏମିନି କମାୟାଁ ଲାକ ହା଼ଗୁତି ପଟାୟାଁ ବାସା କିତୁ।"
22 "ହେ଼ ରାଜା, ଏ଼ ମା଼ର୍ନୁତି ଆ଼ହିମାଞ୍ଜି ନୀନୁ, ନୀନୁ ପାଡା ଆ଼ହାଁ ବା଼ଡ଼୍ୟୁ ଗାଟାତି ଆ଼ହାମାଞ୍ଜି; ଇଚିହିଁ ନୀ ୱେ଼ଙ୍ଗିତାୟି ପାଡା ଆ଼ହାମାନେ ଅ଼ଡ଼େ ଏ଼ଦି ହା଼ଗୁତା ଏଜିମାନେ ଅ଼ଡ଼େ ନୀ ସା଼ଲୱି କିନାୟି ଦାର୍ତି ମୁଟ୍ପେ ତାକି ୱେ଼ଙ୍ଗାମାନେ। 23 ଇଞ୍ଜାଁ, ନୀନୁ ମେସ୍ତି, ଲାକପୂରୁଟି ର଼ କା଼ପୁ କା଼ଃନାସି ଅ଼ଡ଼େ ଦୂତୁ ରେ଼ଚା ୱା଼ହାଁ ଏଲେଇଞ୍ଜାତେସି, ‘ଈ ମା଼ର୍ନୁତି ଟୂଣ୍ହାଁ ନା଼ସା କିମୁ; ଆ଼ତିଜିକେଏ ବୂମିତା ଏମ୍ବାତି ଡାକିତି ଲ଼ହ ଅ଼ଡ଼େ ପିତାଡ଼ା ହିକ୍ଣିୟାଁ ତଲେ ଦସାହାଁ ବୂମିତି କ଼ଡ଼୍ଗି ଜା଼ଡ଼ାତା ଇଟାମୁ; ଅ଼ଡ଼େ, ଏ଼ଦି ହା଼ଗୁତି ମାଚୁତା ଊଦାପେ ଅ଼ଡ଼େ ଏ଼ଦାନି ଲାକ ସା଼ତା କା଼ଲମି ହାନି ପାତେକା ବୂମିତି ଜ଼ନ୍ତ ତଲେ ତାନି ବା଼ଗା ଆ଼ପେ।’"
24 ହେ଼ ରାଜା, ଈଦାନି ଅର୍ତ ଈଦି, ଅ଼ଡ଼େ ନା଼ ପ୍ରବୁ ରାଜା କାତାତି ବାରେତି ଲାକ ମାନାସି ତୀରି କିତାୟି ଈଦି। 25 ନୀନୁ ମାଣ୍ସିୟାଁ ତା଼ଣାଟି ହେକ ଆ଼ଦି ଅ଼ଡ଼େ ବୂମିତି ଜ଼ନ୍ତୟାଁ ତଲେ ନୀ ବାସା ଆ଼ନେ, ଡ଼ୁକି କ଼ଡି ସମାନା ନୀନୁ ଜା଼ଡ଼ା ତିଞ୍ଜି, ଅ଼ଡ଼େ ହା଼ଗୁତି ମାଚୁ ତଲେ ଊଦିଦି, ଇଲେକିହିଁ ନିଙ୍ଗେ ତାକି ସା଼ତା କା଼ଲମି ହାନେ; ଡା଼ୟୁ ଲାକପୂରୁ ମାନାସି, ଏ଼ୱାସି ମାଣ୍ସିୟାଁ ରା଼ଜିତା ସା଼ଲୱି କିନେସି ଅ଼ଡ଼େ ଆମ୍ବାଆରାକି ଏ଼ଦାଆଁ ହୀହାଲି ମ଼ନ କିନେସି, ଏ଼ୱାଣାକି ଏ଼ୱାସି ହୀନେସି, ଈଦାଆଁ ନୀନୁ ପୁଞ୍ଜି। 26 ଅ଼ଡ଼େ, ମା଼ର୍ନୁ ଡାକିତି ଗୁଟୁ ପିସାଲି ତାକି ହୁକୁମି ହୀନି ଅର୍ତ ଈଦି; ମାହାପୂରୁ ସା଼ଲୱି କିନେସି, ଈଦାଆଁ ନୀନୁ ପୁଚି ଡା଼ୟୁ ନୀ ରା଼ଜି ନିଙ୍ଗେ ତାକି ଆ଼ନେ। 27 ଏ଼ଦାଆଁତାକି ହେ଼ ରାଜା, ନା଼ କାତା ୱେହ୍ନାୟି ନୀ ତା଼ଣା ଅ଼ପ୍ୱିଆ଼ପେ, ଅ଼ଡ଼େ ନୀନୁ ଦାର୍ମୁ ତଲେ ନୀ ପା଼ପୁ ବାରେ ଅ଼ଡ଼େ କାର୍ମା ଗାଟାରାଇଁ କାର୍ମା ମେହ୍ନାଣି ତଲେ ନୀନୁ ଲାଗେଏତାଣି ହେକ କିମୁ; ଆତିହିଁ ନୀ ହିତ୍ଡ଼ିତି କା଼ଲା ପାଡାଆ଼ହାଲି ଆ଼ଡିନେ।
ନବକୁଦ୍ନିସ୍ଚର ତାକି ବିଚାରା
28 ରାଜା ନବକୁଦ୍ନିସ୍ଚରକି ଈ ବାରେ ଆ଼ତେ। 29 ବା଼ର ଲେ଼ଞ୍ଜୁ ଡା଼ୟୁ ଏ଼ୱାସି ବାବିଲତି ରାଜା ମେ଼ଡ଼ା ଲାକ ରେ଼ଜିମାଚେସି। 30 ରାଜା ଈ କାତା ଏଲେଇଚେସି, "ନା଼ନୁ ଜାହାରା ବପୁ ଅ଼ଡ଼େ ବା଼ଡ଼୍ୟୁତି ସାମ୍ବ୍ରମି ତାକି କାଜା ଗା଼ଡ଼ା କିହାଲି ଏ଼ନାଆଁ କିହାମାଇଁ, ଈଦି କି ଏ଼ କାଜା ବାବିଲ ଆ଼ଏ ?"
31 ରାଜାତି ମୂମ୍ବୁତା ଈ କାତା ମାଣ୍ମ୍ବେ ମାଣ୍ମ୍ବେ ଲାକପୂରୁଟି ଈ ହା଼ଡା ଆ଼ତେ, "ହେ଼ ରାଜା ନବକୁଦ୍ନିସ୍ଚର, ନିଙ୍ଗେ ଈ କାତା ୱେସ୍ପି ଆ଼ହିମାଞ୍ଜାନେ, ନୀ ତା଼ଣାଟି ରା଼ଜି ହାଚେ। 32 ଇଞ୍ଜାଁ ନୀନୁ ମାଣ୍ସିୟାଁ ବିତ୍ରାଟି ହେକ ଆ଼ଦି ଅ଼ଡ଼େ ବାଟାତି ଜ଼ନ୍ତୟାଁ ତଲେ ନୀ ବାସା ଟା଼ୟୁ ଆ଼ନେ; ଡ଼ୁକି କ଼ଡି ସମାନା ନୀନୁ ହାରା ମେୟିଁଦି, ଇଲେକିଁ ନୀ ସା଼ତା କା଼ଲମି ହାନେ; ଡା଼ୟୁ ଆମ୍ବାଆସି ବାରେତି ଲାକ ମାନେସି ଏ଼ୱାସି ମାଣ୍ସିୟାଁ ରା଼ଜିତି ସା଼ଲୱି କିନେସି ଅ଼ଡ଼େ ଆମ୍ବାଆରାକି ଏ଼ୱାଣି ମ଼ନ ଏ଼ୱାଣାକି ଏ଼ଦାଆଁ ହୀନେସି, ଈଦାଆଁ ନୀନୁ ପୁଞ୍ଜି।"
33 ଏ଼ ଦେବୁଣିଏ ନବକୁଦ୍ନିସ୍ଚରକି ଏ଼ କାତା ଆ଼ତେ; ଅ଼ଡ଼େ, ଏ଼ୱାସି ମାଣ୍ସିୟାଁତି ବିତ୍ରା ହେକ ଆ଼ହାଁ ଡ଼ୁକି ସମାନା ହାରା ତିଚେସି, ଅ଼ଡ଼େ ତାନି ଆଙ୍ଗା ହା଼ଗୁତି ମାଚୁତା ଊଦିତେ, ଡା଼ୟୁ ତାନି ବା଼ଣାୟାଁ ଲାକ ଊମ୍ବିନି ପଟାତି କେଲ୍କା ଲେହେଁ ଅ଼ଡ଼େ ତାନି ଗ଼ର୍କା ପଟାତି ଗ଼ର୍କା ଲେହେଁ ପାଡା ଆ଼ତୁ।
ନବକୁଦ୍ନିସ୍ଚର ମାହାପୂରୁଇଁ ଜହରା କିନାୟି
34 ଏଚେଟିଏ ଏ଼ ବାର୍ସା ରା଼ତି ଡା଼ୟୁ ନା଼ନୁ ନବକୁଦ୍ନିସ୍ଚର ଲାକପୂରୁ ୱାକି ସିନିକିତେଏଁ, ଏଚେଟିଏ ନା଼ ସେତ୍ନା ନା଼ ତା଼ଣା ୱେଣ୍ତା ୱା଼ତେ, ଏଚେଟିଏ ନା଼ନୁ ବାରେତି ଲାକ ମାନାଣାଇଁ ଜହରା କିତେଏଁ ଅ଼ଡ଼େ ଆମ୍ବାଆସି କା଼ଲେଏ ନୀଡା ଡ଼ୟିନେସି ଏ଼ୱାଣାଇଁ ଆବିତେଏଁ;
ଇଚିହିଁ ଏ଼ୱାଣି ସା଼ଲୱି କିନାୟି କା଼ଲେଏତାୟି
ଅ଼ଡ଼େ ତାନି ରା଼ଜି ପା଼ଟୁ ପା଼ଟୁ ତାକି ଡ଼ୟିନେ।
ଇଞ୍ଜାଁ, ଦାର୍ତିତା ବାସା କିହାମାନାରି ବାରେ ଉଜେଏତାରି;
ଅ଼ଡ଼େ ଏ଼ୱାସି ଲାକପୂରୁତି ଜୁଜୁ କିନାରି ବିତ୍ରା ଅ଼ଡ଼େ ଦାର୍ତିତା ବାସା କିହାମାନାରି ବିତ୍ରା ଜାହାରା ମ଼ନ ତଲେ କାମା କିନେସି;
ଅ଼ଡ଼େ, ଆମ୍ବାଆସି ଏ଼ୱାଣି କେୟୁ ସାପି କିହାଲି ଆ଼ଡଅସି
ଅ଼ଡ଼େ ନୀନୁ ଏ଼ନାଆଁ କିହିମାଞ୍ଜି ଈଦାଆଁ ଏ଼ୱାଣାଇଁ ଏଲେଇଞ୍ଜାଲି ଆ଼ଡଅସି।
ଏ଼ ବେ଼ଲାତା ନା଼ ବୁଦି ନା଼ ତା଼ଣା ୱେଣ୍ତା ୱା଼ତେ ଅ଼ଡ଼େ ନା଼ ରା଼ଜିତି ଗା଼ୱୁରମି ତାକି ନା଼ ଉଜେଡ଼ି ନା଼ ତା଼ଣା ୱେଣ୍ତା ୱା଼ତେ; ଏଚେଟିଏ ନା଼ ମନ୍ତ୍ରି ଅ଼ଡ଼େ ନା଼ ସା଼ଲୱି କିନାରି ନାଙ୍ଗେ ପାରାତେରି; ଇଞ୍ଜାଁ, ନା଼ନୁ ନା଼ ରା଼ଜିତା ଆ଼ତେଏଁ ଅ଼ଡ଼େ ନା଼ ସାମ୍ବ୍ରମି ହା଼ରେକା ପାଡାଆ଼ତେ।
"ଏ଼ଦାଆଁତାକି ନା଼ନୁ ନବକୁଦ୍ନିସ୍ଚର ଏ଼ ଲାକପୂରୁତି ରାଜାଇଁ ଗା଼ୱୁରମି, ସାମ୍ବ୍ରମି ଅ଼ଡ଼େ ମା଼ନି କିହିମାଇଁ; ଏ଼ନାଆଁତାକି ଇଚିହିଁ ତାନି ବାରେ କାମା ସାତା ଅ଼ଡ଼େ ତାନି ଜିରୁ ବାରେ ନୀହାଁୟି; ଇଞ୍ଜାଁ, ଆମ୍ବାଆରି ବଡପଣ ଆ଼ନେରି, ଏ଼ୱାରାଇଁ ଊଣା କିହାଲି ଏ଼ୱାଣାକି ବା଼ଡ଼୍ୟୁ ମାନେ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)