ଏଜ୍ରା 1

ଜୀହୁଦି ଲ଼କୁ ୱେଣ୍ତା ହାଜାଲି କରସ ରାଜାତି ହୁକୁମି

1 ପାରସ୍ୟତି କରସ ରାଜା ସା଼ଲୱି କିନି ମୂଲୁ ବାର୍ସା ନ଼କିତା ଆ଼ନି କାତା ୱେହ୍‌ନି ଜିରିମିୟ ୱେସାମାନି ବ଼ଲୁ ଅ଼ଡ଼େ ରା଼ଚିତାଣି ପୂରା ଆ଼ହାଲି ତାକି ବାରେ ରା଼ଜିତା କାଜା ଗିୟାଁ ତଲେ ପ଼ଡ଼ୱି ଆ଼ହାଁ ରା଼ଚାହାଁ ୱେ଼କ୍‌ହାଲି ପ୍ରବୁ କରସଇଁ ମ଼ନତା ଏଲେଇଚେସି।

2 "ପାରସ୍ୟ ରାଜା କରସ ଈ କାତା ୱେସିମାନେସି, ‘ପ୍ରବୁ ଲାକପୂରୁତି ମାହାପୂରୁ ଦାର୍‌ତିତି ବାରେ ରା଼ଜି ନାଙ୍ଗେ ହୀହାମାଞ୍ଜାନେସି; ଅ଼ଡ଼େ ଏ଼ୱାସି ଜୀହୁଦା ଦେ଼ସାତି ଜିରୁସାଲମତା ତାଙ୍ଗେ ତାକି ର଼ ଇଲୁ ତିୟାରା କିହାଲି ନାଙ୍ଗେ ହୁକୁମି ହୀହାମାଞ୍ଜାନେସି। 3 ତାମି ବାରେ ଲ଼କୁ ବିତ୍ରା ମୀ ଆମ୍ବାଆରି ଜିକେଏ ଆ଼ପେସି, ତାନି ମାହାପୂରୁ ତାନି ସା଼ୟେମି ଆ଼ପେସି ଅ଼ଡ଼େ ଏ଼ୱାସି ଜୀହୁଦା ଦେ଼ସାତି ଜିରୁସାଲମତା ହାଜାହାଁ ପ୍ରବୁ ଇସ୍ରାୟେଲତି ମାହାପୂରୁ ଜିରୁସାଲମତି ପ୍ରା଼ତାନା ଇଲୁ ତିୟାରା କିପାସି; ଏ଼ୱାସି ମାହାପୂରୁ। 4 ଆମିନି ଲ଼କୁ ବାବିଲ ଦେ଼ସାଟି ଜିରୁସାଲମତା ୱେଣ୍ତା ହାଜାଲି ଲ଼ଡ଼ା ମାନେ ଏ଼ୱାରାଇଁ ସା଼ୟେମି କିହାଲି ତାମି ପା଼ଡ଼ିତି ଲ଼କୁ ଜିରୁସାଲମତି ମାହାପୂରୁ ଇଲୁ ତାକି ଜାହାରା ମ଼ନତି ପୂଜା ପିସ୍‌ପେ ବାଂଗାରା, ୱେଣ୍ତି ହା଼ରେକା ଆ଼ସ୍ତି ଅ଼ଡ଼େ ଜ଼ନ୍ତତି ହୀହାଁ ଏ଼ୱାରି ସା଼ୟେମି କିପାରି।’"

5 ଏଚିବେ଼ଲା ଜୀହୁଦା ଅ଼ଡ଼େ ବିନ୍ୟାମିନ୍‌ ଆକୁୟାଁ କୂଡ଼ାତି କାଜାରି, ଅ଼ଡ଼େ ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ଇଚିହିଁ ଜିରୁସାଲମତି ପ୍ରା଼ତାନା ଇଲୁ ତିୟାରା କିହାଲି ହାଜାଲି ତାକି ମାହାପୂରୁ ଏମିନି ବାରେତି ମ଼ନତା କାତା ଆ଼ତେସି, ଏ଼ୱାରି ନିଙ୍ଗିତେରି। 6 ଇଞ୍ଜାଁ ଜାହାରା ମ଼ନ ତଲେ ହୀନି ଆ଼ସ୍ତି ପିସ୍‌ପେ ଏ଼ୱାରି ସା଼ରିୱାକିତି ଲ଼କୁ ବାରେ ବାଂଗାରା, ୱେଣ୍ତିତି ଆ଼ସ୍ତି ଅ଼ଡ଼େ ଜ଼ନ୍ତ ଇଞ୍ଜାଁ ହା଼ରେକା ଦାରାଗାଟି ଆ଼ସ୍ତି ହୀହାଁ ଏ଼ୱାରି କେୟୁ ବା଼ଡ଼୍‌ୟୁ କିତେରି।

7 ଅ଼ଡ଼େ ନବକୁଦ୍‌ନିସ୍‌ଚର ପ୍ରବୁତି ଇଲୁତି ଏମିନି ବାରେ ଆ଼ସ୍ତି ଜିରୁସାଲମଟି ତାଚାହାଁ ତାନି ପେ଼ନୁତି ଇଲୁତା ଇଟାମାଚେସି, କରସ ରାଜା ଏ଼ ବାରେ ହ଼ପ୍‌ହା ତାତେସି। 8 ପାରସ୍ୟତି ରାଜା କରସ ଗୁମୁସ୍ତା ମିତ୍ରଦାତ କେୟୁଟି ଏ଼ ବାରେ ତାଚାହାଁ ଜୀହୁଦାତି ସା଼ଲୱିକିନି ସେସବସରକି ଏଜି କିହାଁ ହୀତେସି।

9 ଏ଼ ବାରେ ଆ଼ସ୍ତିତି ଲେକା; କଡ଼େ ଦସ ବାଂଗାରା ସାଡ଼୍‌ୱାୟାଁ, ର଼ ମା଼ଣା ୱେଣ୍ତି ସାଡ଼୍‌ୱାୟାଁ, କଡ଼େ ନ଼ଗଟା ପିପେଲିକା; 10 କଡ଼େ ଦସ ବାଂଗାରାତି ଗହ୍‌ନି ସ଼ଲାୟାଁ, ସା଼ରି ୱାଞ୍ଜା ଦସଗଟା ୱେଣ୍ତିତି ପା଼ଗାତି ଗହ୍‌ନି ସ଼ଲାୟାଁ, ଇଞ୍ଜାଁ ର଼ ମା଼ଣା ଏଟ୍‌କା ଏଟ୍‌କାତି ସ଼ଲାୟାଁ ମାଚୁ।

11 ବାରେ ପା଼ସା ମା଼ଣା ସା଼ରି ୱାଞ୍ଜା ବାଂଗାରା ଅ଼ଡ଼େ ୱେଣ୍ତିତି ଆ଼ସ୍ତି ମାଚେ; ସେସବସର ବାବିଲଟିଏ ଜିରୁସାଲମ ୱେଣ୍ତା ହାନି ବେ଼ଲାତା ତାନି ତଲେ ବାବିଲନତା ଅ଼ୱି ଆ଼ହାମାଚି ଲ଼କୁଣି ଅ଼ଡ଼େ ଈ ବାରେ ଆ଼ସ୍ତି ତାତେସି।