1 ଏଚେଟିଏ ମାହାପୂରୁ ନ଼କିତା ଆ଼ନି କାତା ୱେହ୍‌ନି ହାଗୟ ଅ଼ଡ଼େ ଇଦ ମୀର୍‌ଏସି ଜିକରିୟ, ଈ ନ଼କିତା ଆ଼ନି କାତା ୱେହ୍‌ନାରି ଜୀହୁଦା ଅ଼ଡ଼େ ଜିରୁସାଲମତି ଜୀହୁଦି ଲ଼କୁ ତା଼ଣା ନ଼କିତା ଆ଼ନି ବ଼ଲୁ ୱେ଼କ୍‌ହେରି; ଏ଼ୱାରି ଇସ୍ରାୟେଲତି ମାହାପୂରୁ ଦ଼ରୁଟି ଏ଼ୱାରି ତା଼ଣା ନ଼କିତା ଆ଼ନି ବ଼ଲୁ ୱେ଼କ୍‌ହେରି। 2 ଏଚେଟିଏ ସଲ୍‌ଟିୟେଲ ମୀର୍‌ଏସି ଜିରୁବାବିଲ୍‌ ଅ଼ଡ଼େ ଜସାଦକ ମୀର୍‌ଏସି ଜେସୁୟ ନିଙ୍ଗାହାଁ ଜିରୁସାଲମତି ମାହାପୂରୁ ଇଲୁ ତିୟାରା କିହାଲି ମା଼ଟ୍‌ହେରି; ଅ଼ଡ଼େ ମାହାପୂରୁତି ନ଼କିତା ଆ଼ନି କାତା ୱେହ୍‌ନାରି ଏ଼ୱାରି ତଲେ ମାଞ୍ଜାହାଁ ଏ଼ୱାରାଇଁ ସା଼ୟେମି କିତେରି।

3 ଏଚିବେ଼ଲାତା ତତନୟ, ପରାତ୍‌ କାଡା ଆତାଲା ଦେ଼ସାତି କାଜାସି ଅ଼ଡ଼େ ସତର-ବସଣୟ ଅ଼ଡ଼େ ଏ଼ୱାରି ତ଼ଣେସିଙ୍ଗା ୱା଼ହାଁ ଏ଼ୱାରାଇଁ ୱେଚେରି, "ଈ ଇଲୁ ତିୟାରା କିହାଲି ଅ଼ଡ଼େ ଈ କ଼ଟାତି ରା଼ପ୍‌ହାଲି ଆମ୍ବାଆସି ମିଙ୍ଗେ ହୁକୁମି ହିୟାତେସି ?" 4 ଏଚେଟିଏ ମା଼ମ୍ବୁ ଏ଼ୱାରାଇଁ ଏଲେକିହିଁଏ ଏଲେଇଚମି; ଏ଼ୱାରି ୱେଞ୍ଜାତେରି, "ଈ ତିୟାରା କିହିମାନାରି ଏ଼ନି ଦର୍କା ?" 5 ସାମା ଜୀହୁଦି ଲ଼କୁତି ପ୍ରାଚିନାଙ୍ଗାଣି ମାହାପୂରୁ କାନୁ ମାଚାକି ଦାରିୟାବସ ନ଼କିତା ଈ କାତା ଏଗାଆ ଗାଟାୟି ଅ଼ଡ଼େ ଆ଼କୁତା ଏ଼ କାତା ୱେଣ୍ତେ ୱା଼ଆପାତେକା ସାତ୍ରୁୟାଁ ଏ଼ୱାରାଇଁ କାମାଟି ସାପି କିଆତେରି।

6 ତତନୟ, ପରାତ୍‌ କାଡା ଆତାଲା ଦେ଼ସାତି କାଜାସି ଅ଼ଡ଼େ ସତର-ବସଣୟ ଅ଼ଡ଼େ କାଡା ଆତାଲାତି ତାମି ତ଼ଣେସିଙ୍ଗା ଅପର୍ସକିୟ ଲ଼କୁତି ଦାରିୟାବସ ରାଜା ତା଼ଣା ପାଣ୍ତିତି ଆ଼କୁତା ରା଼ଚିତାୟି; 7 ଏ଼ୱାରି ତାନି ତା଼ଣା ଏମିନି ଆ଼କୁ ପାଣ୍ତାମାଚେରି, ଏମ୍ବାଆଁ ଇଲେକିଁ ରା଼ସ୍‌କି ଆ଼ହାମାଚେ; "ରାଜା ଦାରିୟାବସତି ବାରେ ହିତ୍‌ଡ଼ି ଆ଼ପେ।"

8 "ରାଜା ତା଼ଣା ୱେହ୍‌ନି କାତା ଈଦି, ମା଼ମ୍ବୁ ଜୀହୁଦା ରା଼ଜିତା କାଜା ମାହାପୂରୁତି ଇଲୁତା ହାଜାମାଚମି, ଏ଼ଦି କାଜା କାଜା ୱାଲ୍‌କାତଲେ ତିୟାରା ଆ଼ହିମାନେ, କାତିତା ପାଟିୟାକା କୁଗିକିୱି ଆ଼ହିମାନୁ, ଅ଼ଡ଼େ ଈ କାମା ହା଼ରେକା ଜାତ୍‌ନୁ ତଲେ ଆ଼ହିମାନେ, ଏ଼ୱାରି କେୟୁତଲେ ପୂରା ଆ଼ହିମାନେ।"

9 ଏ଼ଦାଆଁତାକି ମା଼ମ୍ବୁ ଏ଼ ପ୍ରାଚିନାଙ୍ଗାଣି ୱେଞ୍ଜାହାଁ ଏଲେଇଚମି, "ଈ ଇଲୁ ତିୟାରା କିହାଲି ଅ଼ଡ଼େ ଈ କ଼ଟାତି ରା଼ପ୍‌ହାଲି ଆମ୍ବାଆସି ମିଙ୍ଗେ ହୁକୁମି ହିୟାତେସି ?" 10 ଇଞ୍ଜାଁ ମା଼ମ୍ବୁ ନିଙ୍ଗେ ୱେସାଲି ତାକି ଏ଼ୱାରି କାଜାରି ଦ଼ର୍‌କା ରା଼ଚା ଅ଼ହାଲି ଏ଼ୱାରି ଦ଼ରୁ ୱେଚମି।

11 ଏଚେଟିଏ ଏ଼ୱାରି ମାଙ୍ଗେ ଈ କାତା ୱେସ୍ତାତେରି, "ମା଼ମ୍ବୁ ଲାକପୂରୁ ଅ଼ଡ଼େ ଦାର୍‌ତିତି ମାହାପୂରୁ ହ଼ଲିୟାଙ୍ଗାତମି, ଇଞ୍ଜାଁ ଈ ଆମିନି ଇଲୁ ତିୟାରା କିହିମାନମି, ଈଦି ହା଼ରେକା ବାର୍ସା ନ଼କେଏ ତିୟାରା ଆ଼ହାମାଚେ, ଇସ୍ରାୟେଲତି ର଼ କାଜା ରାଜା ଏ଼ଦାଆଁ ତିୟାରା କିହାଁ ରା଼ପ୍‌ହା ମାଚେସି। 12 ସାମା ମା଼ ଆକୁ ଆ଼ବାୟାଁ ଲାକପୂରୁତି ମାହାପୂରୁଇଁ କ଼ପା କିହାଲିଏ, ଏ଼ୱାସି ଏ଼ୱାରାଇଁ ବାବିଲତି ରାଜା କଲ୍‌ଦିୟ ନବକୁଦ୍‌ନିସ୍‌ଚର କେୟୁତା ହେର୍‌ପାଲିଏ, ଏ଼ୱାସି ଈ ମାହାପୂରୁତି ଇଲୁ କୁଡ଼୍‌ପୁନା଼ସା କିହାଁ ଲ଼କୁଣି ବାବିଲ ଦେ଼ସାତା ଅ଼ତେସି। 13 ସାମା ବାବିଲତି ରାଜା କରସ ସା଼ଲୱି କିତି ମୂଲୁ ବାର୍ସାତା ମାହାପୂରୁତି ଈ ଇଲୁ ତିୟାରା କିହାଲି କରସ ରାଜା ହୁକୁମି ହିୟାତେସି। 14 ଅ଼ଡ଼େ ନବକୁଦ୍‌ନିସ୍‌ଚର ଜିରୁସାଲମ ମାହାପୂରୁ ଇଲୁଟି ଆମିନି ବାଂଗାରା, ୱେଣ୍ତି ଗିନା ସିପା ଅ଼ହାଁ ବାବିଲତି ଦେ଼ୱୁଡ଼ିତା ତାଚା ମାଚେସି, ଏ଼ ବାରେ କରସ ରାଜା ବାବିଲତି ଦେ଼ୱୁଡ଼ିଟି ହ଼ପ୍‌ହା ହିୟାତେସି, ଇଞ୍ଜାଁ ଏ଼ ବାରେ ସେସବସର ଦ଼ରୁତି ତା଼ନୁ ତୀରି କିହାମାନି ସା଼ଲୱି କିନାଣି କେୟୁତା ହେର୍‌ପିଆ଼ତୁ; 15 ଅ଼ଡ଼େ ରାଜା ଏ଼ୱାଣାଇଁ ଏଲେଇଚେସି, ‘ଈ ବାରେ ଗିନା ସିପା ଅ଼ହାଁ ଜିରୁସାଲମତି ମାହାପୂରୁ ଇଲୁତା ଇଟାମୁ ଇଞ୍ଜାଁ ମାହାପୂରୁ ଇଲୁ ତାନି ଟା଼ୟୁତା ତିୟାରା ଆ଼ପେ।’ 16 ଏଚେଟିଏ ଏ଼ ସେସବସର ୱା଼ହାଁ ଜିରୁସାଲମତା ମାହାପୂରୁ ଇଲୁତି ପୁନାଦି କେ଼ପିତେସି; ଅ଼ଡ଼େ ଏ଼ ବେ଼ଲାଟିଏ ନୀଏଁ ପାତେକା ଏ଼ଦି ତିୟାରା ଆ଼ହିମାନେ, ଆ଼ତି ଜିକେଏ ଏ଼ଦି ପୂରା ଆ଼ହାହିଲେଏ।"

17 "ଏଚେ଼ତା ରାଜାକି ନେହେଁ ତ଼ଞ୍ଜାଆ଼ନେ, ଆତିହିଁ କରସ ରାଜା ଜିରୁସାଲମତା ମାହାପୂରୁ ଇଲୁ ତିୟାରା କିହାଲି ହୁକୁମି ହୀହାମାଚେସି କି ଆ଼ଏ, ଏ଼ଦାଆଁ ବାବିଲତି ରାଜା ଇଲୁତା ସିନିକିୱି ଆ଼ପେ, ଇଞ୍ଜାଁ ଈ କାତା ତାକି ରାଜା ମା଼ ତା଼ଣା ତାନି ଅଣ୍‌ପୁତି କାତା ପାଣ୍ତାପେସି।"