1 ଈ ବାରେ କାମା ରା଼ତି ଡା଼ୟୁ କାଜା କାଜାରି ନା଼ ତା଼ଣା ୱା଼ହାଁ ଏଲେଇଞ୍ଜାତେରି, "ଇସ୍ରାୟେଲ ଲ଼କୁ, ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ଏଟ୍‌କା ଦେ଼ସାତି କୂଡ଼ାତାରି ତା଼ଣାଟି ଜାହାରାଇଁ ଏଟ୍‌କା କିଆନା ଏ଼ୱାରି, ଇଚିହିଁ, କିଣାନିୟ, ହୀତିୟ, ପରିସିୟ, ଜିବୁସିୟ, ଅମନିୟ, ମୟାବିୟ, ମିସରିୟ ଅ଼ଡ଼େ ଇମରିୟ ଲ଼କୁତି ଅ଼ପାଆଗାଟି କାମା ଲେହେଁ କିହିମାନେରି। 2 ଇଚିହିଁ ଏ଼ୱାରି ତାମ୍‌ଙ୍ଗେ ଅ଼ଡ଼େ ତାମି ମୀର୍‌କା ତାକି ତାମି ମା଼ସ୍‌କାଣି ଅ଼ହିମାନେରି; ଇଲେକିହିଁ ସୁଦୁ କୂଡ଼ା ଏଟ୍‌କା ଦେ଼ସାତି କୂଡ଼ାତାରି ତଲେ ଜାହାରାଇଁ ଆଟ୍‌ହିମାନେରି; ଅ଼ଡ଼େ ଈ ଦ଼ହତା କାଜାରି ଅ଼ଡ଼େ ସା଼ଲୱି କିନାରି କେୟୁ କାଜାୟି ଆ଼ହାମାନେ।"

3 ଏଚେଟିଏ ନା଼ନୁ ଈ କାତା ୱେଞ୍ଜାଲିଏ, ନା଼ ହିମ୍ବରି ଅ଼ଡ଼େ ସକା ଗେସାହାଁ ନା଼ ତା଼ର୍ୟୁଁ ଅ଼ଡ଼େ ହ଼ଡ଼ାୟାଁ ଡାପ୍‌ହାଁ ଆଡାଜାକା ଆ଼ହାଁ କୁଗିତେଏଁ। 4 ଏଚିବେ଼ଲା ବାବିଲତା ଅ଼ୱିଆ଼ହାମାନି ଲ଼କୁତି ଦ଼ହତାକି, ଇସ୍ରାୟେଲତି ମାହାପୂରୁ ବ଼ଲୁତା ତୀର୍‌ଗିମାନି ବାରେ ଲ଼କୁ ନା଼ ତା଼ଣା ରୁଣ୍ତା ଆ଼ତେରି; ଇଞ୍ଜାଁ ନା଼ନୁ ମିଡ଼୍‌ଅଲାତି ପୂଜା ବେ଼ଲା ପାତେକା ଆଡାଜାକା ଆ଼ହାଁ କୁଗିତେଏଁ।

5 ଏଚେଟିଏ ମିଡ଼୍‌ଅଲାତି ପୂଜା ବେ଼ଲାତା ନା଼ନୁ ନା଼ ଦୁକୁଟି ନିଙ୍ଗିତେଏଁ, ନା଼ ଆଙ୍ଗାତା ନା଼ ଗେଞ୍ଜିତି ହିମ୍ବରି ଅ଼ଡ଼େ ସକା ମାଚେ; ଇଞ୍ଜାଁ ନା଼ନୁ ନା଼ ମେଣ୍ତା କୁତାହାଁ ପ୍ରବୁ ନା଼ ମାହାପୂରୁ ୱାକି କେୟୁ ପେର୍‌ହାଁ ଏଲେଇଚେଏଁ, 6 "ହେ଼ ନା଼ ମାହାପୂରୁ ନା଼ନୁ ନୀ ୱାକି ମୂମ୍ବୁ ପେର୍‌ହାଲି ଲାଜା ଆ଼ହିମାଇଁ, ହେ଼ ନା଼ ମାହାପୂରୁ ନା଼ ମୂମ୍ବୁ ୱା଼ଡ଼ାମାନେ; ଇଚିହିଁ ମା଼ ଲ଼କୁତି ଦ଼ହ ମା଼ ତା଼ର୍ୟୁଁ ଲାକ ପାଡା ଆ଼ହାମାନେ, ଅ଼ଡ଼େ ମା଼ ଦ଼ହ ଲାକପୂରୁ ଏଜାମାନେ। 7 ମା଼ ଆକୁ ଆ଼ବାୟାଁ ଦିନାଟିଏ ନୀଞ୍ଜୁ ପାତେକା ମା଼ମ୍ବୁ ହା଼ରେକା ଦ଼ହ କିହାମାନମି; ମା଼ ଦ଼ହ ତାକି ନୀଞ୍ଜୁତି ନୀହାଁୟିତା ମା଼ମ୍ବୁ, ମା଼ ରାଜାୟାଁ, ମା଼ ପୂଜେରାଙ୍ଗା ଏଟ୍‌କା ଏଟ୍‌କା ଦେ଼ସାତି ରାଜାୟାଁ କେୟୁତା, କାଣ୍ତା ତଲେ, ଦସ୍‌ପି ଆ଼ହାଁ ଅ଼ଡ଼େ ସ଼ରୁ ଆ଼ନି ତା଼ଣା ମୂମ୍ବୁ ୱା଼ଡ଼ାହାଁ ହେର୍‌ପି ଆ଼ହାମାନମି। 8 ଇଞ୍ଜାଁ ମା଼ ମାହାପୂରୁ ଏ଼ନିକିଁ ମା଼ କାନୁ ଦେତାନେସି, ଅ଼ଡ଼େ ବାବିଲତା ମାନି ବେ଼ଲାତା ମାଙ୍ଗେ ହିତ୍‌ଡ଼ି ହିୟାନେସି, ଏ଼ଦାଆଁତାକି ଗେଲ୍‌ପି ଆ଼ହାଲି ମାଙ୍ଗେ ଏଚେକା ପିସାଲି ଅ଼ଡ଼େ ତାନି ସୁଦୁ ଟା଼ୟୁତା ମାଙ୍ଗେ ର଼ ମୁଣ୍ତା କିହାଲି ନୀଏଁ ପ୍ରବୁ ମା଼ ମାହାପୂରୁ ତା଼ଣାଟି ଗା଼ଡ଼େକା ତାକି କାର୍ମା ତ଼ସ୍‌ପି ଆ଼ହାମାଞ୍ଜାନେ। 9 ଇଚିହିଁ ମା଼ର ବାବିଲତା ଅ଼ୱିଆ଼ହାମାନି ଲ଼କୁତୱି, ଆ଼ତି ଜିକେଏ ମା଼ ଅ଼ୱିଆ଼ହାମାନି ତା଼ଣା ମା଼ ମାହାପୂରୁ ମାଙ୍ଗେ ପିସାମାଞ୍ଜଅସି, ସାମା ମାଙ୍ଗେ ବା଼ର୍ସୁ ହୀହାଲିତାକି ମା଼ ମାହାପୂରୁ ଇଲୁ କିହାଲି ତାକି ଇଞ୍ଜାଁ ଡୀହାମାନାଣି ୱେଣ୍ତେ କିହାଲି ତାକି, ଇଞ୍ଜାଁ ଜୀହୁଦା ଅ଼ଡ଼େ ଜିରୁସାଲମତା ମାଙ୍ଗେ ର଼ କ଼ଟା ହୀହାଲି ତାକି ଏ଼ୱାସି ପାରସ୍ୟ ରାଜାୟାଁ କାନୁତା ମାଙ୍ଗେ କାର୍ମା ତ଼ସାମାଞ୍ଜାନେସି।"

10 "ନୀଏଁ ଜିକେଏ ମା଼ ମାହାପୂରୁ, ଏଚେଟିଏ ମା଼ମ୍ବୁ ଏ଼ନାଆଁ ଇନମି ? 11 ନୀନୁ ନୀ ହ଼ଲେଏସି ନ଼କିତା ଆ଼ନି କାତା ୱେହ୍‌ନାରି ତା଼ଣାଟି ହୁକୁମି କିହାଁ ଏଲେଇଞ୍ଜାମାଚି, ‘ମୀରୁ ଏମିନି ଦେ଼ସା ଅଦିକାରା କିହାଲି ହାଜିମାଞ୍ଜେରି, ଏ଼ଦି ଏଟ୍‌କା ଦେ଼ସାତି କୂଡ଼ାତାରି ଲାଗେଏ ତା଼ଣାଟି ଲାଗେଏ ଆ଼ହାମାନେ, ଏ଼ୱାରି ଅ଼ପାଆଗାଟି କାମା ଦେ଼ସାତି ର଼ ହାନ୍ଦିଟିଏ ଏଟ୍‌କା ହାନ୍ଦି ପାତେକା ଏ଼ୱାରାଇଁ ଲାଗେଏ କିହାମାନେ। 12 ଏ଼ଦାଆଁତାକି ମୀରୁ ମୀ ମା଼ସ୍‌କାଣି ଏ଼ୱାରି ମୀର୍‌କାକି ବୀହା ହୀଆଦୁ, ଅ଼ଡ଼େ ମୀ ମୀର୍‌କାକି ଏ଼ୱାରି ମା଼ସ୍‌କାଣି ତାଆଦୁ, ଏ଼ୱାରି ହିତ୍‌ଡ଼ି କି ନେହେଁ ଏଚେଲା ଅଣ୍‌ପାଆଦୁ; ଏଚେଟିଏ ମୀରୁ ବା଼ଡ଼୍‌ୟୁ ଆ଼ଦେରି ଅ଼ଡ଼େ ଦେ଼ସାତା ନେହିଁ ଆ଼ସ୍ତି ତିଞ୍ଜେରି ଇଞ୍ଜାଁ କା଼ଲେଏ ମୀ ମୀର୍‌କା ମା଼ସ୍‌କା ତାକି ଅଦିକାରା ଇଟା ହାଜେରି।’ ସାମା ମା଼ମ୍ବୁ ନୀ ଈ ବାରେ ହୁକୁମି ପିସାମାନମି।"

13 "ଏ଼ଦାଆଁତାକି ହେ଼ ମା଼ ମାହାପୂରୁ, ମା଼ ଲାଗେଏତି କାମା ଅ଼ଡ଼େ କାଜା ଦ଼ହ ତାକି ମା଼ କ଼ସମି ଈ ବାରେ ଆ଼ତି ଜିକେଏ ନୀନୁ ମା଼ ଦ଼ହତି ଡଣ୍ତଟି ଊଣା ଡଣ୍ତ ମାଙ୍ଗେ ହୀହାଁ ମା଼ ଲେହେଁତି ଲ଼କୁଣି ଇଟାମାଞ୍ଜାଦି, 14 ଈଦାଆଁ ମେସାହାଁ ମା଼ମ୍ବୁ ଏ଼ନାଆଁ ନୀ ହୁକୁମି ଊରିନମି ଅ଼ଡ଼େ ଈ ଅ଼ପାଆଗାଟି କାମା କିନି ଏଟ୍‌କା କୂଡ଼ାତାରି ତଲେ ୱେଣ୍ତେ ବୀହା କିନମି ? କିତିହିଁ ନୀନୁ ଏ଼ନାଆଁ ମାଙ୍ଗେ ବାରେ ନା଼ସା କିଆ ପାତେକା କାର୍‌ବି ଆ଼ଅତି ? ଏଚେଟିଏ ଆମ୍ବାଆରି ଜିକେଏ ଡ଼ୟଅରି। 15 ହେ଼ ପ୍ରବୁ, ଇସ୍ରାୟେଲତି ମାହାପୂରୁ, ନୀନୁ ଦାର୍ମୁ ଗାଟାତି; ଇଚିହିଁ ମା଼ମ୍ବୁ ନୀଞ୍ଜୁ ପାତେକା ଗେଲ୍‌ପିଆ଼ହାଁ ଡ଼ୟାମାନମି; ମେହ୍‌ମୁ ମା଼ମ୍ବୁ ନୀ ନ଼କିତା ଜାହାରା ଦ଼ହ ତଲେ ଦ଼ହଗାଟାତମି ଆ଼ହାମାନମି; ଇଚିହିଁ ଏ଼ଦାଆଁତାକି ଆମ୍ବାଆସି ନୀ ନ଼କିତା ନିଚାଲି ଆ଼ଡଅସି।"