ଏଜ୍ରା 4

ମାହାପୂରୁ ଇଲୁ ୱେଣ୍ତେ ତିୟାରା କିହାଲି ସା଼ସ୍ତି ହୀନାୟି

1 ଏଚେଟିଏ ବାବିଲତା ମାନି ଲ଼କୁ ପ୍ରବୁ ଇସ୍ରାୟେଲତି ମାହାପୂରୁ କ଼ସମି ର଼ ଇଲୁ ତିୟାରା କିହିମାନେରି ଇଞ୍ଜିଁ ଜୀହୁଦା ଅ଼ଡ଼େ ବିନ୍ୟାମିନ୍‌ ସାତ୍ରୁୟାଁ ୱେଚେରି। 2 ଏଚିବେ଼ଲା ଏ଼ୱାରି ଜିରୁବାବିଲ୍‌ ଅ଼ଡ଼େ ତାଞ୍ଜି କୂଡ଼ାତି କାଜାରି ତା଼ଣା ୱା଼ହାଁ ଏ଼ୱାରାଇଁ ଏଲେଇଚେରି, "ମା଼ମ୍ବୁ ମୀ ତଲେ ତିୟାରା କିନମି; ଇଚିହିଁ ଏ଼ନିକିଁ ମୀରୁ ଏଲେକିହିଁଏ ମା଼ମ୍ବୁ ମୀ ମାହାପୂରୁଇଁ ପାରିମାନମି; ଅ଼ଡ଼େ ଅସୁରିୟ ରାଜା ଏସର୍‌ହଦନ୍‌, ଆମ୍ବାଆସି ମାଙ୍ଗେ ଇମ୍ବାଆଁ ତାଚାମାଞ୍ଜାନେସି, ଏ଼ୱାଣି ବେ଼ଲାଟିଏ ମା଼ମ୍ବୁ ଏ଼ୱାଣି କ଼ସମି ପୂଜା କିହିମାନମି।"

3 ସାମା ଜିରୁବାବିଲ୍‌ ଅ଼ଡ଼େ ଜେସୁୟ ଇଞ୍ଜାଁ ଇସ୍ରାୟେଲତି ଏଟ୍‌କା ତାଞ୍ଜିୟାଁ କୂଡ଼ାତି କାଜାରି ଏ଼ୱାରାଇଁ ଏଲେଇଚେରି, "ମା଼ ମାହାପୂରୁ କ଼ସମି ଇଲୁ ତିୟାରା କିହାଲି ମା଼ ତଲେ ମୀ ଏ଼ନି ଆଣ୍ତ୍‌ୱି ଆ଼ନାୟି ହିଲେଏ; ସାମା ମାଙ୍ଗେ ତାକି ପାରସ୍ୟତି କରସ ରାଜା ହୁକୁମି ତଲେ ମା଼ମ୍ବୁ ରୁଣ୍ତା ଆ଼ହାଁ ଇସ୍ରାୟେଲ ମାହାପୂରୁ ପ୍ରବୁ କ଼ସମି ତିୟାରା କିନମି।"

4 ଏଚେଟିଏ ଦେ଼ସାତି ଲ଼କୁ ଜୀହୁଦାତି ଲ଼କୁ କେୟୁ ହୀଣି କିହାଲି ଅ଼ଡ଼େ ତିୟାରା କିନି କାମାତା ସା଼ସ୍ତି ହୀହାଲି ମା଼ଟ୍‌ହେରି, 5 ଇଞ୍ଜାଁ ଏ଼ୱାରି କିହାଲି ଅଣ୍‌ପାମାନାଣି ନସ୍ତ କିହାଲି ପାରସ୍ୟ ରାଜା କରସ ମାନି ପାତେକା ଅ଼ଡ଼େ ପାରସ୍ୟ ରାଜା ଦାରିୟାବସ ଅଦିକାରା ପାତେକା ଏ଼ୱାରି କ଼ପାଟି ୱେହ୍‌ନାରାକି ଟାକାୟାଁ ହୀହାଁ ଇଟିତେରି।

6 ଅକେସରସ ସା଼ଲୱି କିହାଲି ମା଼ଟ୍‌ନି ବେ଼ଲାତା ଜୀହୁଦା ଅ଼ଡ଼େ ଜିରୁସାଲମତା ବାସା କିହାମାନି ଲ଼କୁତି ସାତ୍ରୁୟାଁ ଏ଼ୱାରି କ଼ପାଟି ଆ଼କୁ ରା଼ଚିତେରି।

ଅର୍ତକ୍ୟସ୍ତତି ଆ଼କୁ

7 ଅ଼ଡ଼େ ୱେଣ୍ତେ, ଅର୍ତକ୍ୟସ୍ତ ଅଦିକାରା ବେ଼ଲାତା ବିସ୍‌ଲମ, ମିତ୍ରଦାତ, ଟାବେଲ ଅ଼ଡ଼େ ତାନି ଏଟ୍‌କାତି ତ଼ଣେସିଙ୍ଗା ପାରସ୍ୟ ରାଜା ଅର୍ତକ୍ୟସ୍ତ ତା଼ଣା ଆ଼କୁ ରା଼ଚିତେରି; ଏ଼ ଆ଼କୁ ଅରାମିୟ ହା଼ଡାତଲେ ରା଼ଚିତାୟି ଇଞ୍ଜାଁ ପ଼ଡ଼ୱି ଆ଼ତାଟି ହା଼ଡା ତିରିମ୍ଣିପ୍‌ହା ମାଚେରି।

8 ରହୁମ୍‌ ମନ୍ତ୍ରି ଅ଼ଡ଼େ ସିମ୍‌ସୟ ରା଼ଚିନାସି ଅର୍ତକ୍ୟସ୍ତ ରାଜା ତା଼ଣା ଜିରୁସାଲମ କ଼ପାଟି ଇଲେକିହିଁ ଆ଼କୁ ରା଼ଚିତେରି;

9 "ରହୁମ୍‌ ମନ୍ତ୍ରି ଅ଼ଡ଼େ ସିମ୍‌ସୟ ରା଼ଚିନାସି ଇଞ୍ଜାଁ ଏ଼ୱାରି ତଲେତି ଏଟ୍‌କାତି ତ଼ଣେସିଙ୍ଗା ବାରେ, ଇଚିହିଁ ଦିନିୟ ଅ଼ଡ଼େ ଅପର୍ସ୍ତକିୟ, ଟର୍ପଲିୟ, ଅପର୍‌ସିୟ, ଅର୍କବିୟ, ବାବିଲନିୟ, ସୁସନିୟ, ଦେହ୍‌ୱିୟ, ଏଲାମିୟ ଲ଼କୁ, 10 ମା଼ନିଗାଟି କାଜା ଅସ୍‌ନପ୍‌ପର ତା଼ଣାଟି ୱା଼ହାମାନାୟି ଇଞ୍ଜାଁ ସମରିୟା ଗା଼ଡ଼ାତା ଅ଼ଡ଼େ ପରାତ୍‌ କାଡା ଆତାଲା ଦେ଼ସାତି ଏଟ୍‌କା ଏଟ୍‌କା ଟା଼ୟୁତା ତୀରି ଆ଼ହାମାନି ବାରେ କୂଡ଼ାତାରି ରା଼ଚିମାନେରି।"

11 ଏ଼ୱାରି ଅର୍ତକ୍ୟସ୍ତ ରାଜା ତା଼ଣା ଏମିନି ଆ଼କୁ ପାଣ୍ତାମାଚେରି, ଏମ୍ବାଆଁ ରା଼ଚାମାଚାୟି ଈଦି; "ପରାତ୍‌ କାଡା ଆତାଲାତି ଲ଼କୁ ନୀ ହ଼ଲିୟାଙ୍ଗା ତା଼ଣାଟି, 12 ରାଜା ତା଼ଣା ୱେହ୍‌ନି କାତା ଈଦି, ‘ନୀ ତା଼ଣାଟି ୱା଼ହାମାନି ଜୀହୁଦି ଲ଼କୁ ଜିରୁସାଲମତା ମା଼ ତା଼ଣା ୱା଼ହାମାନେରି; ଏ଼ୱାରି ଏ଼ କିଲିବିଲି ଅ଼ଡ଼େ ଲାଗେଏତି ଗା଼ଡ଼ା ତିୟାରା କିହିମାନେରି, ଅ଼ଡ଼େ କ଼ଟା ରା଼ପ୍‌ହାଁ ପୁନାଦି କିହିମାନେରି।’ 13 ରାଜାକି ମା଼ ୱେହ୍‌ନି କାତା ଈଦି, ‘ଏଚେ଼ତା ଈ ଗା଼ଡ଼ା ଅ଼ଡ଼େ ସା଼ରିୱାକିତି କ଼ଟା କାମା ରା଼ନେ, ଏଚେଟିଏ ଏ଼ ଲ଼କୁ ଆ଼ସ୍‌ଲି ଅ଼ଡ଼େ ସିସ୍ତୁ ହୀଅରି, ଇଞ୍ଜାଁ ଏ଼ଦି ଡା଼ୟୁ ରାଜାୟାଁକି ନା଼ସା ଆ଼ନେ। 14 ମା଼ମ୍ବୁ ରାଜା ଇଜତି ହା଼ରୁ ତିଞ୍ଜିମାନମି ଅ଼ଡ଼େ ରାଜାତି ହୀଣି ଆ଼ନାଣି ମେହ୍‌ନାୟି ମା଼ ମେ଼ରା ହିଲେଏ, ଏ଼ଦାଆଁତାକି ଲ଼କୁଣି ପାଣ୍ତାହାଁ ରାଜାଇଁ ଈ କାତା ୱେସ୍ତମି। 15 ମୀ ଆକୁ ଆ଼ବାୟାଁ ତଲିତି ପତି ସିନିକିୱି ଆ଼ପେ; ଆତିହିଁ ଏ଼ ପତିତା ମେସାହାଁ ପୁଞ୍ଜାଲି ଆ଼ଡିଦି, ଈ ଗା଼ଡ଼ା କିଲିବିଲି ଗା଼ଡ଼ା, ଅ଼ଡ଼େ ରାଜାୟାଁ ଅ଼ଡ଼େ ରା଼ଜି ତାକି ଲାଗେଏତାୟି, ଇଚିହିଁ ଏ଼ୱାରି ତଲି କା଼ଲାତା ଏମ୍ବାଆଁ ଗଡ଼୍‌ହା କିହାମାଚେରି। ଏ଼ଦାଆଁତାକି ଈ ଗା଼ଡ଼ା ନସ୍ତ ଆ଼ହାମାନେ। 16 ମା଼ମ୍ବୁ ରାଜାଇଁ ୱେସିମାନମି, ଈ ଗା଼ଡ଼ା ଅ଼ଡ଼େ ସା଼ରିୱାକିତି କ଼ଟାତି କାମା ରା଼ତିସାରେ, କାଡା ଆତାଲାୱାକି ନିଙ୍ଗେ ଏ଼ନି ବା଼ଗା ଡ଼ୟେଏ।’"

17 ଏଚେଟିଏ ରାଜା, ମନ୍ତ୍ରି ରହୁମ୍‌ ଅ଼ଡ଼େ କାମାତି କାଜାସି ସିମ୍‌ସୟ ଅ଼ଡ଼େ ଏ଼ୱାରି ସମରିୟାତା ବାସା କିହାମାନି ଲ଼କୁ ଅ଼ଡ଼େ କାଡା ଆତାଲା ଦେ଼ସାତି ଏଟ୍‌କା ଲ଼କୁଣି ୱେସା ପାଣ୍ତିତେସି, "ମିଙ୍ଗେ ନେହେଁ ଆୟାପେ।

18 ମୀରୁ ମା଼ ତା଼ଣା ଆମିନି ଆ଼କୁ ପାଣ୍ତାମାଞ୍ଜାଦେରି, ଏ଼ଦାଆଁ ମା଼ ନ଼କିତା ତୀରେତଲେ ପ଼ଡ଼ୱି ଆ଼ତେ। 19 ଇଞ୍ଜାଁ ନା଼ ହୁକୁମି ତଲେ ସିନିକିହାଲିଏ, ତ଼ଞ୍ଜା ଆ଼ହାମାନେ, ତଲି କା଼ଲାତା ଈ ଗା଼ଡ଼ା ରାଜାୟାଁ କ଼ପାଟି କିଲିବିଲି କିହାମାନେ, ଅ଼ଡ଼େ ଏ଼ଦାଣି ବିତ୍ରା ରାଜାୟାଁଣି କିଲିବିଲି ଅ଼ଡ଼େ ଗଡ଼୍‌ହା କିୱିଆ଼ହାମାନେ। 20 ଇଞ୍ଜାଁ ଜିରୁସାଲମତା ବା଼ଡ଼୍‌ୟୁଗାଟି ରାଜାୟାଁ ମାଚେରି, ଏ଼ୱାରି କାଡା ଆତାଲା ବାରେ ଦେ଼ସାତା ରା଼ଜି କିତେରି; ଏ଼ୱାରାକି ସିସ୍ତୁ ଅ଼ଡ଼େ ଆ଼ସ୍‌ଲି ହୀପ୍‌କି ଆ଼ତେ। 21 ଏ଼ଦାଆଁତାକି ମା଼ ତା଼ଣାଟି କାତା ହ଼ଆ ପାତେକା ଏ଼ ଗା଼ଡ଼ା ଏ଼ନିକିଁ ତିୟାରା ଆ଼ଏ, ଏ଼ଦାଆଁତାକି ନୀଏଁ ମୀରୁ ଏ଼ ଲ଼କୁଣି କାମାଟି ପାଲେଏ ଆ଼ହାଲି ହୁକୁମି ହୀଦୁ। 22 ଇଞ୍ଜାଁ ଜାଗ୍ରାତା, ଈ କାତାତା ମୀରୁ ହେଲା କିଆଦୁ; ରାଜାୟାଁତି ନସ୍ତ ଆ଼ହାଲି ଏ଼ନାଆଁତାକି ଲାଗେଏ ପାଡିକିନାୟି ?"

23 ଏଚେଟିଏ ରହୁମ୍‌ ଅ଼ଡ଼େ କାମାତି କାଜାସି ସିମ୍‌ସୟ ଅ଼ଡ଼େ ଏ଼ୱାରି ତଲେତି ଲ଼କୁ ତା଼ଣା ଅର୍ତକ୍ୟସ୍ତ ରାଜାତି ଆ଼କୁ ପ଼ଡ଼ୱି ଆ଼ହାଲିଏ, ଏ଼ୱାରି ତବେ ଜିରୁସାଲମତି ଜୀହୁଦି ଲ଼କୁ ତା଼ଣା ହାଜାହାଁ ବା଼ଡ଼୍‌ୟୁ ଅ଼ଡ଼େ ଅଦିକାରା ତଲେ ଏ଼ୱାରି କାମାତି ସାପି କିତେରି।

24 ଏଚେଟିଏ ଜିରୁସାଲମତା ମାହାପୂରୁ ଇଲୁ କାମା ସାପି ଆ଼ତେ। ଇଞ୍ଜାଁ ପାରସ୍ୟ ରାଜା ଦାରିୟାବସ ରା଼ଜିତି ରୀ ବାର୍ସା ପାତେକା ସାପି ଆ଼ହାଁ ଡ଼ୟିତେ।