Esdras 3

ପୂଜା ପିଣ୍ତା ୱେଣ୍ତେ କେ଼ପିନାୟି

1 ସା଼ତା ଲେ଼ଞ୍ଜୁ ୱା଼ତେ, ଇଞ୍ଜାଁ ଇସ୍ରାୟେଲ ମୀର୍‌କା ଏ଼ ବାରେ ଗା଼ଡ଼ାତା ମାଚେରି, ଏଚିବେ଼ଲା ଲ଼କୁ ରଣ୍ତିଏ ମାଣ୍‌ସି ଲେହେଁ ରଣ୍ତିଏ ମ଼ନ ଆ଼ହାଁ ଜିରୁସାଲମତା ରୁଣ୍ତା ଆ଼ତେରି। 2 ଏଚେଟିଏ ଜସାଦକ ମୀର୍‌ଏସି ଜେସୁୟ ଅ଼ଡ଼େ ତାନି ପୂଜେରା ତାୟିୟାଁ ଅ଼ଡ଼େ ସଲ୍‌ଟିୟେଲ ମୀର୍‌ଏସି ଜିରୁବାବିଲ୍‌ ଅ଼ଡ଼େ ତାନି ତାୟିୟାଁ ନିଙ୍ଗାହାଁ ମାହାପୂରୁତି ଲ଼କୁ ମ଼ସାତି ମେ଼ରା ରା଼ଚିତି ଲେହେଁ ହିଚୁତା ହୂଡିନି ପୂଜା ହେର୍‌ପାଲି ତାକି ଇସ୍ରାୟେଲତି ମାହାପୂରୁ ପୂଜା ପିଣ୍ତା ତିୟାରା କିତେରି। 3 ଇଞ୍ଜାଁ, ଏ଼ୱାରି ଏଟ୍‌କା ଦେ଼ସାତି ଲ଼କୁତି ଆଜି ତାକି ପୂଜା ପିଣ୍ତା ଏମ୍ବାତି ପୁନାଦି ଲାକ ଇଟିତେରି; ଅ଼ଡ଼େ ଏ଼ଦାଣି ଲାକ ପ୍ରବୁତି କ଼ସମି ହିଚୁତା ହୂଡିନି ପୂଜା, ଇଚିହିଁ ଲା଼ଇ ଅ଼ଡ଼େ ମିଡ଼୍‌ଅଲା ବେ଼ଲାତି ହିଚୁତା ହୂଡିନି ପୂଜା ହେର୍‌ପିତେରି। 4 ଏଚେଟିଏ ଏ଼ୱାରି ରା଼ଚାମାନି ଲେହେଁ ଗଚାୟାଁ ଗୂଡ଼ା ପାର୍ବୁ ମା଼ନୱି ଆ଼ତେରି ଅ଼ଡ଼େ ବାରେ ଦିନା ଲ଼ଡ଼ାମାନି ଲେକା ତଲେ ମେ଼ରା ତଲେ ବାରେ ଦିନା ହିଚୁତା ହୂଡିନି ପୂଜା ହେର୍‌ପିତେରି; 5 ଏଚେଟିଏ ଏ଼ୱାରି ବାରେ ଦିନା ହିଚୁତା ହୂଡିନି ପୂଜା ଅ଼ଡ଼େ କା଼ଡ଼କି ଅ଼ଡ଼େ ପ୍ରବୁତି ସୁଦୁ କିହାମାନି ବାରେ ତୀରି କିହାମାନି ପାର୍ବୁ ଅ଼ଡ଼େ ପ୍ରବୁ ତାକି ଜାହାରା ମ଼ନଟି ହୀନି ପୂଜା ହେର୍‌ପିନି ବାରେ ଲ଼କୁତି ଦା଼ନା ହେର୍‌ପାଲି ମା଼ଟ୍‌ହେରି। 6 ସା଼ତା ଲେ଼ଞ୍ଜୁତି ମୂଲୁ ଦିନାଟିଏ ଏ଼ୱାରି ପ୍ରବୁକି ହିଚୁତା ହୂଡିନି ପୂଜା ହେର୍‌ପାଲି ମା଼ଟ୍‌ହେରି; ସାମା ଏ଼ ବେ଼ଲାତା ମାହାପୂରୁ ଇଲୁତି ପୁନାଦି ତିୟାରା ଆ଼ହା ହିଲାଆତେ।

ମାହାପୂରୁ ଇଲୁ ୱେଣ୍ତେ ତିୟାରା ଆ଼ନାୟି

7 ଅ଼ଡ଼େ ଏ଼ୱାରି ପାରସ୍ୟ ରାଜା କରସ କାତା ତଲେ କାତି ଇଟିନାରି ଅ଼ଡ଼େ ବାଡିୟାଙ୍ଗାକି ଟାକାୟାଁ ହୀତେରି; ଇଞ୍ଜାଁ ଲିବାନନଟିଏ ଜାପତି ସାମ୍‌ଦୁରି ଗାଟୁ ପାତେକା ଏରସ ମା଼ର୍‌କା ତାଚାଲି ତାକି ସିଦନିୟ ଅ଼ଡ଼େ ସ଼ରତି*3:7 ସ଼ର/ତ୍ରୟା ଲ଼କୁଣି ତିଞ୍ଜାଲି କା଼ଦି ଗସାଲି ଏ଼ୟୁ ଅ଼ଡ଼େ ଜୀତ ନିୟୁଁ ହୀତେରି। 8 ମାହାପୂରୁତି ଜିରୁସାଲମ ଇଲୁତି ଏ଼ୱାରି ୱା଼ତି ରୀ ବାର୍ସାତି ରୀ ଲେ଼ଞ୍ଜୁତା ସଲ୍‌ଟିୟେଲ ମୀର୍‌ଏସି ଜିରୁବାବିଲ୍‌ ଅ଼ଡ଼େ ଜସାଦକ ମୀର୍‌ଏସି ଜେସୁୟ ଅ଼ଡ଼େ ଏ଼ୱାରି ମାଚି ପୂଜେରାଙ୍ଗା ଅ଼ଡ଼େ ଲେ଼ବିୟ ତାୟିୟାଁ ଇଞ୍ଜାଁ ବାବିଲଟି ଜିରୁସାଲମତା ୱେଣ୍ତା ୱା଼ତି ବାରେ ଲ଼କୁ ମାହାପୂରୁ ଇଲୁତି କାମା ସିନିକିହାଲି କଡ଼େ ବାର୍ସାଟିଏ ଆଗାଡ଼ାତି ଲେ଼ବିୟ ଲ଼କୁଣି ଆ଼ଚିତେରି। 9 ଏଚିବେ଼ଲା ଜେସୁୟ ଅ଼ଡ଼େ ତାନି ମୀର୍‌ଏସି ଇଞ୍ଜାଁ ତାୟିୟାଁ, କଦ୍‌ମିୟେଲ ଅ଼ଡ଼େ ତାନି ମୀର୍‌କା, ଜୀହୁଦା ମୀର୍‌କା, ମାହାପୂରୁ ଇଲୁତା କାମା କିନାରାଇଁ ସିନିକିହାଲି ରହେଁଏ ନିତେରି; ହେନାଦଦ ମୀର୍‌କା, ତାମି ମୀର୍‌କା ଅ଼ଡ଼େ ତାୟିୟାଁ, ଏଲେ କିତେରି, ଏ଼ୱାରି ବାରେ ଲେ଼ବିୟ ଲ଼କୁ ମାଚେରି।

10 ଇଲୁ କେ଼ପିନାରି ପ୍ରବୁତି ଇଲୁ ପୁନାଦି ଇଟିତାଟି ଏ଼ୱାରି ଇସ୍ରାୟେଲତି ରାଜା ଦାୱୁଦ ତୀରି କିହାମାନି ଲେହେଁ ପ୍ରବୁତି ରା଼ହାଁ କିହାଲି ତାକି ଜାହା ଜାହାରା ସକାୟାଁ ତୁର୍‌ହାମାନି ପୂଜେରାଙ୍ଗାଣି ତୀତ୍ରି ତଲେ ଅ଼ଡ଼େ ଆସପ ମୀର୍‌କା ଲେ଼ବିୟଙ୍ଗାଣି ଟାପୁଡ଼ି ୱେ଼ଚାହାଁ ତୀରି କିତେରି। 11 ଇଞ୍ଜାଁ ଏ଼ୱାରି ପ୍ରବୁତି ସାମ୍ବ୍ରମି ଅ଼ଡ଼େ ଜହରା କିହାଁ ପା଼ଲି ଆ଼ସିହିଁ ପା଼ଚିହିଁ ଏଲେଇଚେରି, "ଏ଼ୱାସି କାର୍ମା ମେହ୍‌ନାସି ଏ଼ନିଇଚିହିଁ ଇସ୍ରାୟେଲ ତାକି ଏ଼ୱାଣି କାର୍ମା କା଼ଲେଏତାୟି।" ଅ଼ଡ଼େ ମାହାପୂରୁ ଇଲୁ ପୁନାଦି ଇଟିତାକି ଏ଼ୱାରି ମାହାପୂରୁତି ସାମ୍ବ୍ରମି କିହିମାଚାଟି ବାରେ ଲ଼କୁ କାଜା ହା଼ଡା ତଲେ କା଼ଲୱି ଆ଼ତେରି।

12 ସାମା ଏମିନି ପୂଜେରା ଅ଼ଡ଼େ ଲେ଼ବିୟ ଇଞ୍ଜାଁ ତାଞ୍ଜିୟାଁ କୂଡ଼ାତି କାଜା ପ୍ରାଚିନା ଲ଼କୁ ତଲିତି ମାହାପୂରୁ ଇଲୁ ମେସାମାଚେରି, ଏ଼ୱାରି ନ଼କିତା ଈ ଇଲୁତି ପୁନାଦି ଆ଼ହିମାଚାଟି ଏ଼ୱାରି ବିତ୍ରାଟି ହା଼ରେକା କାଜା ହା଼ଡା ତଲେ ଡ଼ୀତେରି ଇଞ୍ଜାଁ ହା଼ରେକା ରା଼ହାଁତାକି କା଼ଲୱି ଆ଼ତେରି; 13 ଏଚେଟିଏ ଲ଼କୁ ରା଼ହାଁତି କା଼ଲୱି ହା଼ଡା ଅ଼ଡ଼େ ଲ଼କୁତି ଡ଼ୀକି ହା଼ଡାତି ବ଼ଲୁ ବାଚି କିହାଲି ଆ଼ଡାଆତେରି; ଇଚିହିଁ ଲ଼କୁ କାଜା ହା଼ଡାତଲେ କା଼ଲୱି ଆ଼ତେରି, ଅ଼ଡ଼େ ଏ଼ ହା଼ଡା ହା଼ରେକା ହେକ ୱେ଼ଙ୍ଗିତି।