1 ଏନ୍‌ ଜିସୁଙ୍ଗୁଁ ମସିହ ଇଜି ବିସ୍‌ବାସ୍‌ କିନାନ୍‌, ୱାନ୍‌ ମାପୁରୁଦି ମାରିନ୍‌; ମାରି, ଏନ୍‌ଆପିନ୍‌ ଅରେନ୍‌ ବୁବେଙ୍ଗ୍‌ ଜିବନ୍‌ନୋନାନ୍‌, ଆୟା ବୁବାସିଦି କଡ଼ଦିଙ୍ଗ୍‌ ବା ୱାନ୍‌ ଜିବନ୍‌ନୋନାନ୍‌ । 2 ମାଡୁ ଏସ୍ତିୱାଲେ ମାପୁରୁଙ୍ଗୁଁ ଜିବନ୍‌ନୋନିକା ମାରି ୱାନି ମାଟା ମାନାନାପ୍‌, ନାସ୍ତିୱାଲେ ନେସ୍‌ତେଙ୍ଗ୍‌ ଆଟ୍‌ନାପ୍‌ ଜେ, ମାଡୁ ମାପୁରୁଦି କଡ଼ରିଙ୍ଗ୍‌ ଜିବନ୍‌ନୋଜିନାପ୍‌ । 3 ✝ଇରିଙ୍ଗ୍‌ ମାପୁରୁଙ୍ଗୁଁ ଜିବନ୍‌ନୋନି ଅର୍ତ ଆଜିନାତ୍‌, ମାଡୁ ୱାନି ମାଟା ମାନାନିକା, ମାରି ୱାନି ମାଟା ମାନାନିକା ନାଣ୍ତ କାସ୍ଟୁସିଲେ । 4 ଇରିଙ୍ଗ୍‌ ମାପୁରୁଦି କଡ଼ର୍‌ ଇୟା ଜଗତ୍‌ତିଙ୍ଗ୍‌ ଆରା କିଦେଙ୍ଗ୍‌ ସାକ୍ତି ପୟ୍‌ତାମାନାନ୍‌ । ବିସ୍‌ବାସ୍‌ତି ସାକ୍ତିଦାନ୍‌ ମାଡୁ ଜଗତ୍‌ତି ମୁସ୍‌କୁ ଜିଣାଦେଙ୍ଗ୍‌ ଆଟ୍‌ନିକା । 5 ଇୟା ଜଗତ୍‌ତିଙ୍ଗ୍‌ ଏନ୍‌ ଆରା କିଦେଙ୍ଗ୍‌ ଆଟ୍‌ନାନ୍‌ ? ଜିସୁଙ୍ଗୁଁ ମାପୁରୁଦି ମାରିନ୍‌ ଇଜି ଏନ୍‌ ବିସ୍‌ବାସ୍‌ କିନାନ୍‌, ଆୟାକାନ୍‌ନେ କେବଲ୍‌ ଇକା କିଦେଙ୍ଗ୍‌ ଆଟ୍‌ନାନ୍‌ ।

6 ଆୟା ଜିସୁ କ୍ରିସ୍ତ ମାପୁରୁଦି ମାରିନ୍‌ ଇଜି ଡୁବନ୍‌ତାନ୍‌ ୱାନି ଜିବନ୍‌ତି ପାଣି ଆରାମ୍‌ କିତାମାର୍ହାନ୍‌, ମାରି ନିଜେଦି ନେତେର୍‌ତାନ୍‌ ଲୋକା ରକ୍ଷାକିନି ପାଣିକିତାନ୍‌ । କେବଲ୍‌ ଡୁବନ୍ ଅସି ୱାନ୍‌ ରେଏନ୍‌ ମାର୍ହାନ୍‌, ମାତର୍‌ ଏରୁ ନି ନେତେର୍‌ ରୁଣ୍ତିୱାନିକାଙ୍ଗ୍‌ ସିଜି ୱାତାମାର୍ହାନ୍‌ । ମାରି ଆତ୍ମା ବା ଇବେଣି ସାକି ୱେର୍‌ନାନ୍‌; ଇରିଙ୍ଗ୍‌ ଆତ୍ମା ନେ ସତ୍‌ । 7 ମାରି ଇୟା ମୁଏରି ସାକି ଉନ୍‌ଡ୍ରେ ସାମାନ୍‌, 8 ଆତ୍ମା, ଏରୁ ମାରି ନେତେର୍‌, ଇୟା ମୁଏର୍‌ ସାକି ୱେର୍‌ନାର୍‌ । 9 ମାଡୁ ଜଦି ଲୋକା ସାକି ମାନାନିକା, ଆର୍‌ତିଙ୍ଗ୍‌ ମାପୁରୁଦି ସାକି ଆୟାମାଣୁକୁ ନାଣ୍ତ ପେରିକା, ମାରି ମାପୁରୁଦି ସାକି ଇକା ଜେ, ୱାନ୍‌ ନିଜେଦି ମାରିନ୍‌ତି ବିସୟ୍‌ତାନ୍‌ ସାକି ସିତାମାନାନ୍‌ । 10 ଏନ୍‌ ମାପୁରୁଦି ମାରିନ୍‌ତିମାନୁ ବିସ୍‌ବାସ୍‌ କିନାନ୍‌, ୱାନ୍‌ ନିଜେଦି ଜିବନ୍‌ତୁ ଇୟା ସାକି ପୟ୍‌ତା ମାନାନ୍‌; ଏନ୍‌ ମାପୁରୁଦି ସାକି ବିସ୍‌ବାସ୍‌ କିଏନ୍‌, ୱାନ୍‌ ମାପୁରୁଙ୍ଗୁଁ ମିଚ୍‌ୱେର୍‌ନିକାନ୍‌ କିତାମାନାନ୍‌, ଇରିଙ୍ଗ୍‌ ମାପୁରୁ ନିଜେଦି ମାରିନ୍‌ତି ବିସୟ୍‌ତାନ୍‌ ଆମା ସାକି ୱେର୍‌ତାମାନାନ୍‌, ଆବେନୁ ୱାନ୍‌ ବିସ୍‌ବାସ୍‌ କିଏନ୍‌ । 11 ଆୟା ସାକିଦି ଅରତ୍‌ ଆତାତ୍‍ଜେ, ମାପୁରୁ ମାଙ୍ଗିଁ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ସିତାମାନାନ୍‌; ମାରି ଆୟା ଜିବନ୍‌ ୱାନି ମାରିନ୍‌ତିମାନୁ ମାନାତ୍‌ । 12 ଏନ୍‌ ମାରିନ୍‌ତିଙ୍ଗ୍‌ ପୟ୍‌ତା ମାନାନ୍‌, ୱାନ୍‌ ଜିବନ୍‌ ପୟ୍‌ତା ମାନାନ୍‌; ଏନ୍‌ ମାପୁରୁଦି ମାରିନ୍‌ତିଙ୍ଗ୍‌ ପୟ୍‌ଏନ୍‌, ୱାନ୍‌ ଜିବନ୍‌ ବା ପୟ୍‌ଏନ୍‌ ।

13 ମାପୁରୁଦି ମାରିନ୍‌ତି ଦର୍‌ତାନ୍‌ ବିସ୍‌ବାସ୍‌ କିଜିନିଦେର୍‌ ଜେ ମିରୁ, ମିରୁ ଏଣ୍ତେସ୍‌ ନେସ୍‌ନିଦେର୍‌ ଜେ, ମିରୁ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ପୟ୍‌ତିମାନିଦେର୍‌, ଇୟାଉଣ୍ତିଙ୍ଗ୍‌ ନାନୁ ମିଙ୍ଗିଁ ଇୟା ଆକୁ ରାସ୍‌ସିନା । 14 ମାପୁ ତିଲାଏଣ୍‌ଗା ମାପୁରୁଦି ଲାକ୍‌ତୁ ୱାଦେଙ୍ଗ୍‌ ଆଟ୍‌ସିନାପ୍‌, ଇରିଙ୍ଗ୍‌ ମାପୁ ସତ୍‌ତାନ୍‌ ନେସ୍‌ନାପ୍‌ ଜେ, ମାପୁ ଏସ୍‌କାଙ୍ଗ୍‌ ୱାନି ଇଚ୍ଛାଦାନ୍‌ ଇନି ପାର୍‌ତାନା କିତିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ମା ଆୟା ପାର୍‌ତାନା ୱେନାନ୍‌ । 15 ମାରି ମାଡୁ ୱାନି ଲାକ୍‌ତୁ ଆମାକା ଇନିକା ପାର୍‌ତାନା କିନିକା, ଆକା ୱାନ୍‌ ୱେନାନ୍‌ ଇଜି ଜଦି ମାଡୁ ନେସ୍‌ନିକା, ଆର୍‌ତିଙ୍ଗ୍‌ ୱାନି ଲାକ୍‌ତୁ ଆମାକା ପାର୍‌ତାନା କିତିମାନିକା, ଆୟାୱିଜୁ ଜେ ପୟ୍‌ତିମାନିକା, ଇକାବା ନେସ୍‌ନାପ୍‌ ।

16 ଜଦି ମି ଅରେନ୍‌ ତଡ଼ାନ୍‌ ପାପ୍‌ କିଜିମାନିକା ସୁଡ଼ୁତିଙ୍ଗ୍‌, ମାରି ଆୟା ପାପ୍‌ ସାନିନାନିକା ଆଏତ୍‌ ମାନାତ୍‌, ୱାନି ଉଣ୍ତିଙ୍ଗ୍‌ ମାପୁରୁଙ୍ଗୁଁ ପାର୍‌ତାନା କିଦୁ, ଏଣ୍ତେସାତିଙ୍ଗ୍‌ ମାପୁରୁ ୱାନିଙ୍ଗ୍‌ କେମା ସିଜି ରକ୍‌ୟା କିନାନ୍‌ । ମାରି ମାପୁରୁ ଏଣ୍ତେସ୍‌ୱାଜା ସାନିକା ପାପ୍‌ କିଇ ମାନି ଲୋକାଙ୍ଗ୍‌ ଜିବନ୍‌ ଦାନ୍‌ ସିନାନ୍‌, ଆୟାୱାଜା ୱାନିଙ୍ଗ୍‌ ବା ଜିବନ୍‌ ଦାନ୍‌ ସିନାନ୍‌ । ସାନିନାନି ପାପ୍‌ ମାନାତ୍‌; ଆୟାଉଣ୍ତିଙ୍ଗ୍‌ ୱାନ୍‌ ପାର୍‌ତାନା କିପିନ୍‌ ଇଜି ନାନୁ ଇନ୍‌ଏ । 17 ୱିଜୁ ତାଗ୍‌ଇ ପାଣି ପାପ୍‌, ମାତର୍‌ ଆମାକା ସାନିନାନିକା ସିଲେତ୍‌, ଇୟାୱାଜା ପାପ୍‌ ମାନାତ୍‌ ।

18 ମାପୁ ନେସ୍‌ନାପ୍‌, ମାପୁରୁଦି ମାରିନ୍‌ ପାପ୍‌ତୁ ମିସାଜ ତେବାଏନ୍‌; ଇରିଙ୍ଗ୍‌ ମାପୁରୁଦି ମାରିନ୍‌ ୱାନିଙ୍ଗ୍‌ ରକ୍‌ୟା କିନାନ୍‌, ମାରି ସୟ୍‌ତାନ୍‌ ୱାନିଙ୍ଗ୍‌ ଇନିକା କିଦେଙ୍ଗ୍‌ ଆଟ୍‌ଏତ୍‌ ।

19 ମାଡୁ ଜେ ମାପୁରୁଦିମାଣୁକୁ ଜନମ୍‌ ମାରି ୱିଜୁ ଜଗତ୍‌ ଜେ ସୟତାନ୍‍ତି ଅଦିକାର୍‌, ଇକା ମାପୁ ନେସ୍‌ନାପ୍‌ ।

20 ମାରି ବା ମାପୁ ନେସ୍‌ନାପ୍‌ ଜେ, ମାପୁରୁଦି ମାରିନ୍‌ ୱାତାମାନାନ୍‌ ମାରି ସତ୍‌ତିଙ୍ଗ୍‌ ନେସ୍‌ନି ଉଣ୍ତିଙ୍ଗ୍‌ ମାଙ୍ଗିଁ ବୁଦି ସିତାମାନାନ୍‌; ମାରି ମାଡୁ ଆୟା ସତ୍‌ତି ମାପୁରୁଦିମାନୁ ମାରି ୱାନି ମାରିନ୍‌ ଜିସୁ କ୍ରିସ୍ତଦି ୱାଲେ ମାନାତ୍‌ । ୱାନ୍‌ ନେ ସତ୍‌ତି ମାପୁରୁ ମାରି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ।

21 ଏ କଡ଼ର୍‌, ସତ୍‌ସିଲି ଦିୟାମ୍‍କାମାଣୁକୁ ନିଜେ ନିଜେଦିଙ୍ଗ୍‌ ଆକତେବାଦୁ ।