1 Kubva kuna Phawuli, wakadan'wa ngekuda kweNdzimu kuti abe mpositoli waKhirisitu Yesu, nehama yedu Sositheni.

2 Kugubungano leNdzimu liku Khorinte, kuna bakayengemadziwa muna Khirisitu Yesu, bakadan'wa kuti babe bayengemali panhu pan'ompela nayibabo banodana zina laHe wedu Yesu Khirisitu mubugalo gose, He wabo newedu bo.

3 Ngoni nekunyalala kunobva kuNdzimu Tate bedu naHe Yesu Khirisitu ngakube kumuli.

4 Ndoboka Ndzimu wangu lubaka gose nekwenyu ngentha yemawhilangoni eNdzimu amakapiwa muna Khirisitu Yesu, 5 kuti muwunli makafumisiwa muzila dzose ngekulebeleka nange luzibo gose. 6 saku busupi gwaKhirisitu gwakahhadzisika pakati kwenyu. 7 kudze kuti musitayile kene tjili tjipi tjipo tjemeya, mutjakamilila zumbunugwa kwaHe wedu Yesu Khirisitu; 8 iye unowhomutjengeta kuswika kubupelo, musina nlandu muhhuba laHe wedu Yesu Khirisitu. 9 Ndzimu unogalikamoyo, iye wamakadan'wa ndiye kuti mudlidzane neNkololo uwe, Yesu Khirisitu He wedu.

10 Ndomukumbila, makamu, nezina laHe wedu Yesu Khirisitu, kuti mose mubvumilane kakale kusibe nekukakabadzana pakati kwenyu, koga kuti mubhatane munkumbulo un'ompela nebona zwinhu nezila in'ompela. 11 Ngobe ndakabudziwa nebanhu baKhilo kuti kuna kukakabadzana pakati kwenyu, makamu angu. 12 Tjandinobva ndetjekuti umwe newumwe wenyu unoti, "Imi ndiwa Phawuli," kene "Imi ndiwa Apholosi," kene "Imi ndiwa Khefasi*," kene "Imi ndiwa Khirisitu." 13 Khirisitu wakapalalana? Phawuli wakakowhomelegwa imwi? Kene kuti makabvubikiwa muzina laPhawuli?

14 Ndoboka Ndzimu kuti akuna wenyu wandakabvubika kuhhe kwaKhirisipasi naGayiyasi; 15 swiyo kungabe newumwe unoti makabvubikiwa muzina langu. 16 (Ndakabvubika bo ben'ha waSitefanasi. Hule kwayikoko anditoziba kene kuna umwe wandakabvubika.) 17 Nekuti Khirisitu haazondituma kuti ndibvubike koga kuti ndisumikile ndebo mbuya, kusi ngematama ebutjenjebvu anozipilila, swiyo tjileyanyo tjaKhirisitu tjingakotolegwa masimba.

18 Ngobe ndebo yetjileyanyo bulengwe kuna banopalala, koga kutili banotjidziwa masimba eNdzimu. 19 Ngobe kwakakwagwa kuti,

"Ndowhopaladza butjenjebvu gwebakatjenjela,

neluzibo gwebanoziba ndowhogulamba."

20 Uponi ntjenjebvu? Uponi nkwali? Uponi nyanyayidzi welubaka guno? Ndzimu haazoyeta butjenjebvu gwehango gukabe bulengwe?

21 Ngobe saku, mubutjenjebvu gweNdzimu, hango ayizoziba Ndzimu ngebutjenjebvu, kwakahanhisa Ndzimu ngebulengwe gwetjatinosumikila kuti atjidze ibabo banogalamoyo. 22 Ngobe maJuta anohaka zwilakidzilo maGiriki anohaka butjenjebvu, 23 koga iswi tosumikila Khirisitu wakakowhomegwa, utjikunhiso kumaJuta kakale alibulengwe kubataya, 24 koga kuna ibabo bakadan'wa, bose maJuta nemaGiriki, Khirisitu umasimba eNdzimu nebutjenjebvu gweNdzimu. 25 Ngobe bulengwe gweNdzimu gwakatjenjela kupinda butjenjebvu gwebanhu, kakale butela gweNdzimu gwakasima kupinda masimba ebanhu.

26 Ngobe lingisisani dan'wa kwenyu, makamu; abatebanjinji benyu bakabe bakatjenjela kuyendilana nekwezwilizanyiso zwehango ino, abatebanjinji bakabe bana masimba, abatebanjinji bakabe bazwaligwa mumamo apehhugwi; 27 koga Ndzimu wakahala zwinhu zwebulengwe zwehango ino kuti abhatise honi batjenjebvu, Ndzimu wakahala zwinhu zwinabutela zwehango ino kuti abhatise honi bana masimba, 28 Ndzimu wakahala zwinhu zwipasi nezwinolingigwa pasi muhango, nezwinhu zwisipo, kuti ayete zwinhu zwiyapo zwibezwisina n'hingo, 29 ndizo kuti kusibe nenhu unowhozwiloba fuba mbeli kwebuyapo kweNdzimu. 30 Ndiye tshinde lebutjilo gwenyu muna Khirisitu Yesu, iye ubutjenjebvu gwedu gunobva kuNdzimu, nendulamo yedu, neyengemadziwa newangugwa kwedu; 31 ndizo, sekwakakwagwa kuti, "Unozwikudza, ngaazwikudze ngekwaHe."