1 Tobelani zila yeludo, kakale yemulani kwazo zwipo zwemeya, kwazo kwazo kuti mulebesembeli. 2 Ngobe unolebeleka nelulimi gweMeya atolebeleka nebanhu koga unolebeleka neNdzimu; ngobe akuna unowuwhisisa, koga unoleba zwakasumbikika muMeya. 3 Koga unolebesambeli unolebeleka nebanhu ebasimisa, ebakulumbidza, kakale ebanyaladza. 4 Unolebeleka nelulimi gweMeya unozwibaka iye, koga unolebesambeli unobaka gubungano.

5 Ngwenu ndohaka kuti mose mulebeleke nendimi, koga kwazokwazo kuti mulebesembeli. Unolebesambeli unkulu pana unolebeleka nendimi, kuhhe kwekuti kube newunotjenesa, kudze gubungano libakike. 6 Ndizo makamu, hapa ndihha kumuli ndilebeleka nendimi, ndoba ndimutjidza neni kuhhe kwekuti ndihhisa zumbunulo kene luzibo kene bulebesimbeli kene tjidiyo?

7 Kene zwinolidziwa zwisina butjilo, zwinonga nyele kene dende, hapa zwisina nsindo wakapalalana, nhu ungaziba tjini kuti ndikupi kunolila? 8 Hapa lunyanga gulila, nensindo usingazibgwe ndiyani unowhozwilulamisila ngwa? 9 Ngono imwi dumbu; hapa mulebeleka nelulimi gweMeya ndebo isingawhisisike, banhu banowhoziba tjini kuti kwayin'wi? Ngobe mowhoba mulebeleka mumhepo. 10 Lebeswa kuna ndimi njinji dzakasiyana muno muhango, kakale akuna lulimi gusina tjagunobva; 11 koga hapa ndisingazibe kuti gobvani, ndowhoba ndili ntaya kunlebeleki nayiye ali ntaya bo kundili. 12 Kwakajalo nekumuli; saku makazwipila kuti mube nezwipo zweMeya, hingani zwakabangalala musimisa bukulu kunobaka gubungano.

13 Ndizo ke, unolebeleka nelulimi gweMeya wakafanila tembezelela kuti abe nemasimba etjenesa. 14 Ngobe hapa nditembezela nelulimi gweMeya, meya yangu inoba itembezela koga nkumbulo awuna bhatsho. 15 Nditetjini ngono? Ndowhotembezela nemeya ndikatembezela nenkumbulo kakale; ndowhomba nemeya ndikamba nenkumbulo bo kakale. 16 Hapa uboka* nemeya, umwe nhu usingawhisise angati, "Akujalo" tjini, kuboka kuko, iye asingazibe kuti notini? 17 Ngobe ungaboka nekuhhele, koga umwe nhu esingabakike.

18 Ndoboka Ndzimu kuti ndolebeleka nendimi kumupinda mose; 19 kusineni, mugubungano kuhine ndilebeleke matama mahanu ndihhisa nkumbulo wangu, kuti ndilaye bamwe, pana kuti ndilebe matama alizwiwulu zwiligumi ngelulimi gweMeya.

20 Makamu, musibe batjetjana mukukumbula kwenyu; ibani ngawana mumatjinyo, koga mukukumbula ibani bawhola. 21 Munlayo kwakakwagwa kuti,

"Ndihingisa banhu bendimi dzisingawhisisike

nemilomo yebataya,

ndowholebeleka nebanhu ibaba,

nekene kwakajalo abatowhondiwhilila, kujalo He."

22 Ndizo wali, ndimi tjilakidzilo tjisi tjebagalimoyo, koga tjebasingagalemoyo, bulebesimbeli aguta tjilakidzilo tjebasingagalemoyo, koga ndetjebagalimoyo.

23 Ndizo ke, hapa gubungano lose lahangana banhu bose beba belebeleka nendimi, banhu bakuhhe kene basingagalemoyo hapa beswika, abatowhoti mopenga? 24 Koga hapa moseni mulebesambeli, kukongina usingagalemoyo kene nhu wekuhhe, unotambunudziwa namwi mose ekolayidziwa butjinyi gugwe namwi mose, 25 zwakasumbikika zwemoyo uwe zobapatjena; unowhokotama akanamata Ndzimu epa busupi kuti Ndzimu upakati kwenyu kwelebeswa.

26 Nditini ngono makamu? Hapa mukubungana, umwe unalumbo gwemba, umwe unatjidiyo tjediya, umwe una zumbunulo, umwe unolebeleka nelulimi gweMeya, kene tjenesa. Kose ikoku ngakuyetigwe kuti kubakiwe gubungano. 27 Hapa umwe elebeleka nelulimi gweMeya, ngakube nebabili koga kene batatu koga betobedzana, umwe atjenese. 28 Koga hapa kusina unotjenesa, umwe newumwe wabo ngaanyalale pakati kwegubungano, alebeleke yega tjemumoyo neNdzimu. 29 Ngakulebeleke balebesambeli babili kene batatu, bamwe bahakisise kuti tjinolebgwa malebeswa kene? 30 Umwe ugele hapa akapiwa zumbunulo, wayelebeleka kutanga ngaanyalale. 31 Ngobe moseni mungalebesambeli mutobedzana, kuyetila kuti moseni mudiyike kakale mukulumbidzike; 32 kakale meya yebalebesambeli inolawugwa nebalebesambeli. 33 Ngobe Ndzimu haata Ndzimu wekwakaleyana koga ndiNdzimu wekunyalala.

Sekwakuli iko mumakubungano ose ebayengemali, 34 banhu betjikadzi bakafanila nyalala mugubungano. Ngobe abatobvumigwa lebeleka, koga bakafanila zwisa pasi, nenlayo unojalo bo. 35 Hapa kuna tjabanoyemula ziba, ngababhuzwe balume babo kanyi. Ngobe kobhatisa honi kuti nhu wetjikadzi alebeleke mugubungano.

36 Ini! Dama leNdzimu lakatangisila pamuli, kene lakaswika kuna imwi moga? 37 Hapa kuna unokumbula kuti unlebesambeli, kene unatjipo tjemeya, wakafanila ziba nekuhhele kuti tjandinomukwalila unlayo waHe. 38 Usingawamutjile ikoku, nayiye atowamutjigwa.

39 Ndizo ke, makamu angu, yemulani lebesambeli, kakale musidzibise lebeleka nendimi; 40 koga zwinhu zose zwakafanila yetiwa zwakanaka ngendongoloso.