1 Ndohaka mukumbudza, makamu, nekwendebo mbuya yandaka sumikila kumuli, yamakawamutjila, yamumile pehhugwi kwayo, 2 yamunotjidziwa ndiyo, hapa kuli kuti makabhatilila mudama landakasumikila kumuli kuhhe kwekuti makagalilamoyo suli.

3 Ngobe ndakamupa tjikulu tjandakawamutjila bo, kuti Khirisitu wakafila matjinyo edu sekwakunolebgwa newhalo, 4 kuti wakabiganyiwa, kuti wakamusiwa kubafi muhhuba lebutatu sekwakunolebgwa newhalo, 5 nekuti wakazwilakidza kuna Khefasi*, akakozwilakidza kuna beligumi nebabili. 6 Akakozwilakidza kubagalimoyo banopinda makulu mahanu, mulubaka gun'ompela bunji gwabo batjibapenyu, nekutobe bamwe bakatjiyizela. 7 Wakakozwilakidza kuna Jakobe, nekubapositoli bose.

8 Kubupelo, wakazwilakidza kundili, imi ndinonga wakazwagwa nelubaka gusiyigo. 9 Kana ndintukunu pabapositoli, andizofanila dan'wa ndiyi mpositoli, ngobe ndakadziyidza gubungano leNdzimu. 10 Koga ndi iko kwandili iko ngengoni dzeNdzimu, kakale ngoni dzidze kundili adzizotongoba suli. Koga ndakahinga zwakasima kupinda bose, nenguba kwaka kusi imi, koga kuli ngoni dzeNdzimu dzimundili. 11 Kuti kwaka kuli imi kene kwaka kuli ibo, sayikoku ke tosumikila, kakale imwi makagalamoyo.

12 Hapa kusumikigwa kuti Khirisitu wakamuka kubafi, bamwe benyu bangati akuna musiwa kubafi tjini? 13 Koga hapa kusina kumuka kubafi, kobva kuti Khirisitu haazomusiwa; 14 hapa Khirisitu esakamusiwa, kubva kuti tosumikilila suli namwi mogalilamoyo suli. 15 Toba tisingalebe lebeswa nekweNdzimu, ngobe takapa busupi kuti Ndzimu wakamusa Khirisitu, waasakamusa hapa kuli lebeswa kuti bafi abatomusiwa. 16 Hapa bafi besingamusiwe, kubva kuti Khirisitu haazomusiwa. 17 Hapa Khirisitu esakamusiwa, galamoyo kwenyu akuna n'hingo, kakale mutji mumatjinyo enyu. 18 Ndizo na ibabo bakalala beli muna Khirisitu bakapalala. 19 Hapa mubutjilo igogu tili banhu bakagalamoyo muna Khirisitu koga, tibanhu banofanila whigwa ngoni kwazosa.

20 Koga ke lebeswa ndelekuti Khirisitu wakamusiwa kubafi, alimbano yebakatjiyizela. 21 Ngobe saku lufu gwakahha ngenhu, muka kubafi kwahha bo ngenhu. 22 Ngobe semuna Adamu wose nhu unofa, sayikoko muna Khirisitu wose nhu unowhoyetiwa akaba mpenyu. 23 Koga umwe newumwe nenlongoloso iye. Khirisitu sentjelo wekutanga, kukotjiti pakubuya kukwe ibabo banotobela Khirisitu. 24 Kukotjiswika bupelo, paanowhotula bumambo kuna Ndzimu Tate hule kwepaladza gose butongi nebutungamili gose nemasimba ose. 25 Ngobe wakafanila tonga kudzina asa zwita zwizwe zose kusi kwemakumbo awe. 26 Tjita tjebupelo tjinowhopaladziwa, lufu. 27 Ngobe lukwalo goti, "Ngobe Ndzimu wakasa zwinhu zose pasi kukwe, kusi kwemakumbo awe." Koga hapa guti, "Zose zwinhu," kupatjena kuti akutohanganyila Ndzimu tjekukwe, iye unosa zwinhu zose pasi kwaKhirisitu. 28 Hapa zwinhu zose zwatjiba pasi kukwe, Nkololo tjekukwe unowhoba pasi kukwe iye unosa zwinhu zose pasi kukwe, kuyetila kuti Ndzimu abe zwinhu zose kunhu wose.

29 Banhu banobvani hapa beti banobvubikigwa bafi? Hapa bafi besingamusiwe kubafi, kungentha yeni banhu bebvubikigwa bafi? 30 Kungentha yeni tizwisa mumboli lubaka gose? 31 Kakale hhuba nehhuba ndolingisana nelufu makamu angu! Ikoku ilebeswa, sekwandinozwiloba fuba ngekwenyu muna Khirisitu Yesu He wedu. 32 Ndobuyigwa neni hapa ndakagwisana nezwibanda kuEfesu ndikuyetila hanhisa banhu? Hapa bafi besingamusiwe, "Ayidleni tin'weni, ngobe mangwana towhofa."

33 Musitjebegwe. "Bakhwinya basakalulama banotjinya mazwibhato akanaka." 34 Musani mikumbulo yenyu yakalulama, musitjatjinye. Ngobe bamwe abana luzibo nekweNdzimu. Ndoleba ikoku mwaza kuti mubhakhwe nehoni.

35 Umwe nhu unowhobhuzwa eti, "Bafi banomusiwa tjini? Banomuka bana mbili upi?" 36 Iwe tjilengwe! Tjawunodzwala atjitoba tjipenyu hapa tjisatanga tjafa. 37 Kakale hapa udzwala, awutodzwala mbili unowhoba iwo zwawo wemela, koga nodzwala mbewu yoga, kene ndeyepfunde kene kumwe zwako. 38 Koga Ndzimu unotjipa mbili waahala iye, imwe neyimwe mbewu inopiwa mbili wayo.

39 Ngobe yose mibili ayitofanana, kuna ludzi gwenhu, kuna gwemhuka, negwenyunyi, negwewhobe.

40 Kakale kuna mibili yekudzimu nemibili yemuhango; penyelela kwembili wekudzimu kosiyana nepenyelela kwembili wemuhango. 41 Kuna tjedza tjehhuba, tjakasiyana netjedza tjemwedzi, kakale tjakasiyana netjedza tjenyenyedzi; imwe nyenyedzi tjedza tjayo tjosiyana netjeyimwe nyenyedzi.

42 Ndizo ke kwakajalo bo nemuka kwebafi. Mbili unotshigwa unobola, mbili unomusiwa awutobola. 43 Unotshigwa usina gudzo, unomusiwa unagudzo, unotshigwa usinasimba, ukamusiwa unasimba. 44 Unotshigwa ulimbili wenyama, pawunomusiwa, unoba wabe mbili wemeya. Hapa kuna mbili wenyama kunambili wemeya kakale. 45 Ndizo kwakakwagwa kuti, "Nhu wekutanga Adamu wakabanhu mpenyu," Adamu webupelo wakaba meya inopa bupenyu. 46 Koga akuta mbili wemeya wakatanga, umbili wenyama, kukotjihha mbili wemeya. 47 Nhu wekutanga wakabumbiwa nentapwe ebva muhango; nhu webubili unobva kudzimu. 48 Sekwaaka ali iko nhu wakabumbiwa nentapwe, banhu bakabumbiwa nentapwe bakajalo bo; sekwaali iko nhu wekudzimu, banhu bekudzimu bakajalo bo. 49 Sayikoku tinatjiso tjenhu wakabumbiwa nentapwe, towhobe netjiso tjenhu wekudzimu.

50 Ndomubudza, makamu. Nyama nelopa akungawamutjile nhaka yebumambo gweNdzimu, kene iko kunobola akungawamutjile nhaka yekusingabole.

51 Whililani! Ndomubudza tjakasumbikika. Atitowholala toseni, koga tose towhohandugwa, 52 nelubakanyana, setshika kwehhiho, palila kwelunyanga gwebupelo. Ngobe lunyanga gowholila, bafi banowhomusiwa besingatjabole, kakale towhohandugwa. 53 Ngobe mbili iwhoyu unobola wakafanila mbala kusabola, nembili iwhoyu unofa wakafanila mbala safa. 54 Hapa mbili unobola umbala kusabola, nembili unofa umbala safa, Kowhohhadzisika lukwalo gunoti, "Lufu gwamidziwa mukukundiwa."

55 "Lufu wee, kunda kuko kuponi?

Lufu wee, lubolela gugo kuponi?"

56 Lubolela gwelufu ijinyo, masimba ejinyo unlayo. 57 Koga toboka Ndzimu, unotiwamutjidza kukunda muna He Yesu Khirisitu wedu.

58 Ndizo ke, makamu angu anodikan'wa, simani, musingazunguzike, misi yose muzwipile ngekuhhele mun'hingo waHe, muziba kuti, muna He n'hingo wenyu awuta uli suli.