1 Nekwakalingisana nekwezodliwa zwinopigwa midzimwana.

Toziba kuti "Tose tina luzibo." "Luzibo" goyeta nhu akahonga, koga ludo gosimisa. 2 Hapa kuna umwe uno alakana kuti unoziba tjinhu, haanhu akaziba sekwaakafanila ziba. 3 Koga hapa nhu eda Ndzimu, unozibgwa neNdzimu.

4 Ndizo, hapa kuli kwakalingisana nedla zodliwa zwinopigwa midzimwana, toziba kuti, "midzimwana ayita tjimwe muhango," kakale nekuti "akuna umwe Ndzimu kuhhe kwe un'ompela." 5 Nekutobe kuna inoyi midzimwana kudzimu kene muhango sayikoku kuna "midzimwana" minjinji "nabohe" banjinji, 6 koga kutili kuna Ndzimu un'ompela, ibo Tate, kunobva zwinhu zose kakale ibo batinotjilila, naHe un'ompela Yesu Khirisitu, zwinhu zose zobva nemuwunli kakale ndiye watinotjila ndiye.

7 Kusineni, akuta ibo bose bana luzibo igogu. Koga bamwe, nentha yekuti bakawolobela midzimwana kudza kube nasi, banodla zodliwa sekunoyi zwapigwa midzimwana; nehana dzabo, dzisakasima, dzoba nehambgwa. 8 Zodliwa azwingatisedzedze kuNdzimu. Atita tilibabi kupindisisa hapa tisingadle, kakale atitabahine hapa tikadla.

9 Yelani njele, kuyetila kuti sununguka kwenyu ikoku kusibe tjikunhiso kubasakasima mukugalamoyo. 10 Ngobe hapa umwe engakubona, iwe unoyi unaluzibo, udla muthempeli yemidzimwana, hapa hana iye inabutela ikoku akungawunkuludzile kuti adle zodliwa zwakapigwa midzimwana? 11 Kubva kuti iwhoyu nghalimoyo unabutela, Khirisitu waakafila, wapaladziwa ngeluzibo gugo. 12 Ndizo, tjinyila hama dzidzo kakale ukubadza hana dzadzo dzinabutela unobe watjinyila Khirisitu. 13 Ndizo ke, hapa zodliwa zwithama kuti hama itjinye, anditowhodla nyama tjatjose, swiyo ndikakothama kuti hama itjinye.