1 Hapa umwe wenyu esingawhisisane nehama, angaba netjilopa tjeyenda kunlayo mbeli kwebasakalulama pana kuti ayende kubayengemali? 2 Amutoziba kuti bayengemali banowhotonga hango? Hapa hango yowhotongewa namwi, mungakon'wa tonga milandu mitukununu? 3 Amutoziba kuti towhotonga batumwa beNdzimu? Nekungapani ke, ndebo dzebutjilo guno! 4 Ngono hapa muna milandu yakajali, moyiyendeselani kubanolingigwa pasi negubungano? 5 Ndoleba ikoku kuti ndimubhatise honi. Kungabe kuli kuti akuna nhu pakati kwenyu unabutjenjebvu gwakalizana kuti ungatonga nlandu wemakamu? 6 Koga hama inoyenda kunlayo igwisana neyimwe hama, mbeli kwebanhu basingagalemoyo!

7 Kuti mulongane nlandu pakati kwenyu kolakidza kuti matjikundiwa kale. Kungentha yeni musingalekedze mukatjinyigwa? Kungentha yeni musingalekedze mukatjebegwa? 8 Koga imwi tjekwenyu moyeta zwakayipa mutjebela, nayiko mutjebela hama dzenyu. 9 Amutoziba kuti basakalulama abatowhodla nhaka yebumambo gweNdzimu? Musitjengegwe; kungabe kusazwibhata, kene banamati bemidzimwana, kene bupombgwe kene pinga, kene nlume unowalilana nhobo newumwe nlume kene nkadzi unowalilana nhobo newumwe nkadzi, 10 kene mbava, kene bapupi, kene balaladzi, kene banotukana, kene batjebeli akuna umwe wababo ungadla nhaka yebumambo gweNdzimu. 11 Bamwe benyu bakabakajalo. Koga makangudziwa, makatjenesewa, makalulamisiwa muzina laHe Yesu Khirisitu nemuMeya yeNdzimu wedu.

12 "Zwinhu zose zobvumigwa kundili," koga ateyizo zose zwinobhatsha. "Zwinhu zose zobvumigwa kundili," koga andingayetiwe nlanda netjimwe tjazo. 13 "Zodliwa zwakayetigwa ntumbu nentumbu ndewezodliwa." Kakale Ndzimu unowhopaladza kose bubili gwako. Mbili awuzoyetigwa kusazwibhata, koga kuti uhingile He, kakale He banolawula mbili. 14 Ndzimu wakamusa He kubafi naswi bo unowhotimusa ngemasimba awe.

15 Amutoziba kuti mibili yenyu inhango dzaKhirisitu? Ndizo ndingatola nhango dzaKhirisitu ndikadzithama nhango dzemhombgwe? Aa! 16 Amutoziba kuti unozwibhatshanya nemhombgwe unobe mbili un'ompela nayo? Ngobe, sekwakakwagwa, kuti "Babili banowhoba nyama in'ompela." 17 Koga iye wakabhatana naHe unobe meya in'ompela naye.

18 Thubukanani nekusazwibhata. Matjinyo amwe ose anoyetiwa nenhu akuhhe kwembili; koga mhombgwe inotjinyila mbili yayo. 19 Amutoziba kuti mibili yenyu ithempeli leMeya Yakayengemala imukati kwenyu, yamunayo ibva kuNdzimu? Amutji imwi tjekwenyu; 20 makatengwa nentengo. Ndizo kudzani Ndzimu mumibili yenyu.