Êxodo 3

Mulungu komtanga Musa

1 Siku dimwe Musa viyakalile yodima ng’hondolo na luti wa Yesilo mkoi wake‚ mkulu wa nhambiko wa Midiani, kadilanguliza bumbila kufosa ubanzi wa uswelo wa zuwa muna ichuwala kuhita Holebu‚ kuna mulima wa Mulungu. 2 Msenga wa Mndewa Mulungu kamulawilila Musa muna dilambi da moto muna ichibago. Musa kawona ichibago chokwaka moto mbali hachitakamile. 3 Musa kalonga, "Yano mauzauza, habali chibago chokwaka moto na hachitakamila? Nizachikwenhukila nikachilole."

4 Mndewa Mulungu viyawone kuwa Musa kokwenhuka habehi, kamtanga kulawa hagati ya ichibago na kalonga, "Musa! Musa!"

Musa kamwidika "Wona, nabaha."

5 Mndewa Mulungu kamulongela‚ "Sekeukwenhuke habehi. Vula vilatu vako, kwaviya howimile ni hanhu helile." 6 Maabaho kalonga, "Niye Mulungu wa wasaho zako‚ Mulungu wa Bulahimu na Isaka na Yakobo." Ivo Musa kaigubika chihanga chake‚ kwaviya kadumba kumulola Mulungu.

7 Maabaho Mndewa Mulungu kalonga‚ "Kweli niyawona manhesa ya wanhu wangu weli muna iisi ya Misili. Nihulika viwolila kwa ichimu cha wemilizi wa Misili. Niumanya usungu wawo. 8 Ivo nihumuluka muladi niwakombole muna yamakono ya Wamisili‚ nizawalava umo na kuwagala kuna isi ino inogile na ng’hulu, isi ili na ulongo unogile‚ isi ya Wakanaani na Wahiti na Waamoli na Wapelizi na Wahivi na Wayebusi. 9 Lelo kulila kwa wanhu wangu Waisilaili kunifikila niye. Niwona viya Wamisili viwowagaza. 10 Lelo hita nokutuma kwa mfalume wa Misili muladi ukawalave wanhu wangu wana Isilaili muna iisi ya Misili."

11 Mbali Musa kamulongela Mulungu‚ "Niye yelihi mbaka nidahe kuhita kwa mfalume wa Misili na kuwalava Waisilaili muna iisi ya Misili?"

12 Mulungu kamulongela‚ "Nizakuwa hamwe na weye. Na chino chizakuwa chilaguso kuwa niye niiyo nikutumile. Vondauwalave wanhu muna iisi ya Misili, kwizamtambikila Mulungu muna umulima uno."

13 Musa kamulongela Mulungu‚ "One nihahita kwa wanhu wa Isilaili na kuwalongela‚ ‘Mulungu wa wasaho zenu kanhuma kumwenu‚’ nawo wezaniuza‚ ‘Zina jake nani?’ Niwalongeleze?"

14 Mulungu kamulongela Musa‚ "NIYE IYO NIYE." Na kalonga, "Walongele vino wanhu wa Isilaili‚ ‘Ija iwomtanga IYO NIYE kanhuma kumwenu.’ "

15 Iviya Mulungu kamulongela Musa, "Walongele Waisilaili‚ ‘Mndewa Mulungu, Mulungu wa wasaho zenu na Mulungu wa Bulahimu na Mulungu wa Isaka na Mulungu wa Yakobo‚ kanhuma kumwenu.’ Dino ijo zina jangu siku zose, dizakumbukigwa kwa welesi wose." 16 Hita na ukawating’hanize hamwe walala wa Isilaili na uwalongele‚ Mndewa Mulungu, Mulungu wa wasaho zenu na Mulungu wa Bulahimu na wa Isaka na wa Yakobo, kanilawilila na kanilongela, "Niziwona mbuli zimutendiligwa uko Misili."

17 Na nimulaganilani kuwa nizamulavani muna yamanhesa yenu uko Misili na kuwengiza muna iisi ya Wakanaani na Wahiti na Waamoli na Wapelizi na Wahivi na Wayebusi‚ isi ili na ulongo unogile.

18 "Walala wa Isilaili wezakutegeleza, maabaho weye na walala wa Isilaili mwizahita kwa mfalume wa Misili na kumulongela, ‘Mndewa Mulungu, Mulungu wa Waebulaniya, kaiting’hana na cheye. Lelo chokulamba chilekelele chigende muna ichuwala siku nhatu muladi chikamulavile nhambiko Mulungu wetu.’ 19 Novimanya kuwa mfalume wa Misili hezawalekela muhite mbaka yahavimanya kuwa niye nina nguvu kufosa yeye. 20 Mbali nizasang’hanila nguvu zangu kuwatagusa Wamisili kwa kutenda vinhu va mauzauza haja. Hamwande kezamulekelani muhite.

21 "Nizawatenda Wamisili wanoge kumwenu muladi vondamusegele‚ sekemusegele makono muhala. 22 Chila mwanamke wa Chiisilaili kezampula mkaya miyage na ija yokala nayo muna ikaye yake yamwing’he via va hela na via va zahabu hamwe na mawalo. Mwizawavaza wanenu wa chike na wa chilume. Vino niivo vondamusole vinhu va Wamisili."