1 Aru nankɔ n shɔbiiyi, n ɔrɔɔ a sisɨn gbeteyɛ n kasɔɔ zɛnɛtɛ n ji zɛwɔ tɔɓa! Ɔ pɔ̃n sisɨn purutɛ, n baasi jo a ɔkɔɔ! n shɔbiiyi ɔrinɛyi, shɔmpɛ nɔgbete ɔ shidɔɔkaziti awɔ sisɨn ãnɛ a nyaba Uɓeyelapa kɔ. 2 Yudiya a Sintishi, sɔkɔ n gakɔɔtɔ, ɔ nya u ɔ̃ gbete aru Uɓeyelapa nii. 3 Ɔkɔɔma, n shɔ wesayi, n kasirɛ ɔ pɔ̃si sumiyi naatɔ; aruviya i shovi tɛttɔ fɛ̃ɛm a nkɔni a ɗɔɔ ruu tɔ̃vɨn nwanɛ, a Kilɛmɛn ɗɔzɔɔ au shɔvi shonɛyi zɔ gãsini kpai, shɔgbete shɔ beeyi nii tɛtttɔ a Ɗalapa laabeenɛ suruniyɛ.

4 Mɛnɛ kopiɗaviya ɔ ɔ̃ a sisɨn puruni a ɗɔɔ yuɓasinɛ a Uɓeyelapani. N sha sɔ̃ntɛ tot: ɔ ntabiinyatɔ̃nɛtɔ!

5 Ɔ tasi yuu roorinɛtɔ a ko-piyani. Yɛ ɔ̃ ɓa ɗɔkɔkɔ ɓa Uɓeyelapa yɛ atɔ. 6 Ɔkɔɔ yɔriyuunɛ aru viwɔɔni, ama ɔ gaki Ɗalapa tɔ aru vigbete ɔ kasiyɛni kpai, ko-piɗaviya ɔ gakiu a sisɨn dɔ̃rinɛ. 7 Ɗalapa sisɨn puru tɛɛ jashɔzɛ vizɛnɛtɛttɔ, yɛ kɔ ɔ sisɨntɔ a lɛrinɛni awɔ yuɓasinɛ a Kirisi Yesɔni.

8 Au nyayisinɛ n shɔbiiyi, ɔ sisɨn u yii a vitɔ̃vɨng gbete n ti bɛlinɛyɛ: vigbeteyi pɛ nizɛ, vikasinɛ, vigbete au ã ɔ̃nɛ yuuyɛ, vigbete tɛpɛ-tɛpɛyɛ, vi ɔrinɛ, a vi bassinɛ. 9 Ɔ yɛ ɗekɨn a vigbete ɔ matiyɛ awɔ tɛ ang naayɛni, vigbete n shaliyɛ a vigbete n pɛliyɛni. Ɗalapa gbete ãu ɔ̃nɛbiinyatɔ̃nɛ yɛ ɔ̃ a ɔkɔɔni.

10 Ang n ɔ̃nɛ yuɓasinɛ a Uɓeyelapani pɛ vi binyatɔ̃nɛ ang ɗɔbiini, akɨnti ɔ̃nɛ dɔkɔkɔ gbete ɔ ji pɔ̃sinnaa ɓayɛ ɔ tasin sɔ̃ntɛ nɛi sisɨn doo ang biini. N jo sha ɓanɛ ɔ yang kɔnɛtɛ ɓa, ama ɔ ji kpaa nyaba tasinɛ ɓa. 11 N ji sha ɓanɛ aru n ɓa vigbete n kasiyɛni ɓa, n mati nɔgbete n yɛ ɔ̃ yɛ tɛttɔ a vigbete n kɛ kpang yuunɛ ɗɔniyɛ. 12 N zɛnɔɔ ɔ̃nɛtɛ aɗagbete n vi ɓa naani ɓayɛ, n zɛnɔɔ ɔ̃nɛ sɔ̃ntɛ aɗagbete n vi a naaniyɛ. N zɛu vaatɛ, nɔgbete kopiɗɔpiya, a kopiɗaviya, pɛlintɛ, ko vi teesintɛ ko vi ji teesin ɓa, ko n awuni bang ko fẽe. 13 N yɛn zɛnɔɔ vi pɛlinɛtɔ piti kpai a kaka gbete Kirisi ang yɛni.

14 Ama kɔrisitɛttɔ tɔ̃vɨn ɔ pɔ̃sinnaa aɗagbete n si yɛti yuyɔrinɛni. 15 Ɔ Filipiyayi ɔ zɛtɛttɔ tɔ̃vɨn a ɗaa n yaa Makidoniya yɛ aɗagbete n gaa ruu tɔ̃vɨn nwanɛ, si ji ɔkɔɔ sheeli shɔ sisɨn ãnɛ gbete ɔ pɔ̃sinnaayɛ; si ji ɔkɔɔ sheeli shɔ gbeteyi kpaang vi tɔ̃vɨnrɛ a bintanɛni. 16 Aɗagbete n si a Tasalonikayɛ n kã naapɔ̃sinɛ ɔ pɔ̃sinnaatɔ tɛɛ ɓa gbete si tɛttɔ. 17 Ɓanɛ aru n kã vi ãnɛ tɛnɛ awɔ naa ɓa; ama n kasirɛ ɔ kpaa viwɔ awɔ ɓɛɛ. 18 Dɔdɔrim n tɛ vigbete ɔ ãyɛtɛ kpai, au tɛɛ vigbete n kasiyɛ tɛttɔ! Dɔdɔrim vigbete n kasi kpaanɛ kpai Abaporoditu n ting ɔ vigbete ɔ ang-yɛtɛ. i naa viyuu ãnɛ gbete sũrũ-sũrũ a shɔ ã Ɗalapayɛ, viyuu ãnɛ gbete Ɗalapa tɛyɛ au kasiyɛ. 19 N Ɗalapa yɛ ãwɔ vigbete ɔ kasiyɛtɔ kpai, a ɓuzɨn u vinaa ɗɔrɔrɔ a Kirisi Yesɔ kabii. 20 Basinɛ yɛnɛ u Ɗalapa a Uɓeye ɗɔbi dɔdɔrim yɛnɛ ɗekɨn dangdang! Nankɔ!

21 N gee Ɗalapa shɔbiiyi kopiya nyatɛ kpai gbete i pɛ Kirisi Yesɔ ɓɛɛyɛ. Shɔ sisɨn anɛ gbeteyi aɗɔm a nkɔni i gee ɔ nyatɛ jo kpai. 22 Ɗalapa shɔbii gbeteyi aɗɔm kpai i gee ɔ nyatɛ, badijo shɔ gbeteyi a kpati kayisa nyaba wɛrɛm. 23 Mɛnɛ Uɓeyelapa Yesɔ Kirisi shonɛ tɔ̃vɨn u ɔ̃ a ɔkɔɔni kpai.