1 Ruumanɛ shɔ gaanɛ pɛli vishonɛ ruu Ɗa bassinɛ aɗɔ wɔsɔ-wɔsɔ gbete shɔ Ɗa aɗɔnyɛ. 2 Shɔ tɔ̃ri tali a nyejaa ɓeli, gbete shɔ banɛ ɗɔɔ wɔsɔ-wɔsɔyɛ. Au ɓuzɨn shɔ tɔ̃ri ɗɔgbete shɔ pɔ̃ pitili a laa vipɔ̃nɛ a borodi viyuu ãnɛ gbete shɔ ã Ɗa yɛni aɗɔn. 3 Akɨnti taliuni gbete pɛsiyɛ ɗɔwɔɔ aɗɔ gbete shɔ ɓanɛ ɗɔwɔsɔ-wɔsɔyɛ. 4 A ɓuzɨuni laazã wɔ aɗɔn gbete too laa nɔɔ sũrusũru au yuuniyɛ a a kpati ruumanɛni ɗɔn. Vizitimiyi shɔ tɔ̃ri a tari mɛɛ a mana ni a ɓuzɨnni wɔsɔ̃n Haruna labaa gbete shɛshi gapa yɛ a tari wɔɔyi ziti gbete shɔ bee nyaãsinɛ ai yuuniyɛ. 5 Ayuu a kpatiu vi suru ai nakosẽri si ɗɔn gbete i shi naa Ɗalapayɛ, i pooti nakosẽri i kuki ɗɔu awuni aɗɔgbete shɔ yaasi shɔ ruuviniyɛ. Ama dɔdɔrim ɓa aɗagbete uyɛ taadɔɔ ruumi wasa-wasayɛ ɓa. 6 Shom nɔgbete shɔ tɔ̃ri nyaba nɛ ruwu u ɔ̃yɛ, shɔlansiyi iyɛ tali ɓili ko-leepiya i pɛli vishonɛrɛ, 7 ama ɓɛɛji shɔlansi pɛ̃nɛba yɛ ɓuzɨn taliurɛ, pɛli nankɔ ɓagbete sheeli a saa. Tuu kpaa a naani gbete shɔ ã Ɗalapa aru viyuu ãnɛ au ruu ruuvini a shɔ gãsiyi ɓɛɛ ayuu vikɔ̃linɛ gbete i pɛli ɓa ai zɛnɛni ɓa. 8 Ji nagbete Suru Wɔsɔ-wɔsɔ tasi vimyɛ piti kpai nɛ, nyaba yɛnɛ Ganɛ Ɗɔɔ Wɔsɔ-wɔsɔ shɔji ɓeli pɛ̃nɛ ɓa, naa tali shɔ gaanɛu doo ɗɔɔ shinɛyɛ. 9 Shompɛ vigbete au tasi ɗagbete dɔdɔrim yɛ. Vim tasinɛ nɛ, naa ãnɛ a viyuu ãnɛ yɛ pɔ̃ shɔ sisɨn ãnɛ a Ɗabiiyi sisɨn u ɔ̃ wasak ɓa, 10 Vimiyi ɔ̃ ɓɛɛji ka vishaanɛ a viboonɛ a ɔ̃nɛ jaze bi wasak sheeli, shompɛ vigbete shɔ nwanya ai yuu lee-lee anɛ ɗagbete Ɗa shɛshi nya ãsinɛ sɔɔ yɛ.

11 Ama Ɗalapa atɛtɔ gboti aru shɔnyanwaanɛ pɛ̃niɓa aru vitɔ̃vɨng gbete i dɔdɔrim i a ɗɔmyɛ a tali gbete pɛli vishonɛ aɗɔnyɛ ukɔ ɔ̃rɛ pɛ̃nɛɓa tɛpɛ-tɛpɛni; ɓa tali gbete jashɔzɛ tɔ̃ri yɛ ɓa, ɓa atette vigbete Ɗa shɛshi a koo yɛ ni ɓa. 12 Kirisi to ɗɔɔ wɔsɔ-wɔsɔ ji ɓagbete sheeli, ji tu kpaa jaa ko napu ɓa aru yuu ãnɛni ɓa; ama ã ɓɛɛ jiu kpaa aru u raa shɔ yuu koo kpai gbete sɔ̃nya ɓa yɛ. 13 Kpaa jaa a kpaa napu i pũti janapuyini shɔ tattirɛ a shɔgbete i ɓa wɔsɔ-wɔsɔ ɓai yuu, gbete sɔɔ shɔgbete i ɓa wɔsɔ-wɔsɔ ɓa i ɔ̃ wɔsɔ-wɔsɔrɛ. 14 Nagbete vimpɛ nizɛ, shɔ shakɛ piruuvi nɛ Kirisi kpaa viya? Shɔgbete au ruuvini ɓa yuuni ɓa, ãutɛ yuu a Ɗalapa kabii a nyaba Suru gbete sɔ̃nya ɓayɛ, u kpaa yɛ sɔkiu lɛrinɛtɔ a sisɨnni u yau vilansi gɨnɛrɛ u shoshi Ɗalapa gbete u suru aɗɔni vishonɛrɛ.

15 Aru nankɔ Kirisikɔ ɔ̃rɛ shɔ shi atette shɔzɛ a Ɗalapa, kɛɗɔn aru shɔgbete ai ã sisɨn au biiyɛ i yɛ kpa Ɗa susãri gbete Ɗalapa manɛ nɛn ãyɛrɛ, vim yɛ pɛtɔ aru vɔrɔ gbete shɔ ranaa au naa aru ruuvini gbete i pɛli aɗagbete i si doo ɗɔgbete i shovi a ruumanɛ gbete i gaa vishonɛ pɛlinɛ a wuniyɛ.

16 Naa shɔwɔ kɛ maruunɛ au vivɔni, ɔ̃tɛ kaka jazɨng a kɔrɔ sitɛ shɔ nta shɔgbete maruu nya vɔrɔtɛ pɛtɔ. 17 Aru ruumanɛ u nya shanɛ wɔɓa sitɛ shɔ vɔtɛ, yɛ zɛnɔɔ shɔ naa ãnɛ ɓa aɗagbete u ɗoo a suru ni ɓa. 18 Arumkɔ ruumanɛ gayɛ shɔji zɛ ɓa, ama shɔ zɛ aka kpaa. 19 Akɨnti gbete Musa nwari shɔ nya kpai aru nya ãsinɛ a vigbete i shayɛni. Kɛɗɔn a tu kpaa napu a kpaa jaa a rãa a mii, a magapa a shẽti mɛrɛ̃ɛ̃ nweri a misirɛ ayuu laabeenɛ nyaãsinɛ a shɔ yuuni piti kpai. 20 Kɛɗɔn Musa shanɛ, <<Shompɛ kpaa gbete ɓasi Ɗalapa ruumanɛ gbete ãsinya nɛ ɔ gɨnyɛ.>> 21 Sɔ̃njo nyabankɔ Musa tuu kpaaurɛ a misirrɛ ayuu Taliuni ayuu vigbete shɔ pɛlivishonɛ awuni aɗɔ Ɗa basinɛuni piti kpai. 22 A nyabankɔ nɔgbete nyaãsinɛ shayɛ, ɔ̃kɛ naa ko-iviya shɔ sɔki a kpaa wɔsɔ-wɔsɔ, shɔ yasi shɔ ruuvini ɓɛɛjo a gbete shɔ tẽẽ kpaayɛ.

23 Ɔ̃tɛ kaka jazɨng a kɔrɔ vimiyi ɔ̃ nankɔ tɛpɛ-tɛpɛ u sɔ vigbete i a kotipim i ɔ̃ wɔsɔ-wɔsɔ, aru i ɔ̃ vigbete shɔ sɔɔ a kolapayɛ, ama vi kolapayi i kasi viyuu ãnɛ gaanɛ au tɔ̃vɨnyɛ. 24 Aru Kirisi ji to ɗɔ wɔsɔ-wɔsɔ gbete jashɔzɛ tɔ̃ri au naa ɓa, gbete ɔ̃ ɓɛɛ ji naa ukɔyɛ. Kirisi yɛ ɓɛɛji kolapa au yuu, ɗɔgbete dɔdɔrim shɛ aɗɔn a Ɗalapa ɗekɨn au yuu piti kpai. 25 Kirisi yɛ kolapa ɓa lee-lee ɓa aru u n ti viyuu ãnɛ nagbete Shɔnyanwanɛ Yahudawayi i yɛ ɗɔwɔsɔ-wɔsɔ ko-pi saa shopiya a kpaa vivaani aru yuu ãnɛ ɓa, 26 Si kɛ ɔ̃nɛ dɔkɔ, si ɔ̃tɛ kaka jazɨng a kɔrɔ Yesɔ u booraa a lee-lee ya, yunɛ aɗagbete Ɗa shɛshi kooyɛ. Ama dɔdɔrim shɛshiu yuutɛ a koo ɓagbete aru u ãu yuu u raa shɔ a ruuvini naani a koo piti kpai. 27 Ji nagbete shɔ maatɛ nɛ jashɔzɛ yɛ vɔ ɓagbete sheeli, a kɨntiuni kɛ Ɗalapa ruuyeenɛ au yuu, 28 Jinankɔ Kirisi ãu yuurɛ a vɔ ɓagbete aru shɔzɛ waanɛ i kpa naraanɛ ai ruuvini. Kirisi yɛ sɔ kotipitɔ aru u sɔki shɔ waanɛyi ruuvini, yɛ sɔ sɔ̃ntɔ, totiɓa au ruuvini ɓa, u raa shɔgbete i au ɗɔganɛyɛ.