1 Lee yumusinɛ tɛnɛda u ɓɛɛ anɛ. Si Yesɔ zɛ tɛttɔ nɛ ɗagbete yɛ yaa kootipi pɛlitɛ yɛkɛ Ɓeye ɗɔbii. Aru Yesɔ ɔri shɔgbete i a kootipim tɔ ko-pi ɗaviya, ɔriitɔ anɛ ɗagbete koo yisi nyayɛ.

2 Yesɔ au jadɔɔyini i ɗɔ gbete i shaa vishaanɛ ɗarɛ yɛ. Si japɛ̃pɛ̃ɛ̃ pɔ̃ ruutɛ a Yahuza sisɨn gboti, Isikariyoti Siman ɓɛjaa, nɛn mɛli Yesɔtɔ. 3 Yesɔ zɛ tɛttɔ si ɓeye ãu vi tɛttɔ a naa kpai; zɛ tɛttɔ shɛpɛ a Ɗalapa ɗɔbii, yɛ sɔɔ sɔ̃n Ɗalapa ɗɔbii. 4 Kɛɗɔn Yesɔ yuurɛ a ɗɔɔ vishaanɛni, a zɔ̃u fãrã gbete au si aka ɓilirɛ, a ma taweli rɛ au sãng. 5 Kɛɗɔn a tɛ̃ɛ̃ mii gbenti a gaa u jaɗɔɔyi dɔɔ sɔɔkinɛ u ɗɔgbete sɔ̃li a taweli yɛ gbete ma au sãng. 6 Arɛ a Siman Bituru ɗɔbii, Bituru geliunɛ, <<Mɔkaa yɛ sɔrin dɔɔ rɛ ya Uɓeyelapa?>>

7 Yesɔ kasiu nyanɛ,<<Dɔdɔrim, a ji zɛ vigbete n pɛliyɛ ɓa, ama a yɛ zɛtɔ ɗekɨn ni.>>

8 Bituru ɓeli nyanɛ, <<Yɛ pɛli ɓa, koo, yɛ yisi nyajo weze a yɛ sɔrin dɔɔ ɓaǃ >>Yesɔ kasinya nɛ,<<N ji sɔɔraa dɔɔ ɓa, a yɛ ɔ̃ toti n jadɔɔ ɓa.>>

9 Bituru kasinya nɛ, <<Uɓeyelapa, mɔkaa sɔɔrinnɛ dɔɔ kɔ sheeli, ama a sɔɔrin naani a yuuni kpaiǃ >>

10 Yesɔ kasi nya a shanɛ, <<Shɔgbete weli bitɛ kãu yuu sɔɔnɛ toti ɓa, see u dɔɔyi kɔ sheeli, ɔ kpai ɔ pɛ wɔsɔ-wɔsɔ see gbete.>> 11 Si Yesɔ zɛ shɔ gbete yɛ mɛliu tɛttɔ gboti; aruukɔ sha kɛkn nɛ, <<Ɔ piti kpai ɔ shɔ wɔsɔ-wɔsɔ, see shɔzɛ gbete awɔ tete.>>

12 Akɨnti gbete Yesɔ yisi i nya dɔɔ sɔɔnɛtɛ, kɛɗɔn a tosi u fãrã sɔ̃n bi, a sɔɔ ɗɔɔ vishaanɛrɛ. A hɨnɛ, <<Ɔ zɛ vigbete n pɛlɔɔntɛ ya? 13 Jo nizɛ ɔ ɓannɛ shɔmala a Uɓeyelapa, ɔ shatɛ tɔ̃vɨn arumkɔ n ji nankɔ. 14 Nkɔng ɔ̃rɛ Uɓeyelapa a shɔmala, n sɔɔrɔɔ dɔɔtɛ. Ɔkɔɔ ma ɔ sɔɔri zɔɔ ji nankɔ. 15 N tasɔɔ nɔɔtɛ, ɔ pɛli sɔ̃nji nagbete n pɛliyɛ. 16 N gelɔɔm pɛ nizɛ: Fooyi i tɛɛ ɓɛshɔwɛrɛ ɓa, Jashonɛ ma yɛ tɛɛ shɔgbete shouyɛ ɓa. 17 Dɔdɔrim ɔ zɛ vi tɔ̃vɨntɛ, ɔ kɛ shovinɛ awuni ɔ yɛ nta tɔ̃vɨntɔ!

18 << N ji sha ɓa awɔ yuu piti kpai ɓa; n zɛ shɔgbete n lɔyi tɛttɔ. Ama aru shɔ sɔ̃ri nya vigbete Ɗanyaruubii shayɛ nɛ,<Shɔgbete shaan vishaanɛ riitɛ n shɔnɔ̃pɔ̃.> 19 N gelɔɔ vim dɔdɔrim n ɗa yɛ pɛliyɛ, nɔgbete kɛ pɛlinɛ, ɔ ã sisɨntɔ nɛ nkɔng ɔ̃rɛ ukɔ. 20 N gelɔɔm pɛ nizɛ, shɔgbete kɛ tɛ shɔgbete n shoyirɛ naa nɛ, tɛng naa sɔ̃ntɛjo; shɔgbete kɛ tɛng naa nɛ, tɛ pɛ gbete shongyɛ.>>

21 Akɨnti gbete Yesɔ sha vimtɛ kpaiyɛ, nta kpetinɛtɔ au suruni a shanɛ,<<N gelɔɔm pɛ nizɛː shɔzɛ gbete awɔ tete yɛ mɛlintɔ.>>

22 U jadɔɔyi i kɨnnɔɔ a zɔɔ bi, i ji zɛ shɔgbete nwanya au yuuni ɓa. 23 Shɔzɛ gbete atette jadɔɔyi, gbete Yesɔ ɔriyɛ, u si ɗɔɔ ɔ̃nɛ a Yesɔni maani. 24 Kɛɗɔn Siman Bituru geli jaaunɛ, hɨ Yesɔ nɛ nwanya a pi yuu piya?

25 Kɛɗɔn u Jadɔɔu arɛ a Yesɔ ɗɔbii maani a hɨunɛ, <<Piya Uɓeyelapa?>>

26 Yesɔ kasinya nɛ, <<Ukɔ ɔ̃rɛ shɔgbete n yɛn ãu borodirɛ a naa n kɛ hãnɛ a pii; pɛjo ukɔ.>> Kɛɗɔn Yesɔ daa borodi, a ã Yahuza rɛ, Siman ɓɛjaa Isikariyoti. 27 Tɛ̃ɛ̃ti naa Yahuza tɛ borodi gbete Yesɔ daatɛ, kɛɗɔn japɛ̃pɛ̃ɛ̃ tou birɛ. Yesɔ geliu nɛ,<<pɛli vigbete a nɛn pɛliyɛrɛ gbãgbãǃ >> 28 Ama atette shɔ gbete i ɗɔɔ vishaanɛ a wuniyɛ i ji zɛ vi gbete pɔ̃rɛ Yesɔ geliu Yahuza nankɔni ɓa 29 Yahuza si shɔ lazɔrɔ saa sãnɛ arumkɔ gãsi Yesɔ jadɔɔyi i tɔnɛ mɛnɛ Yesɔ geliutɛ nɛu yɛrɛ nɛu woo vigbete shɔ kasi a ɗɔɔ yumusinɛ tɛnɛda, ko nɛmɛnɛ geliutɛ nɛu ã shɔraayi viwɔɔ.

30 Yahuza tɛ borodiu rɛ, kɛɗɔn a shɛ ɓilirɛ. Si pɛ a zɨmba.

31 Akɨnti gbete Yahuza yaa ɗɔutɛ, Yesɔ shanɛ, <<Dɔdɔrimkɔ shɔ bassi Shɔzɛja tɛ; shɔ bassi Ɗalapa tɛ au yuukɔ 32 Shɔ kɛ bassi Ɗalapa nɛ au yuu, kɛɗɔn Ɗalapa yɛ bassi Shɔzɛja ji au yuu, yɛ pɛlitɔ gbãgbã au yuu. 33 Maa jaayi, ɗaa yaatɛ pẽtẽrẽ gbete n yɛn ɔ̃ toti a ɔkɔɔni ɓa, ɔ yɛ kangtɔ; ama nagbete n geli yupɛ̃ni Yahudawayi nɛ,<Ɗɔgbete n yɛn, yɛyɛ ɔ zɛnɔɔ yɛnɛ ɓa.> 34 N ãwɔ pɛ nya-ãsinɛ sɔɔ: ɔ ɔri zɔɔ ruubiitɔ. nagbete n gelɔɔ yɛ, ɔ̃tɛ kaka jazɨng akɔrɔ ɔ ɔri zɔɔtɔ. 35 Ɔ kɛ ɔri zɔɔnɛ, kopiya yɛ zɛtɔ nɛwɔ pɛ n jadɔɔyi.>>

36 Bituru hɨ Yesɔ nɛ, <<A yɛkɛ piya Uɓeyelapa?>>

Yesɔ kasinya nɛ, <<A yɛ zɛnnɔɔ gɨnnɛ dɔdɔrim ɓa, ama ɗekɨn sekaa a yɛ gɨntɔ.>>

37 <<Uɓeyelapa aru i vi n yɛn zɛnɔɔ a gɨnnɛ ɓa dɔddɔrimni ɓa viya? N kasitɛ n vɔ aa yuu!>>

38 Yesɔ kasiunya nɛ,<< A kasitɛ nizɛ a vɔ ang yuu ya? N gelaa tɛ nizɛ: kɔ̃ɔ̃ ɓɛɛ nya ɓaanɛ a yɛ masin nya ɓa taati a nɛn ji zɛn nii ɓa.>>