1 Si rotɛ dɔɔ ziti shɔ Yahudiyayi i musiyuu aru pasika a vishaanɛ, borodi gbete vuri ɓa ɗɔnɓa yɛ, yupɛ̃ni nyawaanɛyi a jaa Ɗa a shɔmala nya ãsinɛ Musa i kã nyaba gbete i sã Yesɔ nɛi nyo vɔrɔ. 2 I shanɛ,<<Ama ɓa ɗāā yumusinɛ pasika ɓa, aru i nta seti nɛ mɔɔyi i yɛ yusu nyarɛ.>>

3 Aɗagbete Yesɔ u si a Betani a Siman wɛrɛ shɔgbete vibii tasiu raa yɛ, Yesɔ usi ɗɔɔ vi shaanɛ, suwɔɔ au ɗɔbii a jakotoro nɔɔ naa koluba sũrũ-sũrũ gbete shɔ ɓanɛ tolari u saa a yuuni, kɛɗɔn suu kunya kotoro nɔɔurɛ a tatti Yesɔ nɔɔu ayuu.

4 Shɔgbete isi a ɗɔuni i lɛsirɛ sisɨn i geli zɔɔnɛ, <<shɔ lɛsi nɔɔm pi ruviɗɔkɔ viya?>> 5 I shanɛ<<shɔ si mɛli nɔɔu vigbete tɛɛ saa laa maani-maani ɓa taati (300) a tuu saa u a ã shɔ raayi. i lasi suurɛ wàànɛ.>>

6 Ama Yesɔ risiyinyanɛ<<Ɔ ya suu weze, ɔ yɔriunɛ piviya? Pɛlinpɛ vitɔ̃vɨng ang ɗɔbiini. 7 Ɔ ji a shɔ raayini a lee-lee ɔyɛ ãi vitɔ aɗagbete ɔ kasiyɛ. Ama ɔyɛ zɛmɓa a lee-lee niɓa. 8 Suum Pɛlin vigbete yɛ zɛnɔ pɛlinɛ tɛttɔ, sum tatti nɔɔ ayuu naa shɔ si tatti ang lee vɔrɔyɛ gbãntɛ gbɔ̃ti. 9 N gelɔɔtɛ nizɛ, aɗagbete shɔyɛ wàánya a Ɗa nya ruubii a koo piti, vigbete suum pɛli yɛ shɔyɛ kpasisɨntɔ au knti vɔrɔni.>>

10 Kɛɗɔn Yahuza gbete shɔ ɓaunɛ Iskariyoti atette Yesɔ jadɔyi kopi tu ziti, yɛ shɔyupɛ̃ni nyawàánɛ a jaa Ɗa ɗɔbii aru u mɛlinɛ Yesɔ ai ɗɔbii. 11 Naa yupɛ̃ni nyawàánɛ a jaa Ɗa i ntatɛ i nta sisɨn puru waanɛ ai geliunɛ iyɛ ãu saa. kɛɗɔn Yahuza Iskarayoti kãkɛ nyaba gbete yɛ ãi Yesɔ i nyo vɔrɔ.

12 A dii gbete shɔ gaa vi shaanɛ yumusinɛ gbete vuri ɓa ɗɔnɓa yɛ, a Yahudiyayi nakoo kɛ dii gbete shɔ yee jamɛrɛ̃ɛ̃ yumusinɛ pasika yɛ, Yesɔ jadɔyi i hɨunɛ, <<A kasinɛ u tɔ̃raa ɗɔ vi shaanɛ yumusinɛ pasika pi ɗɔpiya?>>

13 Kɛɗɔn Yesɔ sho u jadɔyi ziti yɛnɛ Urushalima a ãsii-nyanɛ,<< Ɔ to yɛti komɔɔ ɔyɛ kpaa jawɔɔ tuu jakpari miitɛ ayuu ɔ gɨu akɨntini. 14 A wɛrɛ gbete jaukɛ tonɛ piti, ɔ geli shɔwɛrɛunɛ, <shɔmala hɨ nɛ: jaa gbete nɛn yɛ shaa vi aɗɔn au jaɗɔyini piya?> 15 Jau yɛ tasɔɔ jaa pẽniba wɔɔ shɔ yisiu ɓuzɨn tɔ̃rinɛ tɛttɔ. Ɔ tɔ̃riu ɗɔɔ vi shaanɛ a ɗɔukɔ.>>

16 Kɛɗɔn Yesɔ jadɔyi i to yɛti komɔɔrɛ i kpaajo nagbete Yesɔ geliyi kɔ, i tɔ̃ri ɗɔɔ vi shaanɛu rɛ.

17 A ɗaɗarɛ Yesɔ arɛ au jadɔyi kopi tu zitini. 18 Aɗagbete Yesɔ au jaɗɔyi kopi atu ziti i ɗɔɔ vi shaanɛ, Yesɔ geliyinɛ, <<N gelɔɔtɛ, shɔwɔɔ awɔ tetemkɔ yɛ mɛlintɔ-- shɔgbete u ɗɔɔ vi shanɛ a wunim.>>

19 Kɛɗɔn Yesɔ jaɗɔyi i sisɨn lɛsirɛ i gaa hɨnɛ gbete gbete nɛ, <<A sha pɛ nkɔ ya?>>

20 Yesɔ kasiyinya nɛ,<<Shɔzɛ gbete a tete kopi tu ziti miyikɔ, gbete u shaa vishaanɛ pii gbete a wunim.>> 21 Ɔ̃rii Yesɔ shɔzɛjatɛ a kɔrɔ u vɔɔrɛ nagbete Ɗalapa sha au laabeenɛ si tɛ̃ɛtɛ̃ɛ. Shɔgbete mɛli Yesɔ, yɛ ɔri shɔgbeteu mɛli jashɔzɛm kɛvi yukɔnɛǃ yɛ ɔ̃riukɛ naa shɔ siji yeeu kɔɓa.

22 Aɗagbete isi ɗɔɔ vi shaanɛ Yesɔ tuu borodi, a dɔ̃ri Ɗa kɛɗɔn ɗalirɛ, a ãu jadɔyi shanɛ, <<Ɔ tɛnɛ; shompɛ n bi.>>

23 Kɛɗɔn Yesɔ tuu jawamii Inabi a dɔ̃ri Ɗa a ãu jadɔyi i ɓoorɛ piti kpai.

24 Yesɔ geliyi nɛ,<<shompɛ n kpaa gbete shɔ tɛ̃ɛ̃ aru maanɛ tete Ɗalapa a shɔzɛ waanɛ iyuu.>> 25 << N gelɔɔtɛ nizɛ, n yɛn ɓoo mii Inabi toti ɓa, see leegbete n ɓoo mii Inabi sɔɔ aɗɔgbete Ɗa roo kpati yɛ.>>

26 Naa i tɔ̃ soo Ɗalapa bɛlinɛ tɛ i yɛkɛ kɔpɔ zeentung.

27 Yesɔ geliyinɛ,<<Ɔ piti kpai ɔ yurɛ ɔ yantɔ,>> aru gbete Ɗa shatɛttɔ au laabeenɛː

n yɛn nyo jagavivaayi vɔrɔtɔ

mɛrɛ̃ɛ̃yi piti kpai iyɛ sãtitɔ.

28 <<Ama aɗagbete nkɛ yunɛ sàà a suru ni, n yɛn yɛ awɔ ɗekɨn yɛnɛ tipi Urushalima ɔ yɛ kpang aɗɔwakɔ.>>

29 Bituru geliu nɛ, <<ikɛ nwesinɛ piti kpai, n yɛn nwesi ɓɛɛjo ɓa!>>

30 Yesɔ risi Bituru nyanɛ, << N gelɔɔ tɛ nizɛ, nɛ̀m a zɨmbankɔ kɔ̃ɔ̃ u ɓɛɛ nya ɓaanɛ ɓa ziti a yɛ masing nya ɓa taati.>>

31 Ama Bituru risinya a kakani a shanɛ, <<ko shɔyɛ nyɔng vɔrɔ a sàà a mɔkɔni n yɛn bɛ̃ɛ̃ a ruubi ɓa.>>

Yesɔ jadɔyi gãsiyi sha jo vigbetenkɔ piti.

32 Yesɔ au jaɗɔyi i yɛ ɗɔwɔɔ shɔ ɓanɛ Jesimani, kɛɗɔn Yesɔ geliu jadɔyi nɛ,<< ɔ ɔ̃nɛ a ɗɔnkɔ n gaki Ɗa pɛ.>> 33 Yesɔ tuu Bituru, Yakubu a Yɔhana a yɛ ɗɔu ayini, kɛɗɔn gaa yukɔnɛ kpanɛ a raa ɓoonɛ ni au suru waanɛ. 34 Yesɔ geliyi nɛ,<<N suru bi aɗɔ raa ɓoonɛ naa n yɛn vɔtɔ, ɔ ɔ̃ ɗɔnkɔ ɔkɔɔ roo-nɔrɔɔnɛ.>>

35 Naa gisitɛ ɗekɨn Yesɔ ta a yugbot a tipi, a gaki Ɗa a shanɛ, kɛ pɛlinɛtɔ, shɛshing pɛ ang raa ɓoonɛni. 36 Yesɔ gaki Ɗa nɛ,<<Abba, Da! Viwɔɔ lɛraa kaka ɓa. Tusin raa ɓoonɛm kati. Ɓang kasinɛ ɓa, ama vigbete a kasiyɛ.>>

37 Kɛɗɔn Yesɔ sɔu jadɔyi i ɗɔbii a kpai a nɔro. A hɨ Bituru nɛ,<<Siman, adoo ɗɔɔ nɔrɔɔ-roonɛ ya? Ɔ zɛnɔɔ ɔ̃nɛ ɓa nɔkãkãri dɔɔɗa gbete ɓaya?>> 38 A Yesɔ geliyi nɛ, ɔ ɔ̃ nɔkãkãri, ɔ gaki Ɗa, nɔgbete ɔyɛ nwesi ɓa a japɛ̃pɛ̃ɛ̃ nani ɓa. suru bi kasi tɛ ama bi ji laki ɓa.

39 Kɛɗɔn Yesɔ yau jadɔyirɛ a sɔɔ ɗɔɔ Ɗa gakinɛ sɔ̃nrɛ, arɛ a kpai sɔ̃n a nɔro a geliyi sɔ̃nji vigbete geliyi siyɛ. 40 Naa sɔɔ sɔ̃ntɛ kpai sɔ̃nji a nɔro, aru siinɔɔ kpetitɛ a nɔrɔɔni. iji zɛ vigbete iyɛ geliu yɛɓa.

41 Naa Yesɔ sɔtɛ ɓa taati a geliyinɛ,<<ɔ doo ɗɔɔ susunɛ a nɔro roonɛ ya? Tesitɛ-nankɔǃ Ɗaa-pɛlitɛ! Ɔ zɛpɛ! Shɔzɛja shɔ mɛliutɛ a shɔ ruuviniyi naa.>> 42 Ɔ yunɛ u yarɛǃ shɔgbete mɛlin yɛ u yɛm.

43 Aɗagbete Yesɔ siu doo ɗɔɔ nyanwanɛ, shɔzɛ gbete atette Yesɔ jadɔyi kopi tu ziti Yahuza shɛrɛ au bi a shɔwɔyini waanɛ, i sãli zààli a naa a laabāāni pẽniba gbete u yuu pẽniba, yupɛ̃ni nyawàànɛ a jaa Ɗa a shɔmala nya-ãsinɛ Musa wɔsɔ̃n shɔpẽni ɗɔlaa ikɔi shɔirɛ a Yesɔ ɗɔbii.

44 Shɔgbete mɛli Yesɔu si ma ruu tɛttɔ a mɔɔyini nɔgbete yɛ tasiyi shɔgbeteyi iyɛ sãuyɛː <<Shɔgbete nkɛ kɔ̃tiu nanɛ abiiyɛ si ukɔ; Ɔ sãurɛ ɔyɛ awuni ɔ ã sɔjayi naa.>> 45 Naa Yahuza tottɛ tɛɛ ɓɛɛ jo Yesɔ ɗɔbii, a shanɛ,<< shɔmalaǃ>> a kɔ̃tiu naarɛ bi. 46 Kɛɗɔn shɔ sã Yesɔ rɛ a maurɛ. 47 Ama shɔzɛ gbete atette Yesɔ jadɔyi shɛshi zāāli a ko yupɛ̃ni nyawaanɛ jaa Ɗa jawɛrɛ shoo.

48 Yesɔ shanɛ<<Ɔ ang ɗɔ sãnɛ a laabàà a zāālini naa, naa ɓɔɔ ya? 49 Ji lee-lee n ji ɔkɔni a ɗɔɔzɔɔ, n ɗɔɔ shɔvi matinɛ a jaa Ɗa ɔji sãn ɓa. Ama ɔtɛ a kɔrɔ vigbete Ɗalapa shayɛ u pɛlitɔ.>> 50 Kɛɗɔn Yesɔ jaɗɔyi piti kpai i lokiurɛ i yurɛ i yaurɛ yɔbm.

51 Aɗagbete shɔ sã Yesɔ yɛ jakasa wɔɔ siɗɔn u viwɔɔɓa see fãrã bizunɛ gbete u saa yuu bang, gɨn Yesɔ a knti aɗagbete shɔ kasiu sãnɛ yɛ.

52 Jau yuu bi-wati a yau fãrã bizunɛ a knti.

53 I tuu Yesɔ i n-tiu a yupɛ̃ni nyanwaanɛ jaa Ɗa a shɔmala nya ãsinɛ wɔsɔ̃n yupɛ̃ni dɔlayi i dekɨn, i piti kpai i toli nya a ɗɔukɔ. 54 Bituru gɨn Yesɔ kpɛlɛ awuni, a to yupɛ̃ni nyawaanɛ jaa Ɗa wɛrɛ, a ɗɔukɔ ɔ̃ a sɔjayini i ɗɔ yaa wɔɔnɛ a ɗɔzɔ.

55 Yupɛ̃niyi nya waanɛ jaa Ɗa a kn yupɛ̃ni dɔlayini kpai i kãli nyaba ruu kɔ̃linɛ gbete iyɛ sã Yesɔ a wuniyɛ nɔgbete iyɛ nyou vɔrɔyɛ, ama iji kpaa ɓa. 56 Shɔzɛ waanɛ i yeri Yesɔ nya ayuu ama i nya ji ɔ̃ ɓa gbete niɓa.

57 A kɨntiuni kpai shɔgãsiyi i yure i yeri Yesɔ nya ayuu i shanɛː 58 <<U ntarɛ kɛ shanɛ nɛn, <N yɛn zɨɨli jaa Ɗa gbete shɔzɛ maarɛn, n maasɔ̃n alee taati, ɓa shɔwɔɔ naa pɔ̃nɛni ɓa.> >> 59 Ama i nya yelinɛ a Yesɔ yuu ji a ɓa gbete niɓa.

60 Kɛɗɔn yupɛ̃ni nyanwaanɛ jaa Ɗa yulaparɛ, a mɔɔyi i ɗekɨn a hɨ Yesɔ nɛ, <<A yɛ kasing nya ɓaya? A sha ɓɛɛnɛ ivi aru gbete shɔmiyi shali āā yuumini viya?>> 61 Ama Yesɔ ɔ̃ a nyani ji risinya ɓa.

Yupɛ̃ni nyanwaanɛ jaa Ɗa hɨ Yesɔ ruu sɔ̃n nɛ,<<Mɔkaa kirisi yaa? Ɗa jaa gbete u gɨn yɛ ya?>>

62 Yesɔ kasinyanɛ,<<Nn nkɔ, ɔ yɛ zɛ shɔzɛja ɔ̃tɛ a ɓeye nakɨn Ɗalapa gbete vi tɛu kaka ɓa, ɔ yɛ zɛng sɔ̃n a ɗɔɔ anɛ a nyasi aɗɔgbete Ɗalapa ɔ̃ ɗɔnyɛ.>>

63 Kɛɗɔn yupɛ̃ni nyanwaanɛ jaa Ɗa ntasiu fãrã birɛ a shanɛ, <<Ɔ kã sɔ̃n kɛpi shɔ shinɛ shopiya?>> 64 <<Ɔ nta nɔgbete lɛsi Ɗalapa nii yɛtɛ.>>Ɔ shakɛnɛ iviya?

I piti kpai i shanɛ jam yɛtɛ nɔgbete shɔyɛ nyou vɔrɔ yɛ. 65 Kɛɗɔn shɔwɔyi tuliu susãri bi, i mau nɔɔ i waurɛ, i shanɛ,<< Akɛ ɔ̃nɛ Ɗa jaa shɔnɛ geliunɛ pi waa piyaǃ>> kɛɗɔn Sɔjayi i sã Yesɔ rɛ i waurɛ.

66 A ɗauni si Bituru u ɗɔɔ ɔ̃nɛ a nye yaa a yupɛ̃ni nyanwaanɛ jaa Ɗa wɛrɛ, jasuu wɛrɛu wɔɔ arɛ au ɗɔbii. 67 Naa jasuu zɛ Bituru tɛ u ɗɔɔ yaa wɔɔnɛ, jasuu a māāni a tẽẽri Bituru nɔɔ bi a shanɛ.

<< A ji nyazɔ a Yesɔ, shɔ nazara ni.>>

68 Ama Bituru masi nya ɗɔn, <<N ji zɛ ɓa, n ji zɛ ruugbete a nwanya au yuuni yɛ ɓa,>>Nya gbete Bituru risi yɛ, kɛɗɔn shɛ bili kɛ a nyaba tonɛ.

69 Naa jasuu wɛrɛu zɛ Bituru sɔ̃ntɛ a geli shɔgbete shi a Bituru ni nɛ,<<Jam u pɛ Yesɔ jaɗɔ.>> 70 Ama Bituru masiyi nya sɔ̃ntot.

A kɨntiu ni toti, shɔgbete i shi a Bituru ni māāni i geliunɛ,<< A masinya dɔɔɓa a pɛ Yesɔ jadɔ, aru gbete a pɛ shɔ Galili.>>

71 Kɛɗɔn Bituru shanɛ, <<N teetɛ n gelɔɔ pɛ nizɛǃ Ɗalapa u gɔ̃n yuushotɔ nkɛ yeenɛ nya, n ji zɛ jagbete ɔ nwa nya au yuunim ɓa.>>

72 Bituru u ɓɛɛ shanɛ nam tɛ̃ɛ̃ti kpasi kɔ̃ɔ̃ ɓaa nya rɛ ɓaa ziti, Kɛɗɔn Bituru kpai sisɨn aru gbete Yesɔ geliyi yɛ nɛ,<< Kɔ̃ɔ̃ ɓɛɛ nya ɓanɛ ɓa ziti a yɛ masing nya ɓa taati.>> kɛɗɔn Bituru shi bili a nwesirɛ u ɗɔɔ nyavɔ sɨnɛ.