1 Ji ɔ̃ ɓa waanɛ ɓa, Yesɔ tosɔ̃n kapanahum, naa shɔ ntatɛ nɛ a wɛrɛ tɛ. 2 Kɛɗɔn shɔ yalinya a wɛrɛu waanɛ jaa ji tesi shɔ ɓa, ko nyajaa sẽrẽrẽ si ɓa, Yesɔ nwaariyi Ɗanyaruubii rɛ. 3 Shɔ vɔshɔyi i arɛ nɛ̃ɛ̃ti, i n-tiu shɔgbete radɔɔ ɓa. 4 I jo kpaa ɗɔ tonɛ ɓa shɔzɛ si bang, i ntáá yujaa aɗɔgbete Yesɔ ɗɔnyɛ, i tosi siri gbete jau roo ɗɔn yɛrɛ. 5 Naa Yesɔ zɛyi sisɨn ãnɛtɛ pɛ̃niba, a geli shɔgbete radɔɔ ɓa nɛ, <<Majaa, shɔ yasaa ruuvinitɛ.>>

6 Gãsi shɔmalayi nyaãsinɛ Musa gbeteyi ɔ̃li ɗɔuyɛ i lɛri ai sisɨn nɛ, 7 <<Jam sha ruum aruvi nankɔ viya? Shɔmpɛ vikɔ̃linɛ shanɛ a Ɗa yuu! Ɗalapa kɔ yaasi shɔ ruuvini jo sheeli!>> 8 Tɛ̃ɛ̃ti Yesɔ zɛ vigbete ai sisɨn tɛ, A hɨrɛ shanɛ,<<Ɔ lɛri vim aru viya? 9 Atette vi zitim Pi shɔpi ɔ̃rɛ pɛlaa piya, shɔu geli shɔgbete raɗɔɔ ɓa nɛ,<Shɔ yasaa ruuvinitɛ,>ko, a shanɛ, <Yulapa nɛǃ A tuu a siri a yɛrɛ,>? 10 Ama n yɛn tasɔɔtɔ nɛ nkɔng shɔzɛ jaa n kaka ɗɔn n yaasi shɔ ruuvini a koo,>> Yesɔ geli shɔgbete radɔɔ ɓa nɛ, 11 <<N gelaatɛ, yulapanɛ a tuu siri a yɛ wɛrɛ.>>

12 I si ɗɔgbete i biliu yɛ, jau yulapa, tuu siri a sã nyaba a yɛrɛ. Vim sɨn shɔ bizaanɛ kopiya bɛli Ɗalapa rɛ, i shanɛ nɛ, <<U ji zɛ vi ɗɔmjo lee-gbete ɓa!>>

13 Toti Yesɔ shɛ nya ɓooti Galili rɛ. mooyi au ɗɔbii, Yesɔ gai vimatinɛrɛ. 14 U ɗɔ ranɛ, a zɛ shɔ sabɛnɛ tɛnɛ, Levi Alifiyo ɓɛɛ jaa, u ɗɔ ɔ̃nɛ au jaa vishonɛ, Yesɔ geliu nɛ,<<Gɨn nɛ.>>Levi yulaparɛ a gɨurɛ.

15 Si Yesɔ u ɗɔ vishaanɛ a Levi wɛrɛ, shɔ sabenɛ tɛnɛyi waanɛ a shɔ ruuviniyini, a shɔ waanɛ i shaavi a Yesɔ ni nyazɔ au jadɔyini. 16 Gãsi shɔmala nyaãsinɛ Musa, a shɔ ɓayinɛ Farisiyayi, i zɛu a ɗɔ vishaanɛ a shɔ ruuvini-ni wɔsɔ̃n shɔ sabɛnɛyi a nyazɔ, i hɨ Yesɔ jadɔyi nɛ: Ɔ shɔwɛrɛ Shaa vi piruuvi a shɔmini viya? 17 Kɛɗɔn naa Yesɔ ntatɛ, a kasinya shanɛ,<<Shɔgbete ai ɓa vɔrɔ ɓa, i kã ɗɔ likita ɓa, ama shɔgbete i vɔrɔ yɛ ikɔi kã likitarɛ. N jo a ɓa nɛn kã shɔ wɔsɔ-wɔsɔyi ɓa, n a aru shɔ ruuviniyi.>>

18 Lewɔ ɗɔn Yɔhana shɔ Batizima jadɔyi a Farasiyayi i si ɗɔ nyamanɛ. Shɔ wɔyi arɛ a hɨn Yesɔ nɛ, <<Ivi sɨnrɛ Yɔhana jadɔyi a Farasiyayi jaɗɔyini i manyatɔ, ama a jaɗɔyi i manya ɓa aruviya?>> 19 Yesɔ kasiyinya a shanɛ, Ɔ kasinɛ shɔ gbete shɔ wainya aɗɔ yumusinɛ so tɛnɛ i yɛ wɛrɛ a nwoni ya? Ɓaǃ Ikɛ ɔ̃nɛ nyazɔ a shɔ so tɛnɛuni i yɛ manya ɓa. 20 Ama ɗaa kaanɛ gbete shɔ tuu shɔ sou ai ɗɔbiini, kɛɗɔn i yɛ manya kɛkn.

21 Shɔ wɔɔ yɛ rɛɛ fãrã gbaali ɓa a fãrã sɔɔni ɓa, kɛ pɛlinɛ nam u sɔɔu yɛ ntasi fãrã gbaali kɛ bang. 22 Shɔu piya gbete yɛ tuu mii Inabi sɔɔ nɛn tɛ̃ɛ̃ a lazɔrɔ gbete shɔ ɓaanɛ wine skin shɔ ntɔri a koo kɔ̃ti piya, kɛ tɛ̃ɛ̃ nɛ yɛ sã lazɔrɔ gbaaliutɔ si mii -Inabi a duu ni lɛsitɛ. Mii- inabi sɔɔ shɔ tɛ̃ɛ̃ a lazɔrɔ sɔɔ.

23 Lewɔɔ a lee susunɛ Yesɔ u ɗɔ tɛnɛ a dɔjaa. U jadɔyi i si ɗɔrakinɛ awuni, i gaa shɔ yuu visha zɔ̃kinɛ. 24 Shɔ Farasiyayi geli Yesɔ nɛ, zepɛjo a jadɔyi ikɛ pɛli vigbete nyaãsinɛ zãri pɛlinɛtɔ a lee susunɛ ni! 25 Yesɔ kasinya nɛ, <<Ɔ jo ɓali labeenɛ ɓa aru vigbete Dauda pɛli a ɗagbete i nta nwo au shɔbiiyini ɓaya? 26 Naa yɛtɛ wɛrɛ Ɗa a ɗagbete Abiyata si yupɛ̃ni shɔlansi wɛrɛ Ɗa, a tuu borodi gbete shɔ ã shɔlansi a shaarɛ, a ãu shɔbiiyi gãsi rɛ, a shɔ ãsinyanɛ ji shɔlansi kɔ sheeli i shaarɛ.>>

27 A Yesɔ yisi nyanwaanɛ nɛ,<<Lee susunɛ shɔ pɛli aru shɔzɛ yuu, shɔzɛ shɔ ji pɛliu ɓa aru lee susunɛ ɓa. 28 Aruukɔ shɔzɛ jaa nkɔng ɔ̃rɛ Uɓeyelapa a vi piti ko a lee susunɛ ni kpai.>>