1 A ɗauni Yɔhana shɔ batizima arɛ a ɗɔpnsi uɗɔ gbete nwari shɔ Ɗalapa nyaruubii a Yahudiya. 2 A shanɛ, <<Ɔ yaa ruuvini ɔ kɔsi sisɨntɔ, aruviya Ɗa kpati roonɛ atɛ maani.>> 3 Yɔhana kɔ ɔ̃rɛ shɔgbete janyagadi Ishaya nwanya si au yuuyɛː

<<Shɔ nta yeenya a ɗɔpnsi shanɛ,

ɔ tɔ̃ri Uɓeyelapa nyaba nɛ,

ɔ shiritɔ gbororo.>>

4 Yɔhana visɨnɛbii shɔ pɛli a shẽnti vivaa shɔ ɓaanɛ wɔba, Yɔhana ma koo au sang. U vishaanɛ zɔrɔ a mii wara. 5 Shɔ Urushalima a shɔ Yahudiya a shɔ nyaɓooti Uruduyi i toli nya a Yɔhana ɗɔbii. 6 I shayi ruuvini, Yɔhana pɛliyi batizima a mii ɓooti Urudu.

7 Naa Yɔhana zɛ shɔ Farisiyayi a shɔ Sadukiyayi i ɗɔu au ɗɔbii waa-nɛ nɛu pɛliyi batizima, a hɨ nɛː <<Pɔsɛɛ miyiǃ Pi gɔ̃ ɔ yushɔ pi aru Ɗalapa sisɨn lɛsinɛ gbete kaanɛ awɔ ɗekɨn piya? 8 Ɔ pɛlijo vitɔ̃ gbete yɛ tasinɛ ɔ yaa ruuvini tɛ. 9 Ɔkɔɔ sɨnnɛ a sisɨn nɛ, shɔ yɛ gɔ̃ ɔ yuusho ɓa<Nɛ aru Ibirayi pɛ ɔ ɓɛuruu.>N gelɔɔ pɛ Ɗalapa u kaka aɗɔn u pɔ̃ tari u rii Ibirayi ɓɛjaayi. 10 Ɗalapa pɔ̃ kpali tɛ adɔɔ gɨnri laa, laa gbete ji rɛɛ jaa tɔ̃vɨn ɓa shɔ yɛ kɔurɛ a lokiu a yaa.

11 <<N pɛlɔɔ batizima a mii, u tasi sisɨn gbete ɔ kɔsi yɛ. Shɔwɔ yɛ a ang knti gbete tɛng tɛttɔ a kakani, n ji yɛ nɔgbete n ɗinaa au koodɔɔ yɛ ɓa. Yɛ pɛlɔɔ batizima ɓɛɛ a Ɗa suru a yaa. 12 Sã vivi derinɛ tɛttɔ a naa, yɛ deri nɔɔvii, u toli nɔɔvirɛ u pɔ̃ a mbuntɛ, yɛ too gãriu a yaa au niki ɓa.>>

13 A ɗauni Yesɔ shɛ tipi Galili a yɛ ɓooti Yahudiya a Yɔhana ɗɔbii nɛu pɛlin batizima. 14 Si Yɔhana tɔnɛn zãriupɛtɔ, a shanɛ, <<Shɔ gbete n kãrɛ a pɛlin batizima, a asɔn n ɗɔbii ya? >>

15 Yesɔ risinya nɛ, <<Dɔdɔrim u ɔ̃ pɛ nankɔ; vi tɔ̃vɨn u pɛli vigbete Ɗalapa kasinɛ u pɛliyɛ.>>Kɛɗɔn Yɔhana kasirɛ a pɛliu batizima rɛ.

16 Naa shɔ yisi Yesɔ batizima tɛ, Yesɔ shɛrɛ a yɛti miiuni. Kɛɗɔn kolapa ɓelirɛ, a zɛrɛ Ɗa suru kɛnɔnɛ naa koro a koliu yaa au bi. 17 Kɛɗɔn yeenya shɛ a kolapa nɛ, <<Shompɛ majaa, ang ɔriyɛ; shɔng ntau tɔ̃vɨnyɛ.>>