1 Lola ghumji aghuno ighumemile iwanu,

lekeni sambi ghwahela wanu ghendo!

Tsaghukala mji mkulu mna tsiisi tsingi,

lekeni sambi ghuwa ka pinga chitsuka.

Mna tsiisi tsingi tsaghwoneka ka neghe wa mfalume,

lekeni sambi ghuwa mtumwa.

2 Ghwolila chilo chose kwa usungu,

masotsi pukupuku mwikanza,

ghumji agho tsaghunoghelwa na sale wengi,

lekeni kuduhu hata yumwe iyaghukanzile,

sale tsake wose wambugha,

na sambi womhila.

3 Iwanu wa Yuda waghalighwa kuna isi ya utumwa,

aku woghaya na wawatumwa,

wokala kuna iwanu wa isi tsingi,

ako wahela hanu ha ukubwihila,

maaduwi tsawo iwawawinzilitse wawaghogha aku woghanzika.

4 Tsinzila tsighenda kuna ichidunda Sayuni tsolila,

kwaapfila kuduhu munu iyobita iyoghenda kuna ichihungo.

Hana ghamalango ghake gha ukwitinganila kuduhu wanu,

iwatambika wake woghutilila,

iwali wake wolila,

na ghumji ghwenyegho ghwamna usungu mkulu.

5 Yerusalemu ghotawalighwa na maaduwi tsake,

na awala iwaghudununze sambi wobweda,

IMNDEWA kaghutenda ghumji agho ghughaye,

kwaapfila iwanu wake watenda nzambi nyingi,

maaduwi wawaghogha iwana wa ghumji agho na wawaghala kuna utumwa.

6 Ukunogha kose kwa ghumji ghwa Sayuni kumala ghendo,

iwakulu wake wawa ka dondolo yana inzala iyalihela mitsani ya ukuja,.

maaduwi wowawinga nawo wotsuma pfipfo aku wanyonde nyonde.

7 Hawang'ali woghaya na ukwanga kwanga mna ghamatsuwa agho,

wakumbuka ghumji ghwao pfaghukalile ghunogha,

na pfinu pfake pfinoghile ipfilkalile mumo mna ghamatsuwa gha ghumwande.

Wokumbuka iwanu hawaghoghighwe na maaduwi,

aku haduhu munu wa ukuwapfila,

na apfila maaduwi hawawalolile na kuwaseka hawang'ali woghaya.

8 Iwanu wa Yerusalemu watenda nzambi ng'ulu,

apfo ghumji ghwao ghwiha ghendo.

Iwanu wose iwaghuhulikitse aho ghumwande sambi woghubetsa,

kwaapfila waghona pfaghukalile chidako.

Iwanu wake woghutilila na wopfisa ipfihanga pfawo kwaapfila wakwona chinyala.

9 Ichikwe chake chinanahila mna ghamagwanda ghake,

ng'alangule baye matsuwa ghake gha hambele chitsolawila choni.

Apfo ukughwa kwa ghumji agho kukangawatsa,

na tsakuduhu munu wa ukuwakanza iwanu wake, nawo wolonga,

ghwe IMNDEWA, ulole apfila pfatughaya,

kwaapfila maaduwi tsetu watuhuma.

10 Maaduwi waboka pfinu pfake pfose ipfinoghile,

naye kowona iwanu iwali si Wayahudi baye, wakwingila hanu hake helile,

iwanu awala wauwaghomile ghweghwe waleke ukwingila hana ghumitingano ghwako.

11 Iwanu wake wose woghutilila,

hawohemela ichijo,

wolapfa pfinu pfao waghule ichijo,

ili waghendelele kukala wagima, nawo wolila,

"Ghwe IMNDEWA, unilole tanu, kuya ufikitse, kwaapfila nene nobetsighwa."

12 "Mwemwe wabita nzila," apfi achi si chinu chikulu baye kuna mwemwe?

Mlole na mwone,

Apfi kuna munu yana usungu ka nene,

usungu aula IMNDEWA wayanighalile nene,

ahala hayaghudubuke ng'ani?

13 Yeye kahulumsa ghumoto kulawa kulanga,

nagho ghuhulumka mbaka ghulakatsa imipate yangu,

kanzatsa iiwapfu yanyonze ghamaghulu ghangu,

kuya kambuyitsa kuchughu,

kandeka akuno nikangawala,

na notsilika misi yose.

14 Tsinzambi tsangu tsohighwa mna inila,

katsoha hamwe kwa ghumoko ghwake,

natso tsipfika mbaka mna isingo yangu,

Imulungu katsimalitsa tsingupfu tsangu.

naye kandeka nighoghighwe na iwanu, awala nene sidaha baye kwitowa nawo.

15 Imndewa kawalema maasikali wangu wana tsingupfu wose iwonikinga,

kawatuma maasikali wengi wanitsile, watse wawahonde honde iwasongolo wangu,

Kawahonda iwanu wangu wa Yuda, ka apfila pfayohonda tsinzabibu hanu ha ukukamila idipfai.

16 Achino chicho ichinitenda nene nilile,

na tsinenge tsangu tsimema masotsi,

haduhu munu wowose iyali habehi wa ukunikanza,

iyoghutenda ghumoyo ghwangu ghuhole,

iwanangu walekighwa yeka yeka ghendo,

kwaapfila iyonyihila kanihuma.

17 Iwanu wa Sayuni wogholosa ghamoko wapfilighwe,

lekeni kuduhu munu wa ukuwakanza,

Imulungu kawekila laghitso iwanu wa Yakobu,

ka iwanu iwokala habehi hake wawehile,

apfo ghumji ghwa Yerusalemu ghuwa chinu chihile kuna wawo.

18 IMNDEWA katenda ighali gha haki,

kwaapfila nene tsandema ukukinda malaghitso ghake.

Lelo nowadedetsa, mtegheletse mwemwe iwanu wose,

mlole apfila nene pfanighaya,

wasongolo wangu na iwali wangu,

waghoghighwa waghenda kuna utumwa.

19 Niwakema iwanikundile wanyapfile,

lekeni wawo walemelesa.

Iwatambika wangu na sekulu tsangu,

tsawafila mna ghumji hawang'ali wohemela ichijo,

ili waje wakale wagima.

20 Ghwe Imndewa, lola apfila pfanighaya,

mghati mwangu mwotama sideke,

na ghumoyo ghwangu ghuna usungu mkulu,

kwaapfila nene tsanilema ukukinda malaghitso ghako,

ako kunze iwanu wokomighwa,

na ahano hakaye pfipfila iwanu wakufa.

21 Iwanu wahulika pfanilila kwa usungu,

lekeni haduhu wa ukunikanza,

maaduwi tsangu wose wahulika apfila pfanighanzika,

wawo wosekelela kwa alila lyautendile.

Lelo leka litse litsuwa alila lyaulongile kutsowahigha,

nawo wawe ka nene.

22 Na ghehile ghao ghoneke hambele hako,

uwatende ka pfaunitendele nene,

haunihighile kwa kulola nzambi tsangu tsose.

Noghutilila aku nina usungu mkulu,

na ghumoyo ghwangu ghwotsilika.