1 IMNDEWA kaghonela maya ghumji ghwa Sayuni,

mbaka kawaghubika iwanu wake na ichisi.

kakwasa hasi ukunogha kwa Isiraeli kulawa kulanga mbaka mna isi.

Hayawonele maya ng'ulu iwanu wa Isiraeli,

yeye ng'akumbuke baye ka ahano mna isi hana ing'anda yake.

2 IMNDEWA katsihinya tsikaye tsose tsa iwanu wa Yakobu,

wala ng'atsonele libatsi baye.

aku kaghudubuka, tsakaimwagha imiji ya Yuda itsungulusighwe ubanda.

kawatenda wafalume na iwakulu wake wone chinyala.

3 Aku kaghudubuka,

katsibena bena tsingupfu tsose tsa Isiraeli,

IMNDEWA ng'agholose ghumoko yawapfe baye.

ahala hawetingane na maaduwi tsawo,

kawalakatsa iwanu wa Yakobu ka lambi lya

ghumoto ililakatsa chila chinu ichili baho.

4 Kapfedula minde yake ka aduwi,

na ghumoko ghwake ghwa kujilo kaghwika ghoya,

kawakoma iwanu wose wana tsingupfu watuwaghodele,

kawaghudubukila iwanu wa Sayuni,

naye katughalila imaya yake ka moto ighulakatsa chila chinu.

5 Imulungu kawa ka imunu iyotwihila,

Kahinya isi yose ya Isiraeli,

na mang'anda ghake ghose ghanoghile kaghabomola,

kahinya imiji yose ina ubanda,

na kongetsa usungu na chililo,

kwa iwanu wa Yuda.

6 Kaleka ing'anda yake ibomolighwe,

ka apfila chibanda chili mna ibustani pfachibomolighwa,

na kahinya hanu hake ha ukwitinganila,

IMNDEWA kawatenda iwanu wa Sayuni,

wesemwe ghamatsuwa gha imitingano na tsisabato,

kawaleka iwafalume na iwatambika wabetsighwe,

kwaapfila tsakawonela maya ng'ulu.

7 IMNDEWA kailema imatsabahu yake,

na kahaleka hanu hake helile,

kawaleka maaduwi waubomole ubanda

iutsunguluke tsing'anda tsake tsa chifalume,,

wakemelela mghati mwa ing'anda ya IMNDEWA,

ka iwanu pfawokemelela ahala hawodeng'elela ichihungo.

8 IMNDEWA tsakabama yaumwaghe

ubanda utsunguluke ghumji ghwa Sayuni

kagholosa lutsabi lwake yaghulinge,

na ng'oyitse kuchughu baye ghumoko ghwake yaleke kughuhinya,

na iminala na ubanda mkulu utsunguluke ghumji tsaing'ali ilila

kwaapfila pfose tsapfighwa hasi.

9 Ghamalango gha Yerusalemu ghahasi mna ipfilundo,

ghamachuma gha ukuhindila ghose kaghahinya na kaghabena,

Wafalume na iwakulu wake waghalighwa kuna utumwa,

isi tsilihela wanu iwofunda ghamalaghisto,

Manabii ng'awobokela keli baye ghamaono kulawa kwa INMDEWA.

10 Iwanzehe wa ghumji gha Sayuni wakala hasi,

aku wenyamala tulu,

wemwaghila litimbwisi mna ghamatwi ghawo,

na wapfala maghunila kulangusa usungu wali nawo.

na iwali wa Yerusalemu wenama mbaka pfihanga pfawo kulola hasi.

11 Nenge tsangu tsipfa kwa ukulila,

Mghati mwangu mwotama ng'ani

ghumoyo ghwangu ghwoghanzika,

kwaapfila iwanu wangu wakomighwa,

na iwana wadowado na iwakong'a

wotsilika mna tsinzila tsa imiji.

12 Wowalilila mai tsao apfino,

"Chilikwani chijo na chokunwa,"

aku wotsilika ka wanu iwelaghile,

mna tsinzila tsa imiji,

baho wakufa aku wakindighwa mna ghamoko gha mai tsao.

13 Nikulongele choni ghwe Yerusalemu?

Angu ghweghwe nikulinge na choni?

Na wighala na nani,

ili nidahe kukukanza,

ghwe Yerusalemu yunoghile,

chilonda chako chihimbika ka china cha ibahali,

nani yodaha kukuhonetsa?

14 Manabii wako wakonela maono gha ughutsu na gha ubotsi,

wawo ng'awakulongele baye apfila pfauli na tsinzambi nyingi,

ili udahe kukomboka uleke kughenda kuna utumwa.

Lekeni wawo wakwing'a ghamaono gha ughutsu ghendo na kukubugha.

15 Wose iwobita mnzila wokubetsa,

wokwowela, ghweghwe Yerusalemu,

wohighitsa ghamatwi ghawo, akuno weghutsa,

"Angu aghuno ghughwo ghumji ighunoghile kubita imiji yose,

ghumji ghudeng'elelighwa na iwanu wa tsiisi tsose?"

16 Maaduwi tsako wose,

wakwasama imilomo yawo wokwowela,

wokufonza na wokugheghedela ghamatsino,

akuno wolonga, "Tughuhinya ghumji,

tubetetsa ukupfika kwa litsuwa alino,

na sambi lipfika na tulyona."

17 IMNDEWA katenda aghala ghayabamile kutenda,

katenda alila lyayalongile

katenda alila lyayalaghitse mna ghamatsuwa gha ghumwande.

Kaghughwisa hasi ghumji ghwa Yerusalemu,

naye ng'aghonele libatsi baye,

kawaleka maaduwi wadeng'elele apfila pfaughaya,

naye kawongetsela tsingupfu maaduwi tsawo.

18 Imimoyo ya iwanu yomlilila imndewa,

ghweghwe neghe Sayuni,

ghamasosi ghako ghalawe,

ka mto chilo na misi,

ulile na udomboketse bila kwipfa.

19 Ulamke nechilo ulile,

ghalonge ighali mna ghumoyo ghwako hambele ha Imulungu,

winule ghamoko ghako ulombe,

walombele iwanagho iwotsilika kwa inzala mna tsinzila tsing'ulu.

20 Lola, Ghwe IMNDEWA, na ufikitse,

angu nani yumtendele apfino,

wamapinga wawaje iwana wawo,

iwana wao iwaweleke?

Pfihi iwatambika na manabii wakomighwe

hanu hako helile Ghwe Imndewa?

21 Iwasongolo na iwanzehe iwafile wawasa mna tsinzila,

iwali wangu na iwabwanga wangu wakomighwa kwa lipanga,

kuwakoma mna litsuwa lya imaya yako,

kuwakoma bila kuwonela libatsi.

22 Kuwakema maaduwi tsangu kulawa chila hanu watse wanighele wogha,

kuwakema ka apfila wakutsa kuna ilusona.

Ghweghwe IMNDEWA haughudubuke,

tsakuduhu munu iyahepile wala iyahonile.

maaduwi tsangu wawakoma iwana wangu,

waniweleke na iyaniwalelile.