1 Nene na munu yambonile ghamaghayo,

kwaapfila IMNDEWA tsakanitowa na ingweku ya imaya yake.

2 Kaniwinga kutali na kanitenda nyange mna chisi chikulu,

na si mna ghumwanga baye.

3 Kagholosa ghendo ghumoko ghwake ghunitowe nene,

naye kanifapula misi yose.

4 Kalutenda lukuli lwangu lulale na ingotsi yangu ilale,

na imipate yangu kaibena.

5 Kanitowa na kanipfingila na kanitsunguluka,

apfo nina usungu na maghayo.

6 Kanyika nikale mna chisi chikulu,

ka iwanu wafile ghumwande.

7 Kanitsengela ubanda unitsunguluke ndeke kulawa,

kanyoha kwa minyololo mikulu.

8 Hata ning'alila na kukema yanyapfile,

yeye kolema kunyidika.

9 Yeye kadiwa nzila tsangu kwa mabwe makulu.

na tsinzila tsangu katsaghisa ghendo.

10 Yeye ka mnyama dubu iyonibeta yangoghe,

kepfisa ka simba.

11 Kanibuluta kulawa mna inzila yangu,

kanitsahula tsahula, na kandeka niliyeka.

12 Kapfedula minde yake,

na kanenda nene chinu cha kulengela.

13 Kanihoma mmoyo kwa mishale yake,

ilawile mna iyala yake.

14 Nene niwa munu wa kusekighwa

na iwanu wangu wose,

misi yose wonibetsa kwa kunyimba nene.

15 Kanimemetsa maghayo,

kanyongetsela usungu.

16 Matsino ghangu ghabeneka

kwa ukughegheda ghamabwe,

kanikanyagha na kanibulughitsa mlipfu.

17 Ukukala tseghamba kuka ghendo kuna nene,

na nisemwa ghendo ka ukubweda chinu chachi.

18 Apfo nilonga, "Tsingupfu tsangu tsimala,

na chila chinu chandolele kulawa kwa IMNDEWA chuka."

19 Noghakumbuka ghamaghayo ghangu, na ukwangakwanga kwangu,

ako konitenda mbone usungu mkulu ka nyongo.

20 Nene noghakumbuka agho,

na ghumoyo ghwangu ghotama ghendo.

21 Lekeni nina limwe lya ukukumbuka,

na nene nina chinu cha ukulolela.

22 Ka uluso mkulu wa IMNDEWA kwa iwanu ng'aumalagha baye,

na yeye ng'alekagha baye kuwonela iwanu libatsi.

23 Uluso wake na libatsi lyake,

wakuwa wa sambi chila nemitondo,

yeye kotogholighwa ng'ani.

24 Nelongela mmoyo, "IMNDEWA yuyo yanimbama,

Apfo nitsomlolela yeye."

25 IMNDEWA kanogha kwa awala iwombeta,

na kanogha kwa awala iwombama.

26 Pfinogha imunu yabetetse ukombola kulawa kwa IMNDEWA

akuno kenyamala tulu.

27 Pfinogha imunu yamanye ka kuna ukughaya,

kulawa mna matsuwa ghake gha usongolo.

28 Yakale yaliyeka aku yenyamale tulu

ahala Imulungu hayomghalilia ghamaghayo.

29 Leka yakale aku uhanga wake udonze mtimbwisi,

Songaha kuna lolelo ling'ali lyakutsa.

30 Iyokutowa kanza limwe, mleke yakutowe kanza lingi,

na utoghole kulighighwa.

31 Kwaapfila IMNDEWA ng'atsomlema

imunu baye matsuwa ghose.

32 Yeye koghala usungu,

lekeni kana libatsi kwaapfila

uluso wake mkulu ng'aumalaghala baye.

33 Kwaapfila yeye ng'obama baye kuwadununza iwanu,

wala kuwatenda wone usungu,

34 IMNDEWA komanya ahala iwanu wose iwohighwe iwali muisi,

hawobunzighwa na kuhondighwa,

35 na ghomba lya munu lyohighighwa pfihile hambele ha Imulungu,

36 na ghomba lya munu lyohighighwa pfihile hana libatsa.

Agho ghose IMNDEWA ng'oghabama baye.

37 Nani iyolaghitsa ichinu nacho chotendeka,

Apfi si Imulungu mwenyegho baye iyolaghitsa?

38 Angu ghamaghayo na ighanoghile ng'agholawa baye,

kwa laghitso lya Imulungu yali kuchanya ng'ani?

39 Heule lelo imunu yanung'unike ahala,

hayotohighwa kwa tsinzambi tsake?

40 Lelo twikaghule na tulole pfatukala,

na tumuyile IMNDEWA.

41 Leka tupfughule imimoyo yetu kwa Imulungu iyali kulanga,

na twinule ghamoko ghetu, na tulombe apfino,

42 "Twetwe tutotsa na tukulema,

na nzambi tsetu ng'utsilekelele baye."

43 Tsakutuwinga aku kughudubuka,

kutukoma bila kutwonela libatsi.

44 Kwighubika ghumwenyegho mna libingu,

ili chatulomba chileke kukupfikila.

45 Kututenda twoneke mibangu na mipfulu,

kwa iwanu wa isi tsingi.

46 Iwotwihila wose wotwowela.

47 twoghanzika kwa ukupfuka na wogha,

kwaapfila tsatulekighwa yeka na kukomighwa.

48 Ghamasotsi gholawa mna tsinenge tsangu ka pfikolongo pfa ghamatsi,

nolila kwaapfila iwanu wangu wakomighwa.

49 Tsinenge tsangu ng'atsileka baye kulawa masotsi,

natso ng'atsikona ng'apfu baye,

50 mbaka IMNDEWA kulawa kulanga yalole hasi na yone.

51 Aghala ghanikona ghonighela usungu mna ghumoyo,

hanikona achila ichiwalawile iwapinga wose wa ghumji ghwangu.

52 Awala iwonyihila hela,

wanisaka ka chideghe.

53 Wanyasa mpondo akuno namgima,

na walundika ghamabwe mchanya mwangu.

54 Ghamatsi tsaghanza kumema mbaka ghaghubika litwi lyangu,

baho nilonga, "Lelo nimala."

55 Kulawa kuna lipondo alila ilighendese,

nikulila ghweghwe IMNDEWA.

56 Naghwe kuhulika chanikulombile,

"Uleke kudiwa maghutwi ghako,

uhulike hanikulomba unyapfile."

57 Hanikukemile, ghweghwe kusoghela habehi,

kunilongela ndeke kupfuka.

58 Ghweghwe IMNDEWA yunongelele ghomba lyangu,

Kuukombola ugima wangu

59 Ghwe IMNDEWA, kughona ghehile ghawanendedele,

lihighe ghoya ghomba lyangu.

60 Kona apfila pfawonyihila

na ghehile ghawabamile kunendela.

61 Kuhulika maligho ghawoniligha ghwe IMNDEWA,

na ghehile ghawabamile kunendela.

62 Misi yose wao wenong'onetsa,

na wolonga mbuli tsa kunikoma nene.

63 Walole, hawokala na hawakwima,

wawo wonyimbila wila tsa kunibetsa.

64 Ghwe IMNDEWA, Uwahighe

kwa kulola aghala ghehile ghawatendile.

kwa kulola tsing'onde tsihile tsitendighwe na

ghamoko ghawo.

65 Uwalighite kwa usughu iwali nawo.

66 Ghwe IMNDEWA, uwawinzilitse akuno kowonela maya,

uwakome wahupe ghendo ahano muisi.