1 Lola inzahabu pfailekile ukung'ala,

nzahabu iyelile ghendo pfaipfinale,

mabwe gha samani gha ing'anda ya Imulungu

ghapwililika mna tsinzila tsose.

2 Lola iwana wa Sayuni pfawanoghile,

wawo weghala ghendo na inzahabu yelile,

lekeni sambi wakoneka ka pfiya pfa udongo

pfifinighwe na ghamoko gha imunu.

3 Hata wambwa wa kubagho wowong'etsa iwana wao,

lekeni iwamapinga iwali mna iwanu wangu wahela libatsi,

weghala na mbuni iyokala kunyika.

4 Milimi ya iwana wadowado yonanahila kuna imilomo yawo,

kwaapfila wana ng'ilu ya ukong'a

iwana wolomba ichijo,

lekeni kuduhu munu wa ukuweng'a.

5 Iwanu iwahondole pfijo pfinoghile,

sambi wotsilika mnzila kwa inzala.

Iwanu iwalelelighwe na kupfala magwanda gha chifalume,

sambi wowasa mna ghamalundo gha lipfu.

6 Ghehile ghawatendile iwanu wangu makulu,

kubita inzambi ya iwanu wa ghumji ghwa Sodoma,

ghumji ighubidulighwe kwa kwidukitsa aku kuduhu munu iyenule ghumoko yaghwapfile.

7 Iwakulu wake tsawedegheta kubita iseluji,

tsawatselu kubita matsiwa,

tsawadung'u kubita mabwe gha lubi,

ipfihanga pfao tsapfighala na yakuti samawi.

8 Lekeni sambi ipfihanga pfawo pfiwa pfititu kubita lisitsi,

hawobita mna tsinzila ng'awotangika baye,

ingotsi yawo inanahila mna imipate yawo,

na imipate yawo isakala, iwa ka ngodi.

9 Ng'apfu awala iwakomighwe kuna ing'ondo,

kubita wawo iwafile kwa inzala,

iwafile kwa ukughanzika lughalugha,

kwaapfila ng'awapatile ipfijo baye kulawa kumghunda.

10 Iwamapinga iwakalagha na libatsi,

kwa ghamoko ghawo iwenyegho,

wawambika iwana wawo wenyegho,

iwana wawo wawa chijo chawo,

ahala iwanu wangu hawakomighwe.

11 IMNDEWA kalangusa apfila pfayaghudubuke ng'ani,

kaighida imaya yake isoma,

katuwa ghumoto ako Sayuni

nagho ghulakatsa imisingi yake.

12 Wafalume wali mma isi ng'awatoghole baye,

na iwanu iwokala muisi nawo ng'awatoghole baye,

ka iyodununza iwanu na iaduwi kodaha kwingila,

mna ghamalango gha Yerusalemu.

13 Tsailawila apfo kwaapfila manabii,

wa Yerusalemu tsawatenda nzambi,

na iwatambika tsawatenda ghehile,

apfo wawahonza iwanu walihela matotso,

iwali mna ghumji agho wakomighwe.

14 Pfilongotsi awo wakwanga aku wobamasa bamasa mna tsinzila ka pfifita,

iwanu tsawapfuka ghendo ukuwakinda,

kwaapfila maghwanda ghawo ghafinala kwa idamu.

15 Iwanu wawakemelela walonga,

"Ukeni, Ukeni, mleke kutukinda, mwemwe imfinale na ing'amtogholeka."

Apfo wanga wanga kulawa isi imwe mbaka isi ingi,

lekeni iwanu wa tsiisi atso wang'ali wawalonga apfino,

"Awano ng'awatsokala ahano baye."

16 IMNDEWA imwenyegho kawapwililisa,

wala ng'owafikitsa keli baye.

kuduhu wa iyawahuliktse iwatambika,

wala iyawonele libatsi pfilongotsi.

17 Tsinenge tsetu tsipfa ghendo,

ukulolela hela twapfilighwe,

tsatwima kuna iminala yetu,

ukulolela isi ing'aidaha baye ukutwapfila.

18 Iwanu wawinzilitsa ghamatsayo ghetu,

ng'atudahile baye kubita mna tsinzila tsetu.

twetwe tsatwahabehi na ukuhupa,

na matsuwa ghetu ghamala,

kwaapfila ukutsigha kwetu kupfika.

19 Iwatuwinzilitse tsa wabewe kubita pfitema iwali mlanga,

watuwinga mna ipfidunda

na watupfitsila ako kunyika.

20 Imfalume iyasaghulighwe na IMNDEWA,

ayula iyakindile ugima wetu,

konzeka mna imitegho yawo,

ayula yatulongile, "Yeye katsotukinga

hatutsokala mna isi tsa wanu wangi."

21 Mdeng'elele na msekelele,

mwemwe iwanu wa Edomu,

mwemwe imkala isi ya Usi,

lekeni chikombe achino ichimemile imaya,

chitsowatsila, namwe mtsochinwela na

mtsopatika na mtsokona chinyala.

22 Ghwe ghumji ghwa Sayuni ukughaya kwako kutsomala,

ng'atsakongetsa baye ghamatsuwa gha ukukala kuna isi ya utumwa.

Naye katsowahigha mwemwe Waedomu kwa ghehile ghenu,

na tsinzambi tsenu katsotsika mwatsi baye.