1 Ghwe IMNDEWA, ukumbuke ighatulawile.

Ulole, na wone pfatughelighwa chinyala.

2 Isi yetu weng'ighwa iwagheni,

na tsing'anda tsetu wokala iwanu wa isi tsingi.

3 Twetwe twa wachuwa, twahela aba,

mai tsetu wawa ka pfitsuka.

4 Toghula ghamatsi gha ukunwa,

na tsingondi natso twoghula.

5 Awala iwotuwinga sambi wahachisogho hetu,

twipfa lekeni ng'owotuleka tubwihile baye.

6 Tugholosa ghamoko kuwalomba Wamisiri na Waashuru,

tupate chijo cha ukwighuta.

7 Iwahenga wetu tsawatenda nzambi,

na sambi ng'awalibaha keli baye,

na twetwe twoghaya kwa ighehile ghawo.

8 Iwatumwa wawo iwotulongotsa,

na kuduhu wa kutukombola mna ghamoko ghawo.

9 Twopata ichijo kwa kwaghitsa ugima wetu,

kwaapfila iwokoma iwanu wepfisa mna imighunda.

10 Ngotsi yetu yolakatsa ka tanulu,

kwaapfila inzala yotuluma.

11 Mapinga tsetu woghoghiwa kwa ngupfu na iwamale ako Sayuni,

na iwali wetu nawo woghoghiwa kwa ngupfu na iwamale mna imiji ya Yuda.

12 Pfilongotsi wetu wakondekighwa kwa ghamoko ghawo,

na iwanzehe wetu ng'awohulikitsighwa baye.

13 Wowanahitsa iwabwanga wetu wasaghe kwa ghamabwe,

iwasongolo wotsenzeuka na imitsigho ya tsingodi.

14 Wanzehe wetu waleka kughenda hana lilango lya ghumji,

iwasongolo wetu waleka ukwimba na ukutowa tsingoma.

15 Imimoyo yetu ng'aideng'elela keli baye,

sambi ng'atubigha baye ila twodomboketsa.

16 Mfalume yatung'ali tweghodela sambi ng'alibaho baye,

lelo tutsochona kwaapfila tutenda nzambi.

17 Kwa agha ghatutendile imimoyo yetu itenyuka ghendo,

na tsinenge tsetu ng'atsilola ghoya baye.

18 Kwaapfila kuchidunda cha Sayuni

kulekighwa yeka yeka,

ako wambweha wakwanga kwanga.

19 Lekeni Ghweghwe IMNDEWA yutawala matsuwa ghose,

ufalume wako wokala kulawa lweleko lumwe mbaka lweleko lungi.

20 Heule utusemwile kwa matsuwa ghose aghano?

Heule utulekile kwa matsuwa aghano mengi?

21 Utuyitse kuna ghweghwe ghumwenyegho, Ghwe IIMNDEWA, na twetwe tutsokuyila,

ghatende matsuwa ghetu ghanoghe, ghawe ka gha ghumwande.

22 Angu ghweghwe kutulema ghendo?

Apfi kutughudubukila ng'ani?