Ezequiel 9

यरूशलेम ख सजा देनो

1 फिर मय न परमेश्वर ख ऊंचो आवाज म चिल्लातो हुयो सुन्यो, "हे नगर ख सजा देन वालो आदमियों इत आवों। अपनो हथियार अपनो संग लावो।" 2 येको पर छय आदमी उत्तर दिशा को तरफ ऊपर को फाटक को रस्ता सी अपनो अपनो हाथ म हथियार लियो हुयो आयो; अऊर उन्को बीच मलमल को कपड़ा पहिन्यो, कमर म लिखन की दऊत बान्ध्यो हुयो एक अऊर आदमी होतो; अऊर हि सब भवन को अन्दर जाय क पीतल की वेदी को जवर खड़ो भयो।

3 तब इस्राएल को परमेश्वर की सामर्थ पंख धारी प्रानी पर सी, जिन को ऊपर ऊ रह्यो करत होतो, भवन को मन्डप को ऊपर उठ आयो होतो; अऊर ओन ऊ सन को कपड़ा पहिन्यो हुयो आदमी ख जो कमर म दऊत बान्ध्यो हुयो होतो, पुकारयो। 4 ✝9:4 प्रकाशितवाक्य ७:३; ९:४; १४:१अऊर परमेश्वर न ओको सी कह्यो, "यो यरूशलेम नगर को अन्दर जावो, अऊर उन सब आदमियों को मस्तक पर चिन्ह लगावो, जो नगर म करयो जाय रह्यो घृणित कामों लायी दु:ख मनातो अऊर शोक करय हय।"

5 मय न परमेश्वर ख दूसरों सी बाते करतो सुन्यो, "तुम इन्को पीछु पीछु नगर म जावो; अऊर घृणित काम करन वालों ख मार डालो। तुम उन पर दया मत करो अऊर नहीं नम्रता सी काम करजो। 6 बूढ्ढा, जवान, कुंवारी, बाल-बच्चा, बाईयां, सब ख मार डालो, पर जो कोयी आदमी को मस्तक पर ऊ चिन्ह होना, ओको जवर मत जाजो। मोरो पवित्र जागा सीच शुरू करो।" उन्न उन मुखियावों सी शुरू करयो जो परमेश्वर को भवन को सामने होतो।

7 फिर परमेश्वर न उन्को सी कह्यो, "मोरो भवन ख शवों सी अशुद्ध कर देवो, आंगनों ख शवों सी भर देवो। जावो, मन्दिर को बाहेर जावो।" अऊर हि यरूशलेम नगर म घृणित काम करन वालों ख मारन लग्यो।

8 जब हि मार रह्यो होतो, अऊर मय अकेलो रह्य गयो, तब मय मुंह को बल गिरयो अऊर पुकार क कह्यो, "हे प्रभु परमेश्वर! का तय अपनी जलजलाहट यरूशलेम नगर पर भड़काय क इस्राएल को सब बच्यो हुयो ख भी नाश करजो?"

9 तब ओन मोरो सी कह्यो, "इस्राएल अऊर यहूदा को घराना को अधर्म बहुत जादा हय, यहां तक कि देश हत्या सी अऊर नगर अन्याय सी भर गयो हय; कहालीकि हि कह्य हय, ‘परमेश्वर न धरती ख त्याग दियो अऊर परमेश्वर कुछ नहीं देखय।’ 10 येकोलायी उन पर दया नहीं होयेंन, नहीं मय तरस करूं, बल्की उन्की चाल उन्कोच मुंड पर डाल देऊं।"

11 तब मय न का देख्यो, कि जो आदमी सन को कपड़ा पहिन्यो हुयो अऊर कमर म शाही की दऊत बान्ध्यो होतो, ओन यो कह्य क समाचार दियो, "जसो तय न आज्ञा दियो, मय न वसोच करयो हय।"