1 हाय मोरो पर! कहालीकि मय ऊ आदमी को जसो भय गयो हय जो गरमी को समय को फर तोड़न पर, या रही हुयी अंगूर बिनन को समय को आखरी म आय गयो, मोख त पक्की अंजीरों की लालच होती, पर खान लायी कोयी गुच्छा नहीं बच्यो। 2 भक्त लोग धरती पर सी नाश भय गयो हंय। अऊर आदमियों म एक भी जन सीधो नहीं रह्यो; हि सब को सब मारन लायी बाट देखय हय, अऊर जार लगाय क अपनो अपनो भाऊ ख मार डालय हय। 3 हि अपनो दोयी हाथों सी मन लगाय क घूस मांगय, अऊर न्यायी घूस लेन ख तैयार रह्य हय, अऊर अमीर अपनो मन की दुष्टता की बातें करय हय; योच तरह सी सब मिल क योजना बनावय हय। 4 उन्म सी जो उत्तम हय, ऊ काटा वाली झाड़ी को जसो दु:ख हय, जो सब सी सीधो हय, ऊ काटा वालो सी भी बुरो हय। तोरो बतान वालो को दिन मतलब तोरो सजा को दिन आय गयो हय। अब हि जल्दी घबराय जायेंन। 5 संगी पर विश्वास मत करो, सच्चो संगी पर भी भरोसा मत रखो; पर अपनी प्यारी पत्नी सी भी सोच समझ क बोलो। 6 ✝कहालीकि बेटा बाप को अपमान करय, अऊर बेटी माय को, अऊर बहू सासु को खिलाफ रह्य हय; आदमी को दुश्मन ओको घर कोच लोग रह्य हय। 7 पर मय परमेश्वर को तरफ ताकतो रहूं, मय अपनो उद्धारकर्ता परमेश्वर की बाट देखतो रहूं; मोरो परमेश्वर मोरी सुनेंन।

8 ओ मोरो दुश्मनों, मोरो पर खुश मत हो; कहालीकि जब च मय गिर जाऊं तबच मय उठ जाऊं; अऊर जसो मय अन्धकार म पड़ जाऊं वसोच यहोवा मोरो लायी ज्योति को काम करेंन; 9 मय न यहोवा को खिलाफ पाप करयो हय, योच कारन मय ऊ समय तक ओको गुस्सा ख सहतो रहूं जब तक कि ऊ मोरो मुकद्दमा लड़ क मोरो न्याय नहीं चुकायेंन। ऊ समय मोख उजाड़ो म सी निकाल क लायेंन, अऊर मय ओको न्याय देखूं। 10 तब मोरो दुश्मन जो मोरो सी यो कह्य हय कि तोरो परमेश्वर यहोवा कित रह्यो, ऊ भी ओख देखेंन अऊर शरम सी मुंह लूकाय देयेंन। मय अपनी आंखी सी ओख देखूं; तब ऊ रस्ता को कीचड़ को जसो रौंद्यो जायेंन। 11 ओ यरूशलेम, तोरी शहर की दीवार बांधन को दिन आयेंन ऊ दिन तोरी सीमा बढ़ायी जायेंन। 12 ऊ दिन अश्शूर सी, अऊर मिस्र को नगरों सी, मिस्र अऊर फरात नदी को बीच को, अऊर समुन्दर-समुन्दर अऊर पहाड़ी-पहाड़ी को बीच को देशों म सी लोग तोरो जवर आयेंन। 13 तब भी धरती पर रहन वालो को वजह अऊर उन्को बुरो काम को फलो को वजह उजाड़च रहेंन।

14 अपनो लोगों की रखवाली अऊर अपनो हिस्सा म पायो हुयो झुण्ड की रखवाली डन्डा सी करजो, जो बंजर जमीन म अऊर उपजाऊ जमीन को बिच अकेलो रह्य हय, उन्ख बहुत पहिले को समय को जसो बाशान अऊर गिलाद को क्षेत्र म चरन देवो। 15 जसो कि मिस्र देश सी तोरो निकलनो को दिन म, वसोच अब मय ओको अद्भुत काम दिखाऊं। 16 दूसरो राज्य राज्य को लोग देख क अपनो पूरो पराक्रम को बारे म शरमायेंन; हि अपनो मुंह ख हाथ सी लूकाय देयेंन, अऊर उन्को कान बहेरा होय जायेंन। 17 हि सांप को समान माटी चाटेंन, अऊर जमीन पर रेंगन वालो जीव जन्तु को जसो अपनो दर म सी कांपतो हुयो निकलेंन; हि हमरो परमेश्वर यहोवा को जवर कांपतो हुयो आयेंन, अऊर तोरो सी डरेंन। 18 तोरो समान असो परमेश्वर कित हय जो बुरो काम ख माफ करय अऊर अपनो निज भाग को बच्यो हुयो अपराध छुपाय दे? ऊ अपनो गुस्सा ख हमेशा बनायो नहीं रखय, कहालीकि ऊ करुना सी प्रेम रखय हय। 19 ऊ फिर हम पर दया करेंन, अऊर हमरो बुरो कामों ख पाय को खल्लो रौंद देयेंन। तय उन्को सब पापों ख गहिरो समुन्दर म डाल देजो। 20 तय याकूब को बारे म वा सच्चायी, अऊर अब्राहम को बारे म वा करुना पूरी करजो, जेकी कसम तय पुरानो काल को दिन सी ले क अब तक हमरो बापदादों सी खातो आयो हय।