मीका 2

गरीबों पर अत्याचार करन वालो पर हाय

1 हाय उन पर, जो बिस्तर पर पड़्यो हुयो बुरायी को बारे म सोचय अऊर बुरो कर्म की इच्छा करय हय, अऊर ताकतवर होनो को वजह भुन्सारो ख दिन निकलतोच हि ओख पूरो करय हय। 2 हि खेत को लालच कर ख उन्ख छीन लेवय हय, अऊर घरों को लालच कर ख उन्ख भी ले लेवय हय, अऊर ओको घरानो सहित आदमी पर , अऊर ओको निज भाग समेत कोयी आदमी पर धोका अऊर अत्याचार करय हय। 3 योच वजह, यहोवा यो कह्य हय : मय यो कुल पर असो संकट डालूं, जेको खल्लो सी तुम अपनी गर्दन हटाय नहीं सको, अऊर अपनी मुंडी ऊची कर ख नहीं चल सको; कहालीकि ऊ संकट को समय होयेंन। 4 ऊ समय यो बहुत जादा शोक को गीत दृष्टान्त की रीति पर गायो जायेंन : "हमरो त सर्वनाश भय गयो; ऊ मोरो लोगों को भाग ख बिगाड़य हय, हाय, ऊ ओख मोरो सी कितनो दूर कर देवय हय! ऊ हमरो खेत धोका देन वालो को हाथ म दे देवय हय।" 5 यहोवा की मण्डली म चिट्ठी डाल क अऊर रस्सी सी नाप क जमीन को बाटन वालो कोयी नहीं होयेंन, अऊर तुम्ख जमीन को तुकड़ा भी नहीं मिलेंन। 6 उन्को भविष्यवक्ता कह्य हय, "भविष्यवानी मत करो! इन बातों को बारे म भविष्यवानी मत करो!" ताकि हम्ख कोयी अपमान सहनो नहीं पड़ेंन। 7 हे याकूब को घरानो, का यो कह्यो जायेंन कि यहोवा की आत्मा म शान्ति नहाय? का यो काम ओकोच करयो हुयो आय? का मोरो वचनों सी ओको भला नहीं होतो जो सच्चायी सी चलय हय? 8 पर कल की बात आय कि मोरी प्रजा दुश्मन बन क मोरो खिलाफ खड़ी हय : तुम शान्त अऊर भोलो-भालो रस्ता पर चलन वालो को शरीर पर सी चादर छीन लेवय हय जो लड़ायी को बिचार नहीं करतो हुयो बेधड़क चली जावय हय। 9 मोरी प्रजा की बाईयों ख तुम उन्को सूख को घरों सी निकाल देवय हय; अऊर उन्को छोटो बच्चा सी तुम मोरी दी हुयी अच्छी चिजे हमेशा लायी छीन लेवय हय। 10 उठो, चली जावो! कहालीकि यो तुम्हरो आराम करन की जागा नोहोय; येको वजह वा अशुद्धता आय जो कठिन दु:ख को संग तुम्हरो नाश करेंन। 11 यदि कोयी झूठी आत्मा म चलतो हुयो झूठी अऊर व्यर्थ बातें कह्य हय अऊर कह्य कि मय तुम्ख हमेशा अंगूररस अऊर अंगूरीरस लायी प्रचार सुनातो रहूं, त उच इन लोगो को भविष्य बतान वालो ठहरेंन। 12 हे याकूब, मय निश्चय तुम पूरो ख जमा करूं; मय इस्राएल को बच्यो हुयो ख निश्चय जमा करूं; अऊर बाड़ा की शेरी मेंढी को जसो एक संग रखूं। ऊ झुण्ड को जसो जो अच्छी चरायी म हय, हि बहुत सो आदमियों को मारे हल्ला मचायेंन। 13 उन्को आगु आगु बाड़ा को तोड़न वालो गयो हय, येकोलायी हि भी ओख तोड़ रह्यो हंय, अऊर फाटक सी निकल क जाय रह्यो हय; उन्को राजा उन्को आगु आगु गयो मतलब यहोवा उन्ख रस्ता दिखान वालो आय।