मीका 4

शान्ति को राज्य

1 ✝ 4:1 यशायाह 2:2-4 आखरी को दिनों म असो होयेंन कि यहोवा को भवन की पहाड़ी सब पहाड़ी पर मजबूत करी जायेंन, अऊर सब पहाड़ियों सी जादा ऊंचो करयो जायेंन; अऊर हर राज्य को लोग नदी को जसो ओको तरफ चलेंन, 2 अऊर बहुत सो राज्यों को लोग जायेंन, अऊर आपस म कहेंन, "आवो, हम यहोवा की पहाड़ी पर चढ़ क, याकूब को परमेश्वर को भवन म जाबो; तब ऊ हम्ख अपनी रस्ता सिखायेंन, अऊर हम ओकी रस्ता पर चलबोंन।" कहालीकि परमेश्वर की व्यवस्था सिय्योन सी, अऊर ओको वचन यरूशलेम सी निकलेंन। 3 ऊ बहुत सो देश को लोगों को न्याय करेंन, अऊर दूर दूर तक की शक्तिशाली राज्यों को झगड़ा ख मिटाय डालेंन; येकोलायी हि अपनी तलवार पीट क नांगर की फार अऊर अपनो भाला सी हसिया बनायेंन; तब एक राज्य दूसरो राज्य को खिलाफ तलवार दुबारा नहीं चलेंन; 4 ✝4:4 जकर्याह 3:10अऊर लोग आगु ख लड़ायी की विद्या नहीं सीखेंन। पर हि अपनो अपनो अंगूर को बगीचा अऊर अंजीर को झाड़ को खल्लो बैठेंन, अऊर कोयी उन्ख नहीं डरायेंन; सेनावों को यहोवा न योच वचन दियो हय। 5 सब राज्यों को लोग त अपनो अपनो देवता को नाम ले क चलय हय, पर हम लोग अपनो परमेश्वर यहोवा को नाम ले क हमेशा चलतो रह्यबो।

गुलामी सी इस्राएल को छुटकारा

6 यहोवा की याच वाणी आय, ऊ समय मय प्रजा को लंगड़ा ख, अऊर जबरदस्ती निकाल्यो हुयो क, अऊर जेक मय न दु:ख दियो उन्ख भी जमा करूं; 7 अऊर लंगड़ा ख मय बचायो रखूं, अऊर दूर करयो हुयो ख एक सामर्थी राज्य कर देऊं; अऊर परमेश्वर उन पर सिय्योन पहाड़ी को ऊपर सी हमेशा राज्य करतो रहेंन। 8 ओ एदेर को गुम्मट, ओ सिय्योन की पहाड़ी, तोख पहिले जसो शासन मिलतो रहेंन, तोख यरूशलेम को राज्य मिलेंन। 9 अब तय कहाली चिल्लाय रही हय? का तोरो म कोयी राजा नहाय? का तोरो सलाहकार मर गयो, जेको वजह तय गर्भवती बाई को जसी पीड़ा सी तड़प रही हय? 10 ओ सिय्योन की बेटी, गर्भवती बाई को जसी पीड़ा उठाय क पैदा कर; कहालीकि अब तय नगर म सी निकल क मैदान म बसजो, पर बेबीलोन तक जाजो; उतच तय छुड़ायी जाजो, मतलब उतच यहोवा तोख तोरो दुश्मनों को वश म सी छुड़ाय लेन। 11 अब बहुत सो राज्य राज्य को लोग तोरो खिलाफ जमा होय क तोरो बारे म कहेंन, "सिय्योन अपवित्र करी जाये, अऊर हम अपनी आंखी सी ओको नाश होतो हुयो देखबो।" 12 पर हि यहोवा की योजना नहीं जानय, न ओकी योजना समझय हंय, कि ऊ उन्ख असो जमा कर लेन जसो खरियान म बोझा जमा करय हय। 13 ओ सिय्योन, उठ अऊर चुरना कर, मय तोरो सींगो ख लोहा को, अऊर तोरी खुरी ख पीतल की बनाय देऊं; अऊर तय बहुत सो राज्यों ख चकनाचूर करजो, अऊर उन्की कमायी यहोवा ख अऊर उन्की जायजाद धरती को प्रभु लायी दे देजों।