मीका 3

1 मय न कह्यो; ओ याकूब को मुखिया, ओ इस्राएल को घरानो को न्याय करन वालो, सुनो! का न्याय को भेद जाननो तुम्हरो काम नोहोय? 2 तुम त भलायी सी नफरत, अऊर बुरायी सी प्रेम रखय हय, मानो, तुम लोगो पर सी उन्की खाल उधड़ लेवय, अऊर उन्की हड्डियों पर सी उन्को मांस नोच लेवय हय; 3 पर तुम मोरो लोगों को मांस खाय भी लेवय, अऊर उन्की खाल उधड़ भी डालय; तुम उन्की हड्डियों ख हांडी म पकान लायी तोड़ डालय अऊर उन्को मास हन्डा म पकान लायी टुकड़ा टुकड़ा करय हय। 4 हि ऊ समय परमेश्वर की दोहायी देयेंन, पर ऊ उन्की नहीं सुनेंन, पर ऊ समय ऊ उन्को बुरो कामों को वजह उन सी मुंह मोड़ लेयेंन। 5 यहोवा को यो वचन आय कि जो भविष्यवक्ता मोरी प्रजा ख भटकाय देवय हंय, अऊर जब उन्ख खान ख मिलय हय तब "शान्ति, शान्ति" कह्य हंय, अऊर यदि कोयी उन्को मुंह म कुछ नहीं देवय, त ओको खिलाफ लड़ायी करन ख तैयार होय जावय हय। 6 योच वजह तुम पर असी रात आयेंन, कि तुम्ख दर्शन नहीं मिलेंन, अऊर तुम असो अन्धकार म पड़ो कि तुम भविष्य भी नहीं बताय सको। भविष्यवक्तावों लायी सूरज डूब जायेंन, अऊर दिन रहतो उन पर अन्धारो छाय जायेंन। 7 दर्शन देखन वालो अपमानित होयेंन, अऊर भविष्य बतावन वालो को मुंह कारो होयेंन; अऊर हि सब को सब अपनो मुंह ख येकोलायी लूकाय देयेंन कि परमेश्वर को तरफ सी उत्तर नहीं मिलय। 8 पर मय त यहोवा की आत्मा सी शक्ति, न्याय अऊर ताकत पा क परिपूर्ण हय कि मय याकूब ख ओको अपराध अऊर इस्राएल ख ओको पाप बताय सकूं। 9 ओ याकूब को घरानो को मुखिया, ओ इस्राएल को घरानो को न्याय करन वालो, ओ न्याय सी नफरत करन वालो अऊर सब सीधी बातों को टेढ़ी–मेढ़ी करन वालो, या बात सुनो। 10 तुम सिय्योन ख हत्या कर क् अऊर यरूशलेम ख अन्याय सी मजबूत करय हय। 11 ओको मुखिया घूस ले क सोचय, अऊर याजक दाम ले क व्यवस्था देवय हंय, भविष्यवक्ता पैसा ले क भविष्य बतावय हंय; तब भी हि यो कह्य क यहोवा पर भरोसा रखय हय, "यहोवा हमरो बीच म हय, येकोलायी कोयी समस्या हम पर नहीं आयेंन।" 12 ✝3:12 यिर्मयाह 26:18येकोलायी तुम्हरो वजह सिय्योन जोत क खेत बनायो जायेंन, अऊर यरूशलेम खण्डर को ढेर होय जायेंन, अऊर जो पहाड़ी पर भवन बन्यो हय, ऊ जंगल की ऊंची जागा को जसो होय जायेंन।