1 जब यरूशलेम को राजा अदोनीसेदक न सुन्यो कि यहोशू न ऐ नगर ख जीत लियो, अऊर ओको सत्यानाश कर डाल्यो हय, अऊर जसो ओन यरीहो नगर अऊर ओको राजा को संग करयो वसोच ऐ नगर अऊर ओको राजा को संग भी करयो हय, अऊर यो भी सुन्यो कि गिबोन को निवासियों न इस्राएलियों सी मेल करयो, अऊर उन्को बीच म रहन लग्यो हंय, 2 तब हि बहुत डर गयो, कहालीकि गिबोन बड़ो नगर बल्की राजधानी को समान अऊर ऐ नगर सी बड़ो होतो, अऊर ओको सब निवासी शूरवीर होतो। 3 येकोलायी यरूशलेम को राजा अदोनीसेदक न हेब्रोन को राजा होहाम, यर्मूत को राजा पिराम, लाकीश को राजा यापी, अऊर एग्लोन को राजा दबीर को जवर यो सन्देश भेज्यो : 4 "मोरो जवर आय क गिबोन नगर ख हरावन म मोरी मदत करो; कहालीकि ओन यहोशू अऊर इस्राएलियों सी मेल कर लियो हय।" 5 येकोलायी यरूशलेम, हेब्रोन, यर्मूत, लाकीश, अऊर एग्लोन को पाचयी एमोरी राजावों न अपनी अपनी पूरी सेना जमा कर क् चढ़ायी कर दी, अऊर गिबोन नगर को सामने डेरा डाल क ओको सी युद्ध छेड़ दियो।

6 तब गिबोन नगर को निवासियों न गिलगाल की छावनी म यहोशू को जवर यो सन्देश भेज्यो, "अपनो दासों को मुंड पर सी अपनो हाथ मत हटावों; तुरतच हमरो जवर आय क हम्ख बचाय ले, अऊर हमरी मदत कर; कहालीकि पहाड़ी पर रहन वालो एमोरी जाति को राजा हमरो खिलाफ जमा भयो हय।"

7 तब यहोशू पूरी सेना अऊर शक्तिशाली योद्धावों ख संग ले क गिलगाल सी निकल गयो। 8 अऊर परमेश्वर न यहोशू सी कह्यो, "उन्को सी मत डर, कहालीकि मय न उन्ख तोरो हाथ म सौप दियो हय; उन म सी एक भी आदमी तोरो सामने खड़ो नहीं रह्य सकेंन।" 9 तब यहोशू रातोंरात गिलगाल सी जाय क एकाएक उन पर हमला कर दियो। 10 तब परमेश्वर न असो करयो कि हि इस्राएलियों सी घबराय गयो, अऊर इस्राएलियों न गिबोन नगर म उन्ख बुरी तरह मारयो, अऊर बेथोरोन को चढ़ाव पर उन्को पीछा कर क् अजेका अऊर मक्केदा नगर तक उन्ख मारतो गयो। 11 फिर जब एमोरी इस्राएलियों को सामने सी भग क बेथोरोन को उतार पर आयो, तब अजेका पहुंचन तक परमेश्वर न आसमान सी बड़ी बड़ी गारगोटी उन पर बरसायी, अऊर हि मर गयो; जो गारगोटी सी मर गयो होतो उन्की गिनती इस्राएलियों की तलवार सी मारयो हुयो सी जादा होती।

12 ऊ समय, मतलब जो दिन परमेश्वर न एमोरियों ख इस्राएलियों को हाथ म सौंप दियो, ऊ दिन यहोशू न परमेश्वर सी इस्राएलियों को देखतो यो तरह कह्यो,

"हे सूर्य, तय गिबोन पर,

अऊर हे चन्दा, तय अय्यालोन की घाटी को ऊपर रुक्यो रह्य।"

13 ✝ 10:13 २ शमूएल १:१८ अऊर सूर्य ऊ समय तक रुक्यो रह्यो, अऊर चन्दा ऊ समय तक हट्यो नहीं, जब तक ऊ जाति को लोगों न अपनो दुस्मनो सी बदला नहीं लियो। का या बात याशार की किताब म नहीं लिखी हय कि सूर्य आसमान को बीचोंबीच रुक्यो रह्यो, अऊर लगभग पूरो दिन नहीं डुब्यो? 14 नहीं त ओको सी पहले असो दिन भयो अऊर नहीं ओको बाद, जेको म परमेश्वर न कोयी आदमी की सुनी होना; कहालीकि परमेश्वर त इस्राएल को तरफ सी लड़त होतो।

15 तब यहोशू पूरो इस्राएलियों समेत गिलगाल की छावनी ख लौट गयो।

16 हि पाचयी राजा भग क मक्केदा को जवर की गुफा म लूक गयो। 17 तब यहोशू ख यो सन्देश मिल्यो, "पाचयी राजा मक्केदा को जवर की गुफा म लूक्यो हुयो हम्ख मिल्यो हय।" 18 यहोशू न कह्यो, "गुफा को दरवाजा पर बड़ो बड़ो गोटा लुढ़काय क उन पर पहरा देन लायी कुछ आदमियों ख बैठाय देवो; 19 पर तुम मत ठहरो, अपनो दुस्मनों को पीछा कर क् उन म सी जो जो पीछु रह्य गयो हय उन्ख मार डालो, उन्ख अपनो अपनो नगर म सिरन को अवसर मत देवो; कहालीकि तुम्हरो परमेश्वर यहोवा न उन्ख तुम्हरो हाथ म सौप दियो हय।" 20 जब यहोशू अऊर इस्राएली सैनिकों न दुस्मनों ख मार डाल्यो, अऊर उन म सी जो बच गयो हि गढ़ वालो नगर म घुस गयो,

21 तब सब लोग मक्केदा की छावनी म यहोशू को जवर सुरक्षित लौट आयो; अऊर इस्राएलियों को खिलाफ कोयी न मुंह सी एक शब्द भी नहीं निकाल्यो।

22 तब यहोशू न आज्ञा दी, "गुफा को दरवाजा खोल क उन पाचयी राजावों ख निकाल क मोरो जवर लावो।" 23 उन्न असोच करयो, अऊर यरूशलेम, हेब्रोन, यर्मूत, लाकीश, अऊर एग्लोन को उन पाचयी राजावों ख गुफा म सी निकाल क ओको जवर ले गयो। 24 जब हि उन राजावों ख यहोशू को जवर लायो, तब यहोशू न इस्राएल को सब लोगों ख बुलाय क अपनी सेना को अधिकारियों सी कह्यो, "जवर आय क अपनो अपनो पाय इन राजावों की गर्दन पर रखो।" अऊर उन्न जवर जाय क अपनो अपनो पाय उन्की गर्दनों पर रख्यो। 25 तब यहोशू न अधिकारी सी कह्यो, "मत डरो, तुम्हरो मन कच्चो नहीं होय; हिम्मत बान्ध क मजबूत हो; कहालीकि परमेश्वर तुम्हरो सब दुस्मनों सी जिन्कोसी तुम लड़ाई करो असोच व्यवहार करेंन।" 26 येको बाद यहोशू न उन पाच राजावों ख मार डाल्यो, अऊर पाच झाड़ो पर लटकाय दियो। अऊर हि शाम तक उन झाड़ो पर लटक्यो रह्यो। 27 सूरज डुबतो समय यहोशू सी आज्ञा पा क लोगों न उन शवों ख उन झाड़ो पर सी उतार क उच गुफा म रख्यो जहां हि लूक्यो होतो डाल दियो, अऊर ऊ गुफा को द्वार पर बड़ो बड़ो गोटा रख दियो, हि अज तक वहांच रख्यो हय।

28 उच दिन यहोशू न मक्केदा नगर ख हराय दियो, अऊर नगर को राजा अऊर ऊ नगर को लोगों ख तलवार सी मार डाल्यो; अऊर जितनो प्रानी ऊ नगर म होतो उन म सी कोयी ख भी जीन्दो नहीं छोड़्यो; अऊर जसो यहोशू न यरीहो को राजा को संग करयो होतो वसोच मक्केदा को राजा को संग भी करयो।

29 तब यहोशू सब इस्राएलियों को संग मक्केदा सी जाय क लिब्ना नगर ख पहुंच्यो, अऊर लिब्ना नगर सी लड़्यो; 30 अऊर परमेश्वर न लिब्ना नगर अऊर ओको राजा ख भी इस्राएलियों को हाथ म सौप दियो; अऊर यहोशू न नगर ख अऊर ओको म को सब प्रानियों ख तलवार सी मार डाल्यो; अऊर ओको म सी कोयी ख भी जीन्दो नहीं छोड़्यो; अऊर ओको राजा सी वसोच करयो जसो ओन यरीहो को राजा को संग करयो होतो।

31 फिर यहोशू सब इस्राएलियों को संग लिब्ना नगर सी चल क लाकीश नगर ख गयो, अऊर डेरा डाल क ओको खिलाफ युद्ध करयो; 32 अऊर परमेश्वर न लाकीश नगर ख इस्राएल को हाथ म सौंप दियो, अऊर दूसरो दिन ओन ओख जीत लियो; अऊर जसो ओन लिब्ना को सब प्रानियों ख तलवार सी मारयो होतो वसोच ओन लाकीश नगर सी भी करयो। 33 तब गेजेर नगर को राजा होराम लाकीश नगर की मदत करन आयो; अऊर यहोशू न सेना समेत ओख भी मारयो ओन ओको एक भी व्यक्ति जीन्दो नहीं छोड़्यो।

34 फिर यहोशू सब इस्राएलियों समेत लाकीश नगर सी चल क एग्लोन नगर ख गयो; अऊर डेरा डाल क ओको खिलाफ युद्ध करन लग्यो; 35 अऊर उच दिन उन्न ओको पर अधिकार कर लियो, अऊर ओको म रहन वालो सब प्रानियों ख तलवार सी मार डाल्यो; अऊर उच दिन जसो ओन लाकीश नगर को सब प्रानियों को सत्यानाश कर डाल्यो होतो वसोच ओन एग्लोन नगर सी भी करयो।

36 फिर यहोशू सब इस्राएलियों समेत एग्लोन नगर सी चल क हेब्रोन नगर ख गयो, अऊर ओको सी भी युद्ध करयो; 37 अऊर उन्न ओको पर भी अधिकार कर लियो, ओन ओको राजा अऊर ओको म रहन वालो सब प्रानियों ख तलवार सी मार डाल्यो, जसो यहोशू न एग्लोन नगर सी करयो होतो वसोच ओन हेब्रोन म भी कोयी ख जीन्दो नहीं छोड़्यो; ओन नगर ख अऊर ओको म को सब प्रानियों ख नाश कर डाल्यो।

38 तब यहोशू सब इस्राएलियों को संग दबीर नगर ख गयो, अऊर ओको सी युद्ध करन लग्यो; 39 अऊर ओको राजा अऊर ओको सब गांवो पर अधिकार कर लियो; अऊर उन्न उन्ख तलवार सी मार डाल्यो, अऊर जितनो प्रानी उन म होतो सब को सत्यानाश कर डाल्यो; कोयी ख जीन्दो नहीं छोड़्यो, जसो यहोशू न हेब्रोन अऊर लिब्ना अऊर ओको राजा को संग करयो होतो वसोच ओन दबीर अऊर ओको राजा को संग भी करयो।

40 यो तरह यहोशू न ऊ पूरो देश ख, मतलब पहाड़ी देश, दक्षिन देश, खल्लो को देश, अऊर ढलान को देश ख, ओको सब राजावों समेत मार डाल्यो; अऊर इस्राएल को परमेश्वर यहोवा की आज्ञा को अनुसार कोयी ख जीन्दो नहीं छोड़्यो, बल्की जितनो प्रानी होतो सब को सत्यानाश कर डाल्यो। 41 अऊर यहोशू न दक्षिन को कादेशबर्ने नगर सी अज्जा नगर तक, अऊर गोशेन देश सी उत्तर को गिबोन नगर तक को लोगों ख मार डाल्यो। 42 इन सब राजावों ख ओको देशों समेत यहोशू न एकच समय म अधिकार कर लियो, कहालीकि इस्राएल को परमेश्वर यहोवा इस्राएलियों को तरफ सी लड़त होतो। 43 तब यहोशू सब इस्राएलियों को संग गिलगाल की छावनी म लौट आयो।