यहोशू 13

अऊर भी राज्य ख जितनो हय

1 यहोशू बूढ्ढा अऊर बहुत उमर को भय गयो होतो; अऊर परमेश्वर न ओको सी कह्यो, "तय बूढ्ढा अऊर बहुत उमर को भय गयो हय, अऊर बहुत देश रह्य गयो हंय, जो इस्राएल को अधिकार म अभी तक नहीं आयो। 2 यो देश रह्य गयो हय, पलिश्तियों को पूरो प्रान्त, अऊर पूरो गशूरी देश 3 मिस्र देश को आगु शीहोर नदी सी ले क उत्तर को तरफ एक्रोन नगर की सीमा तक जो कनानियों को भाग गिन्यो जावय हय; अऊर पलिश्तियों को पाचों सरदार, मतलब अज्जा, अशदोद, अशकलोन, गत, अऊर एक्रोन को लोग, अऊर दक्षिन को तरफ अव्वी जाती भी, 4 फिर अपेक नगर अऊर एमोरियों की सीमा तक कनानियों को पूरो देश, अऊर सीदोनियों को मारा नाम को देश, 5 फिर गवालियों को देश, अऊर पूर्व को तरफ हेर्मोन पहाड़ी को खल्लो को बालगाद नगर सी ले क हमात की घाटी तक पूरो लबानोन प्रदेश, 6 ✝13:6 गिनती ३३:५४फिर लबानोन प्रदेश सी ले क मिस्रपोतमैम तक सीदोनियों को पहाड़ी देश को निवासी। इन ख मय इस्राएलियों को सामने सी निकाल देऊं; इतनो होय कि तय मोरी आज्ञा को अनुसार उन्को अधिकार इस्राएलियों को बीच म बाट दे। 7 येकोलायी तय अब यो देश ख नव गोत्रों अऊर मनश्शे को अरधो गोत्र ख उन्को हिस्सा होन लायी बाट दे।"

यरदन को पूर्व भाग को बंटवारा

8 ✝ 13:8 गिनती ३२:३३; व्यवस्थाविवरन ३:१२ रूबेनियों अऊर गादियों ख त ऊ हिस्सा मिल चुक्यो होतो, जेक मूसा न उन्ख यरदन नदी को पूर्व को तरफ दियो होतो, कहालीकि परमेश्वर को सेवक न यो उन्खच दियो होतो, 9 मतलब अर्नोन नाम की घाटी को किनार को अरोएर नगर सी ले क, अऊर उच घाटी को बीच को नगर ख छोड़ क दीबोन नगर तक मेदबा को जवर को पूरो चौरस देश; 10 अऊर अम्मोनियों की सीमा तक हेशबोन म रहन वालो एमोरियों को राजा सीहोन को पूरो नगर; 11 अऊर गिलाद देश, अऊर गशूरियों अऊर माकावासियों की सीमा, अऊर पूरो हेर्मोन पहाड़ी, अऊर सल्का नगर तक पूरो बाशान प्रदेश, 12 फिर अश्तारोत अऊर एद्रेई नगर म रहन वालो ऊ ओग को पूरो राज्य जो रपाई जाती म सी अकेलो बच गयो होतो; कहालीकि इन ख मूसा न मार क उन्की प्रजा ख ऊ देश सी निकाल दियो होतो। 13 पर इस्राएलियों न गशूरियों अऊर माकियों ख उन्को देश सी नहीं निकाल्यो; येकोलायी गशूरी अऊर माकी जाती इस्राएलियों को बीच म अज तक रह्य हय।

14 ✝ 13:14 व्यवस्थाविवरन १८:१ अऊर लेवी को कुल ख मूसा न कोयी हिस्सा नहीं दियो; कहालीकि इस्राएल को परमेश्वर यहोवा को वचन को अनुसार ओकीच चढ़ायी हुयी होमबलि बलि की भेंट उन्को लायी हिस्सा ठहरी हय।

रूबेन को वंश ख दियो गयो हिस्सा

15 मूसा न जमीन को हिस्सा रूबेन को वंश ख उन्को परिवार ख बाट दियो होतो, 16 मतलब अर्नोन नाम की घाटी को किनार को अरोएर नगर सी ले क अऊर उच घाटी को बीच को नगर ख छोड़ क मेदबा को जवर को पूरो चौरस देश; 17 फिर चौरस देश म को हेशबोन अऊर ओको सब गांव; फिर दीबोन, बामोतबाल, बेतबाल्मोन, 18 यहसा, कदेमोत, मेपात, 19 किर्यातैम, सिबमा, अऊर घाटी म की पहाड़ी पर बस्यो हुयो सेरेथश्शहर, 20 बेतपोर, पिसगा पहाड़ी की ढलान अऊर बेत्यशीमोत, 21 मतलब चौरस देश म बस्यो हुयो हेशबोन म रहन वालो एमोरियों को ऊ राजा सीहोन को राज्य को पूरो नगर जिन्ख मूसा न मार लियो होतो। मूसा न एवी, रेकेम, सूर, हूर, अऊर रेबा नाम को मिद्दानी जाती को मुखियावों ख भी मार डाल्यो होतो जो सीहोन को ठहरायो हुयो शासक अऊर उच देश को निवासी होतो। 22 अऊर इस्राएलियों न उन्को अऊर मारयो हुयो व्यक्तियों को संग बोर को टुरा भविष्य बतावन वालो बिलाम ख भी तलवार सी मार डाल्यो। 23 अऊर रूबेनियों की सीमा यरदन नदी को किनार होतो। रूबेनियों को हिस्सा उन्को वंशों अऊर कुलों को अनुसार योच नगर अऊर गांव उन्को हिस्सा होतो।

गाद को कुल ख दियो गयो हिस्सा

24 फिर मूसा न गाद को वंशों ख भी कुलों को अनुसार उन्को हिस्सा कर क् बाट दियो। 25 तब यो ठहरयो, मतलब याजेर या गिलाद प्रदेश को पूरो नगर, अऊर रब्बा नगर को सामने को अरोएर नगर तक अम्मोनियों को अरधो देश, 26 अऊर हेशबोन नगर सी रामतमिस्पे अऊर बतोनीम् तक, अऊर महनैम सी दबीर की सीमा तक, 27 अऊर घाटी म बेथारम, बेतनिम्रा, सुक्कोत, अऊर सापोन अऊर हेशबोन नगर को राजा सीहोन को राज्य को बच्यो हुयो हिस्सा, अऊर किन्नेरेत नाम को तलाव को किनार तक, यरदन नदी को पूर्व को तरफ को ऊ देश जेकी सीमा यरदन हय। 28 गादी लोगों को हिस्सा उन्को कुलों को अनुसार नगरों अऊर गांवो समेत यहांच रूक गयो।

पूर्व की मनश्शे को अरधो गोत्र ख दियो गयो हिस्सा

29 फिर मूसा न मनश्शे को अरधो कुलों ख भी उन्को निजी हिस्सा कर क् दियो; ऊ मनश्शे को अरधो कुल को निजी हिस्सा उन्को कुलों को अनुसार ठहरयो। 30 ऊ यो आय, मतलब महनैम सी ले क बाशान प्रदेश को राजा ओग को राज्य को पूरो देश, अऊर बाशान प्रदेश म बसी हुयी याईर की साठ बस्तियां, 31 अऊर गिलाद को अरधो हिस्सा, अऊर अश्तारोत, अऊर एद्रेई, जो बाशान म ओग को राज्य को नगर होतो, हि मनश्शे को टुरा माकीर को वंश को, मतलब माकीर को अरधो वंश को निजी हिस्सा कुलों को अनुसार बाट दियो गयो।

32 जो हिस्सा मूसा न मोआब को मैदान म यरीहो को जवर को यरदन नदी को पूर्व को तरफ बाट दियो हि योच आय। 33 ✝13:33 गिनती १८:२०; व्यवस्थाविवरन १८:२पर लेवी को गोत्र ख मूसा न कोयी हिस्सा नहीं दियो; इस्राएल को परमेश्वर यहोवाच अपनो वचन को अनुसार उन्को हिस्सा ठहरयो।