यहोशू 18

बची हुयी जमीन को बंटवारा

1 फिर इस्राएलियों की पूरी मण्डली न शीलो नगर म जमा होय क वहां मिलाप वालो तम्बू*18:1 परमेश्वर को मौजूदी को तम्बू ख खड़ो करयो; कहालीकि उन्को देश अधिकार म आय गयो होतो। 2 अऊर इस्राएल को सात कुल अब भी असो होतो, जिन्ख उन्को हिस्सा नहीं मिल्यो होतो। 3 तब यहोशू न इस्राएलियों सी कह्यो, "जो देश तुम्हरो पूर्वजों को परमेश्वर यहोवा न तुम्ख दियो हय, ओख अपनो अधिकार म करन म कब तक ढिलायी करतो रहो? 4 अब हर एक कुल म सी तीन आदमी चुन लेवो, मय उन्ख ऊ देश म भेजूं कि हि वहां जाय क ओकी जांच करे, अऊर जो जमीन हिस्सा उन्ख अपनो कुल को लायी होना, ओको बारे म लिख ले अऊर मोरो जवर वापस लौट आये। 5 अऊर हि देश ख सात हिस्सा म बाट ले, यहूदा कुल दक्षिन को तरफ अपनो हिस्सा म, अऊर यूसुफ को घराना को लोग उत्तर को तरफ अपनो हिस्सा म रहे। 6 अऊर तुम देश की पूरी जानकारी मोरो जवर लावो; अऊर मय यहां तुम्हरो लायी अपनो परमेश्वर यहोवा को सामने चिट्ठी डालूं। 7 अऊर लेवियों को तुम्हरो बीच म कोयी हिस्सा नहीं मिलेंन, कहालीकि परमेश्वर को दियो हुयो याजकपदच उन्को हिस्सा हय; अऊर गाद, रूबेन, अऊर मनश्शे को अरधो कुल को लोग यरदन को पूर्व दिशा को तरफ परमेश्वर को दास मूसा को दियो हुयो अपनो हिस्सा पा चुक्यो हय।"

8 तब हि चुन्यो गयो आदमी उठ क जान लायी तैयार भयो; अऊर जो ऊ देश को हाल लिखन जाय रह्यो होतो उन्ख यहोशू न या आज्ञा दी, "जाय क देश म घूमो फिरो, अऊर ओको हाल लिख क मोरो जवर लौट आवो; अऊर मय यहां शीलो म परमेश्वर को सामने तुम्हरो लायी चिट्ठी डालूं।" 9 तब हि आदमी चल दियो, अऊर ऊ पूरो देश म घूम्यो, अऊर ओको नगर को सात हिस्सा कर क् उन्को हाल किताब म लिख क शीलो की छावनी म यहोशू को जवर आयो। 10 तब यहोशू न शीलो म परमेश्वर को सामने उन्को लायी चिट्ठी डाली; अऊर वहां यहोशू न इस्राएलियों ख उन्को हिस्सा को अनुसार देश बाट दियो।

बिन्यामीन को कुल ख दियो गयो हिस्सा

11 बिन्यामीन को कुल की चिट्ठी उन्को परिवार को अनुसार निकली, अऊर उन्को हिस्सा यहूदा कुल अऊर यूसुफ को कुलों को बीच म होतो। 12 अऊर उन्की उत्तर दिशा की सीमा यरदन नदी सी शुरू भयी, यरीहो की उत्तर को तरफ सी चढ़ती हुयी पश्चिम को तरफ पहाड़ी देश सी होय क बेतावेन को जंगल म निकली; 13 वहां सी सीमा लूज ख पहुंची जो बेतेल भी कहलावय हय, अऊर लूज को दक्षिन दिशा सी होतो हुयो खल्लो को बेथोरोन को दक्षिन तरफ की पहाड़ी को जवर अत्रोतद्दार पर उतर गयी। 14 फिर पश्चिमी सीमा मुड़ क बेथोरोन को सामने अऊर ओको दक्षिन को तरफ को पहाड़ी सी होतो हुयो किर्यतबाल नाम को यहूदा को एक नगर पर निकली जो किर्यत्यारीम भी कहलावय हय; पश्चिम की सीमा याच होती। 15 फिर दक्षिन को तरफ की सीमा पश्चिम सी शुरू होय क किर्यत्यारीम को छोर सी निकल क नेप्तोह को झरना पर पहुंची; 16 अऊर वा पहाड़ी को छोर पर उतरी, जो हिन्नोम को टुरा की घाटी को सामने अऊर रपाईम नाम की घाटी को उत्तर दिशा को तरफ हय; वहां सी सीमा हिन्नोम की घाटी म, मतलब यबूस को दक्षिन को तरफ सी होय क एनरोगेल झरना पर उतरी; 17 वहां सी वा सीमा उत्तर को तरफ मुड़ क एनशेमेश ख निकल क गलीलोत को तरफ गयी, जो अदुम्मीम की चढ़ायी को सामने हय, फिर वहां सी या रूबेन को टुरा बोहन को गोटा तक उतर गयी; 18 वहां सी वा सीमा उत्तर को तरफ जाय क अराबा को सामने की पहाड़ी को तरफ सी होतो हुयो यरदन नदी की घाटी म उतरी; 19 वहां सी वा सीमा बेथोग्ला को उत्तर को तरफ सी जाय क खारो समुन्दर को उत्तर तरफ को घाटी म यरदन को मुख पर निकली; या दक्षिन की सीमा होती। 20 अऊर पूर्व दिशा को तरफ की सीमा यरदन नदी होती। बिन्यामीनियों को हिस्सा, चारयी तरफ की सीमावों सहित, उन्को कुलों को अनुसार, याच होती।

21 बिन्यामीन कुल को परिवारों ख हि नगर मिल्यो, यरीहो, बेथोग्ला, एमेक्कसीस, 22 बेतराबा, समारैम, बेतेल, 23 अव्वीम, पारा, ओप्रा, 24 कपरम्मोनी, ओफनी अऊर गेबा; हि बारा नगर अऊर इन्को गांव मिल्यो। 25 फिर गिबोन, रामा, बेरोत, 26 मिस्पे, कपीरा, मोसा, 27 रेकेम, यिर्पेल, तरला, 28 सेला, एलेप, यबूस जो यरूशलेम भी कहलावय हय, गिबत अऊर किर्यत; हि चौदा नगर अऊर इन्को गांव मिल्यो। बिन्यामीनियों को हिस्सा उन्को कुलों को अनुसार योच होतो।