यहोशू 5

1 जब यरदन को पश्चिम को तरफ रहन वालो एमोरियों को सब राजावों न, अऊर समुन्दर को जवर रहन वालो कनानियों को सब राजावों न यो सुन्यो, कि परमेश्वर न इस्राएलियों ख पार होन तक उन्को सामने सी यरदन को पानी हटाय क सुखाय दियो हय, तब इस्राएलियों को डर को मारे उन राजावों को मन घबराय गयो, अऊर उन म हिम्मत नहीं रही।

गिलगाल म इस्राएलियों को खतना करयो जानो अऊर फसह माननो

2 ऊ समय परमेश्वर न यहोशू सी कह्यो, "चकमक गोटा की छुरियां बनाय क दूसरी बार इस्राएली लोगों को खतना कराय दे।" 3 तब यहोशू न चकमक गोटा की छुरियां बनाय क खतना नाम की पहाड़ी पर इस्राएली लोगों को खतना करायो। 4 अऊर यहोशू न जो खतना करायो, येको कारण यो हय, कि जितनो लड़ाई को लायक आदमी मिस्र सी निकल्यो होतो हि सब मिस्र सी निकलन पर जंगल को रस्ता म मर गयो होतो। 5 जो आदमी मिस्र देश सी निकल्यो होतो उन सब को त खतना भय गयो होतो, पर जितनो उन्को मिस्र देश सी निकलन को बाद जंगल को रस्ता म पैदा भयो होतो उन म सी कोयी को खतना नहीं भयो होतो। 6 ✝5:6 गिनती १४:२८-३५कहालीकि जब तक इस्राएली जाति को लोग, मतलब जितनो लोग लड़ाई को लायक मिस्र देश सी निकल्यो होतो उन्की मृत्यु नहीं भयी, तब तक हि चालीस साल तक जंगल म फिरतो रह्यो, कहालीकि उन्न परमेश्वर की नहीं मानी होती; येकोलायी परमेश्वर न कसम खाय क उन्को सी कह्यो होतो, कि जो देश मय न तुम्हरो पूर्वजों सी कसम खाय क तुम्ख देन ख कह्यो होतो, अऊर उन म दूध अऊर शहेद की धाराये बहय हय, ऊ देश मय तुम्ख नहीं दिखाऊं। 7 त उन लोगों को टुरा जिन्ख परमेश्वर न उन्को जागा पर पैदा करयो होतो, उन्को खतना यहोशू न करयो, कहालीकि रस्ता म उन्को खतना नहीं होन को वजह हि खतनारहित होतो।

8 अऊर जब हि पूरी जाति को लोगों को खतना भय गयो, तब हि चंगो होय जान तक अपनो अपनो जागा पर डेरा म रह्यो। 9 तब परमेश्वर न यहोशू सी कह्यो, "तुम्हरी निन्दा जो मिस्रियों म भयी हय ओख मय न अज दूर करी हय।" यो वजह ऊ जागा को नाम अज को दिन तक गिलगाल*5:9 लुढ़कनो यां दूर करनो पड़्यो हय।

10 ✝ 5:10 निर्गमन १२:१-१३ येकोलायी इस्राएली गिलगाल म डेरा डाल्यो हुयो होतो, अऊर उन्न यरीहो को जवर को मैदान म महिना को चौदावों दिन शाम को समय फसह त्यौहार मनायो। 11 अऊर फसह को दूसरो दिन हि ऊ देश को फसल म सी अखमीरी रोटी अऊर उच दिन सी भूज्यो हुयो दाना भी खान लग्यो। 12 ✝5:12 निर्गमन १६:३५अऊर ऊ देश की फसल खान को बाद मन्ना गिरनो बन्द भय गयो; ऊ दिन को बाद इस्राएली लोगों ख फिर कभी मन्ना नहीं मिल्यो, पर ऊ साल उन्न कनान देश की फसल म सी खायो।

यहोशू अऊर तलवार लियो हुयो एक आदमी

13 जब यहोशू यरीहो को जवर होतो तब ओन आंखी ऊपर उठायी, अऊर का देख्यो, कि हाथ म नंगी तलवार लियो हुयो एक आदमी सामने खड़ो हय; अऊर यहोशू न ओको जवर जाय क पुच्छ्यो, "का तय हमरो पक्ष को आय, यां हमरो बैरियों को पक्ष को?"

14 तब ओन उत्तर दियो, "नहीं; बल्की मय परमेश्वर की सेना को प्रधान होय क अभी आयो हय।"

तब यहोशू न जमीन पर झुक क दण्डवत करयो, अऊर ओको सी कह्यो, "अपनो दास लायी मोरो प्रभु की का आज्ञा हय?"

15 परमेश्वर की सेना को प्रधान न यहोशू सी कह्यो, "अपनी चप्पल पाय सी उतार डाल, कहालीकि जो जागा पर तय खड़ो हय ऊ पवित्र हय।" तब यहोशू न वसोच करयो।