1 Əmə, Palɔ, mə sə tə əzü-awla nə̂ Jezu Kristə tə̂ äwä əpʉ ama ə̂në Ndjapä, Awoshe əzə̂, gâ ndə Jezu Kristə nə, tə əzü ə̂në a za lɔsu əzə̂ gâ pâ ye kɔ, əndje zâ gâ ye kɔ!

2 Mə wla ngrowô səye kə əbə Timɔte, djatra əgblə nə̂ əmə lə əpʉ lɔsu. Abä də Ndjapä gâ ndə Âgbɔ̂ Əyïngerə nə̂ əzə̂ də Jezu Kristə mä ə̂rɔ̂tə̂ əndje kə əbə ə wü əyo zə ə zä blatshe kə əbə!

3 Mata ə̂në mə mʉ̂ əpʉ kə əbə ə pa bə daka pə kpə Efazə, alɔ ə̂në mə sə̂ kə na mâ Masedwanə kɔ, ndə kə pa bə za ama kə alabə̈ azü ka əndje yi yisə̂ alabə̈ aəpʉ kpî tə̂ əpʉ lɔsu ne. 4 Əndje za lɔsu əndje za gâ tə̂ aəpʉ əterə tshelə akrɔ azü ne wala gâ tə̂ əpʉ aəɨrɨ alätä ə̂në ə ngɔ nglɔ tə̂ ərə ne kɔ ne. Ərə səkɔ sə kə na də aəpʉ ashera ə ro ndə kə pa ə za äwä kə əzü, tshə wusə̂ ərə ə̂në Ndjapä gâmba ndə kə pa tshə mbrə tə̂ äwä lɔsu kɔ. 5 Âdâ ama sə̂ ə̂në mə zâ kɔ kə də̂ əpʉ kə yi tə̂ ə̂në ə to tə̂ lɔsu ə̂në ə sə mvo, ə̂në ə wusə̂ ə̂rɔ̂ ərə kɔ, ndje ə̂në ə to tə̂ äwä djatra əpʉ lɔsu kɔ. 6 Alabə̈ azü nə tshî äwä aərə sə̂ nɔ̂ tʉ gâ ye ə dô tə̂ əndje gâ tə̂ äwä aəpʉ tshelə ama ə̂në ə tɔ tɔ gâ tə̂ ə̈bə̈ ərə bale ne kɔ. 7 Əndje yində kə sə tə aawoyisə̂ âgbɔ̂ əpʉ nə̂ Mayïzə, bale əndje wusə̂ âdâ əpʉ nə ə̂në əndje pa kɔ wu ne, wala əndje wusə̂ âdâ aəpʉ ə̂në əndje ka gâ pâ nə shingʉ shingʉ kɔ wu ne.

8 A wusə̂ nə ə pa âgbɔ̂ əpʉ nə̂ Mayïzə nə sə tə ə̂rɔ̂ ərə, kədə a mbrə ərə də nə də äwänə. 9 Bale, a lï ndə kə wusə̂ nə ə pa əndje mbrə̂ âgbɔ̂ əpʉ nə mbrə̂ mbrə əzü ə̂në tshə sə kə mbrə ərə də äwänə kɔ ne. Bale, ə sə mbrə azü ə̂në əndje dji əpʉ dji ne kɔ də azü ə̂në kumu əndje gbɔ ngbatshe kɔ, mbrə azü ə̂në əndje wəra tə̂ əndje tə̂ Ndjapä gâ ye də alayïnyaka, də azü ə̂në əndje kpe rawa Ndjapä wala aərə nə̂ Ndjapä kpe ne kɔ, də azü ə̂në əndje wo alabä əndje də alayï əndje kɔ, gâ ndə aawowo azü, 10 mbrə azü kə za tə̂ əndje gâ tə̂ əpʉ ə̂trû, akoshe kə sho də angâ əndje də̂ akoshe, aawoka akanga, alayïəterə, azü kə zənga tə̂ əndje gâ pâ əterə gâ ndə azü nɔ̂ ə̂në əndje sə kə mbrə ərə kpî tə̂ ə̂rɔ̂ kə yisə̂ ərə ə̂në əndje yîsə̂ nə gâ ye kɔ. 11 Kə yisə̂ ərə səkɔ lï də Ə̂rɔ̂ Əpʉ ə̂në Ndjapä zâ gâ lə kəna əmə, ə̂në ə sə kə yisə̂ ə̂yî Ndjapä nə ə̂në tshə lï ndə kə pa azü mbe ətshə kɔ, gashu kɔ.

12 Mə za mərshe kə Jezu Kristə, Âgbɔ̂ Əyïngerə nə̂ əzə̂, ətshə ə̂në tshə zâ awlra kə əmə kɔ, mbrə ə̂në tshə wû əmə mə lï lə ala ye â tshə zâ əmə gâ tə̂ kosəra nə̂ ye kɔ, 13 əmə ə̂në, mə sə̂ angbʉlînə tə ə̈bə̈ əzü kə gu ətshə, tə əzü kə gi əyo tə̂ ye, tə əzü kə mbrə awlra tə̂ ye kɔ. Bale, tshə wû əyo əmə, mbrə ə̂në mə wûsə̂ ərə nə wû ne â mbrə̂ kɔ, ndje mbrə ə̂në mə tê tê pa ə za lɔsu əmə kə ətshə ne kɔ. 14 Bale, ə̂rɔ̂tə̂ Âgbɔ̂ Əyïngerə nə̂ əzə̂ nə rô pâ nə gâ ye, tshə mbrə̂ â mə sə də lɔsu də kə yi tə̂ ə̂në ə sə lə Jezu Kristə nə kɔ. 15 Əpʉ səkɔ sə tə djatra əpʉ â ə lï ndə kə pa azü nɔ̂ yində nə: Jezu Kristə nə nâ gâ pâ ashɔ ndə kə pa tshə tshɔ alayïnyaka lə kuzu. Â əmə, mə sə tə angbʉlî əzü nə lə takpa tə̂ əndje nə. 16 Bale, Ndjapä nə wû əyo əmə, kanika, lə əmə, angbʉlî əyïnyaka nə, Jezu Kristə nə yisə̂ äwä kə kânga lɔsu ye ndə kə ka ə ka mbrə azü nə kɔ gashu, ka mə sə tə ə̈bə̈ ərə mbrə azü ə̂në əndje sə kə za lɔsu əndje kə ətshə ndə kə sɔtə̂ sorô nə̂ alɔnɔ̂ kɔ, ka əndje wu. 17 Azü nɔ̂ lʉ̈ ə mbë Əyïngerə ə̂në tshə sə piii kɔ, ə̂në tshə tshu tshu tə̂ ərə ne kɔ, ə̂në azü wu ətshə wu tə̂ ərə ne kɔ, kʉ tə Ndjapä kpiabale kɔ, də ə̂ngû də ə̂ngû piii! Asərəmə!

18 Timɔte, əgblə nə̂ əmə, mə za əpʉ kə yisə̂ ərə səye nə gâ lə kəna zə, ə lï də aəpʉ ə̂në aawopandəma Ndjapä pâ ətshinə gâ pâ zə gâ ye kɔ. Kä gâ pâ aəpʉ səkɔ ə mbrə̈ ə̂rɔ̂ awlra, 19 ə bäta əpʉ lɔsu də lɔsu ə̂në ə wusə̂ ə̂rɔ̂ ərə tə̂ əmbrʉ ərə kɔ. Ə̂rɔ̂ lɔsu səkɔ, alabə̈ azü wə̂ra tə̂ əndje tə̂ nə gâ ye â əndje tê gâ ye tə̂ äwä əpʉ lɔsu əndje nə. 20 Himene gâ ndə Alegəzandrə sə lə takpa tə̂ əndje, â mə kâtə̂ əndje gâ lə kəna Sataa gâ ye ndə kə pa əndje ma manda kə gu Ndjapä kwatəndje ne.